މާލޭ ސަރަޙައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ޙައްލެއް ހޯދައިދިނުމުގެ ގޮތުން މި ސަރުކާރުން ފަށާފައިވާ ބޯހިޔާވަހިކަމުގެ މަޝްރޫޢުގެ މަސައްކަތްތައް ނިމި، އެ ތަންތަނަށް 2028 ވަނަ އަހަރުގެ ޖުލައި މަހުގެ ކުރިން ވަދެވޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މި މޭރުމުން ވިދާޅުވީ، ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިންގެ ސުވާލުތަކަށް ޖަވާބުދެއްވަމުންނެވެ. އެމަނިކުފާނު ވިދާޅުވީ، އެއްވެސް ސަރުކާރަކުން ފެށި ހައުސިންގ މަޝްރޫއެއް އެ ސަރުކާރުގެ ދައުރުގެ ތެރޭގައި ނިންމައި، ރައްޔިތުންނަށް ޙަވާލުކުރުމުގެ ފުރުޞަތު ލިބިފައިނުވާ ކަމަށެވެ.
”އަޅުގަނޑުމެން މިހާރު މި ފަށާ މަޝްރޫޢުތައް މިސާލަކަށް ބީއެމްއެލްގެ ފައިނޭންސްގައި ސޮއިކޮށްގެން މި ފަށާ 3،260 ހައުސިންގ ޔުނިޓް، މި މަޝްރޫޢުތަކަކީ ހަމަ ޔަޤީންކަމާއެކީގައި 2028 ވަނަ އަހަރުގެ އެންމެ ލަސްކޮށް ޖުލައި އާއި ހަމައަށް ފަހަރެއްގައި އެއަށްވުރެ އަވަސްކޮށް ބައެއް މަޝްރޫޢުތައް ވެސް ނިމިދާނެ، އަހަރުގެ މެދަކާއި ހަމައަށް ދާންވާއިރަށް ހުރިހާ ހައުސިންގ ޔުނިޓްތަކަކަށް މީހުންނަށް ވަދެވޭނެ،“ – ރައީސް މުޢިއްޒު ވިދާޅުވިއެވެ.
މި 3،260 ހައުސިންގ ޔުނިޓްތަކުގެ އިތުރުން ހައުސިންގގެ އިތުރު މަޝްރޫއެއް ފެށުމަށް ނިންމާފައިވާ ކަމަށާއި އެއާއެކު ހައުސިންގ ޔުނިޓްތަކުގެ އަދަދު 4،000 ނުވަތަ އެއަށްވުރެ އިތުރުވެގެންދާނެ ކަމަށް ރައީސް ވަނީ ވިދާޅުވެފައެވެ. ރައީސް ވިދާޅުވީ، އެ ހައުސިންގ ޔުނިޓްތަކުގެ މަސައްކަތް ނިމުނުހައި އަވަހަކަށް އެކަންކަން ރައްޔިތުންނާ ހަމައަށް ފޯރުކޮށްދޭނެ ކަމަށެވެ.
ފާހަގަކޮށްލަންޖެހޭ ގޮތުގައި، ބީއެމްއެލް އިން ތަރައްޤީކުރާ ހައުސިންގ ޔުނިޓްތަކުގެ މަސައްކަތްތައް 2028 ވަނަ އަހަރުގެ މެދުތެރޭގައި އެއްކޮށް ނިންމައި އެ ތަންތަން ޙައްޤުވެރިންނަށް ޙަވާލުކުރާނެ ކަމަށް އެ ބޭންކުން ވެސް ވަނީ ޔަޤީންކޮށްދީފައެވެ.
ބީއެމްއެލްގެ ހައުސިންގ މަޝްރޫޢުތައް ކުރިއަށްގެންދާނީ ކޮންސްޓްރަކްޝަން ދާއިރާގައި ފާހަގަކޮށްލެވޭ ކުންފުނިތަކާއި ޙަވާލުކޮށްގެންނެވެ. އެގޮތުން ރާއްޖެއާއި ރާއްޖެއިން ބޭރުގެ ކޮންސްޓްރަކްޝަން ދާއިރާގައި ފާހަގަކޮށްލެވޭ ކުންފުނިތަކާ ޙަވާލުކޮށްގެން މި މަޝްރޫޢުތަކުގެ މަސައްކަތް ކުރިއަށް ގެންދިއުމަށް ހަމަޖެހިފައިވާ ކަމަށް ބީއެމްއެލްއިން ވަނީ މަޢުލޫމާތު ދީފައެވެ.
އެގޮތުން މި ހައުސިންގ ޔުނިޓްތައް ޢިމާރަތްކުރާ ކުންފުނިތަކަކީ، ސީއެމްއީސީގެ އިތުރުން ޗައިނާގެ ބެއިޖިން އަރބަން ކޮންސްޓްރަކްޝަން ގްރޫޕް (ބީޔޫސީޖީ)، އަދި ރާއްޖޭގެ ކުންފުނިތައް ކަމަށްވާ އަމީން ކޮންސްޓްރަކްޝަން ޕްރައިވެޓް ލިމިޓެޑް، އެފްޑަބްލިއު ކޮންސްޓްރަކްޝަން ޕްރައިވެޓް ލިމިޓެޑްގެ އިތުރުން ރަޝީދު ކަރޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑެވެ.
