ގ. ހިޔާ ރޯދި ގޭގައި ހުޅުޖެހި ކަމަށް ތުޙުމަތުވާ ޙުސައިން ޝަޙްބާން އިތުރު 30 ދުވަހަށް ބަންދުކުރުމަށް ކްރިމިނަލް ކޯޓުން އަމުރުކޮށްފިއެވެ.
މީސް މީޑިއާގައި އާންމުވެފައިވާ ސީސީޓީވީ ފުޓޭޖްތަކުން ފެންނަ ގޮތުގައި ހިޔާ ރޯދިގޭގައި އަލިފާން ރޯވުމުގެ ކުޑައިރުކޮޅެއް ކުރިން، އެ ގެއަށް މީހަކު ވަންނަ މަންޒަރު ފެނެއެވެ. އާންމުވެފައިވާ އެ ވީޑިއޯއިން ފެންނަނީ ސައިކަލެއްގައި އަންނަ މީހަކު އެގޭ ކައިރީގައި ސައިކަލު ޕާކު ކުރުމަށްފަހު އެ ގެއަށް ވަންނަ މަންޒަރެވެ.
އެ މީހާ ހުރީ ކަޅު ކުލައިގެ އަވި އައިނެއް އަޅައި، ހުދާއި ކަޅު ކުލައިގެ ގަމީހެއް ލައިގެންނެވެ. ވީޑިއޯއިން ފެންނަ ގޮތުގައި އެ ގޭގައި އަލިފާން ރޯވެފައިވަނީ އެ މީހާ އެ ގެއިން ނުކުމެގެންދިޔަތާ ކުޑަ އިރުކޮޅެއްގެ ފަހުންނެވެ. ސީސީޓީވީ ފުޓޭޖަށް ބެލުމަށްފަހު މި މައްސަލާގައި ތުޙުމަތުކުރެވޭ އެތައް ކަމެއް ޙުސައިން ޝަޙްބާންގެ ކިބައިން ފެނިގެން ގޮސްފައިވެއެވެ.
މި ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވި ނަމަވެސް އެ ގެއަށް ވަނީ ވަރަށް ބޮޑެތި ގެއްލުންތަކެއް ލިބިފައެވެ.
