ވޯޓުލުމުގެ ހުރިހާ މަރުހަލާތައް ރޭވިފައިވަނީ ވޯޓުގެ ސިއްރުކަން ނުގެއްލޭނެގޮތަށް ކަމަށާއި، މިކަމާއިމެދު ސުވާލު އުފެދޭގޮތަށް ޚަބަރާއި މަޢުލޫމާތު ނުފެތުރުމަށް އިންތިޚާބުތަކާއި ބެހޭ މައި މަރުކަޒު އިލެކްޝަންސް ކޮމިޝަން (އީސީ) އިން ބުނެފިއެވެ.
އިލެކްޝަންސް ކޮމިޝަނާއި ބެހޭގޮތުން އެކި ފަރާތްތަކުްނ ކުރަމުންދާ ތުހުމަތު ތަކާއި ގުޅިގެން އެ ކޮމިޝަނުން މިވަނީ ޖަވާބު ދެއްވާފައެވެ. އީސިން ވަނީ އިންތިޚާބުގެ ސިއްރުކަން ގެއްލޭގޮތަށް ޢަމަލު ކުރަމުންދާކަމަށް ތުހުމަތުކޮށް މީސްމީޑިއާގައި ފަތުރަމުން ގެންދާ ޚާބަރުތަކާ ގުޅިގެން މީޑިއާތަކަށް މަޢުލޫމާތު ދެއްވާފައެވެ.
އެ ކޮމިޝަނުން ބުނީ ކޮމިޝަނުގެ މަސައްކަތާމެދު އާންމުންގެ މެދުގައި ސުވާލުއުފެދޭ ގޮތަށް، ހަޤީގަތާ ޚިލާފު ދޮގު މަޢުލޫމާތު ފަތުރަމުންދިއުމަކީ ހިތާމަހުރި ކަމެއް ކަމަށެވެ. އަދި ހަމަ އެހެންމެ ވޯޓުގެ ސިއްރުކަންގެއްލޭގޮތަށް އެ ކޮމިޝަނުން މަސައްކަތްކުރަމުންދާ ކަމަށް ބުނެ ދައްކަމުންދާ ވާހަކަތަކަކީ އެއްވެސް އަސާސެއްނެތް ހަޤީގަތާ ޚިލާފު ވާހަކަތަކެއްކަމުގައި ވަނީ ބުނެފައެވެ.
މީގެެއިތުރުން އީސީން ބުނީ ވޯޓުލުމުގެ އެންމެހައި މަރުހަލާތައް ރޭވިފައިވަނީ ވޯޓުގެ ސިއްރުކަން އެއްވެސް މިންވަރަކަށް ނުގެއްލޭނެފަދަ ހަރުދަނާ އުސޫލުތަކެއްގެ މަތިންކަމަށެވެ. އަދި ވަކިގޮތަކަށް ނުވަތަ ވަކިފަރާތަކަށް ވޯޓުލުމަށް މިކޮމިޝަނުން ކަނޑައަޅާފައިވާ އޮފިޝަލުން ނާންގާނެ ކަމަށާއި، ހަމަޖެހިފައިވާގޮތަށް ކޮންމެ މީހަކަށްވެސް 3 ކަރުދާސް އެމީހަކު ބޭނުންވާގޮތަކަށް ވޯޓުލުމަށް ދޫކުރާނެ ކަމުގެ ޔަޤީންކަން އީސީން ވަނީ ދެއްވާފައެވެ.
އިލެކްޝަންސް ކޮމިޝަނުން މިފަދައިން ވިދާޅުވެފައި މިވަނީ އިދިކޮޅު ބައެއް ސިޔާސީ ޕާޓީތަކުން އެ ކޮމިޝަނާއިމެދު ފަތުރަމުންދާ ޙަޤީޤަތާއިޚިލާފު ވާހަކަ ތަކާއި ގުޅިގެންނެވެ. އެ ފަރާތްތަކުން ބުނަމުންދަނީ ކުރިއަށްއޮތް ކައުންސިލް އިންތިޚާބަށް އީސީން ނުފޫޒު ފޯރުވާ ކަމަށާއި، ވޯޓު ސިއްރުނުވާނެ ކަމަށެވެ. އެހެން ނަމަވެސް މިހުރިހާ ތުހުމަތުތައް އީސީން މިވަނީ ދޮގު ކުރައްވާފައެވެ.
