”އަދަދު“ ނޫހުން ”އައިޝާ“ ގެ ނަމުގައި ރޭ ގެނެސްދިން ޑޮކިއުމެންޓްރީއަކީ ސިޔާސީ ބޭނުމެއްގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަގުވައްޓާލުމުގެ ގޮތުން ގެނެސްދިން ޑޮކިއުމެންޓްރީއެއް ކަމަށް މަޝްހޫރު ދީނީ ޢިލްމުވެރިޔާ ޝެއިޚް ޢަލީ ޒައިދު ވިދާޅުވެއްޖެއެވެ.
ޝެއިޚް ޒައިދު މި މޭރުމުން ވިދާޅުވީ އެކްސްގައި ޙިއްޞާކުރެއްވި ޕޯސްޓެއްގައެވެ. އެ ޕޯސްޓުގައި ޝެއިޚް ވިދާޅުވީ، ”އަދަދު“ ނޫހުން ”އައިޝާ“ ގެ ނަމުގައި ރޭ ގެނެސްދިން ޑޮކިއުމެންޓްރީގައި ހުރި އެއްވެސް ވާހަކައެއް ޤަބޫލުނުކުރައްވާ ކަމަށާއި އެ ޑޮކިއުމެންޓްރީގައި ގެނެސްދީފައި ހުރީ އެއްވެސް ޙަޤީޤަތެއް ނެތް ދޮގު ވާހަކަތަކެއް ކަމަށެވެ.
I don’t believe a word of this so called documentary. It is full of illogical claims, and I see it as a pure attempt at character assassination. People can object to a president’s political agenda, no problem there, but going after him with Qazf, no way, it is completely…
— Ali Zaid (@alizaid1000) March 29, 2026
ރައީސް މުޢިއްޒުގެ ސިޔާސީ އެޖެންޑާއާއި އެމަނިކުފާނު ގެންގުޅުއްވާ ސިޔާސަތުތަކަށް ފާޑުކިޔުމުގެ ޙައްޤު ކޮންމެ މީހަކަށްވެސް އޮންނާނެ ކަމަށާއި ނަމަވެސް އެމަނިކުފާނުގެ ބޮލުގައި ޒިނޭގެ މުޑުދާރު ޢަމަލުގެ ތުޙުމަތު އަޅުވައި ޤަޒުފުކުރުމަކީ އެއްވެސް ޙާލެއްގައި ބަލައިގަނެވޭނެ ކަމެއްނޫން ކަމަށް ޝެއިޚް ޒައިދު ވަނީ ވިދާޅުވެފައެވެ.
ޤަޒުފުކުރުމަކީ އިސްލާމްދީނުގައި ބޮޑު ފާފައެއްކަން ފާހަގަކުރައްވަމުން ޝެއިޚް ވަނީ އެފަދަ ޢަމަލުތަކުން ދުރުހެލިވުމަށް ހުރިހާ ފަރާތްތަކަށް ނަޞޭޙަތްތެރިވެ ވަޑައިގެންފައެވެ. ނޫސްވެރިކަމުގެ ނަމުގައި ޙަޤީޤަތާ ޚިލާފު މިފަދަ ވާހަކަތައް ފެތުރުމަކީ ބަލައިގަނެވޭނެ ކަމެއްނޫން ކަމަށާއި، ނޫސްވެރިން ވެސް މިފަދަ ޢަމަލުތަކާ ދުރުހެލިވުމަށް ނަޞޭޙަތްތެރިވެ ވަޑައިގަންނަވާ ކަމަށް ޝެއިޚް ވިދާޅުވިއެވެ.
އިސްލާމީ ޝަރީޢަތުގައި މުއުމިނެއްގެ މައްޗަށް ޒިނޭގެ ތުޙުމަތު ކުރުމަށްފަހު އެކަން ސާބިތުކޮށް ނުދެވިއްޖެ މީހާގެ މައްޗަށް އޮންނަ އަދަބަކީ ޤަޒުފުގެ ޙައްދުޖެހުމެވެ. އެގޮތުން އެކަން ސާބިތުކުރުމަށް ހަތަރު ހެކިން ނުގެނެވިއްޖެނަމަ، ޤަޒުފުކުރި މީހާގެ ގައިގައި 80 އެތިފަހަރުން ޙައްދުޖެހޭނެއެވެ.
ފާހަގަކޮށްލެވޭ ގޮތުގައި ”އަދަދު“ ނޫހުން ގެންދަނީ އިންތިޚާބުތަކާ ދިމާކޮށް ކޮންމެފަހަރަކު ވެސް ރައީސް މުޢިއްޒުގެ އަބުރު ކަތިލައި، އަގު ވައްޓާލުމަށް އެތަކެއް މަސައްކަތްތަކެއް ކުރަމުންނެވެ. އެގޮތުން 2021 ވަނަ އަހަރުގެ ލޯކަލް ކައުންސިލްތަކުގެ އިންތިޚާބާ ދިމާކޮށް މާލޭ ސިޓީގެ މޭޔަރު ކަމަށް ޕީޕީއެމްގެ ޓިކެޓުގައި އެމަނިކުފާނު ކައުންސިލަށް ވާދަކުރެއްވުމުން ”ނޫމަޑި“ އަދި ”މެއިޑް“ ގެ ނަމުގައި ޑޮކިއުމެންޓްރީތަކެއް ނެރެފައިވެއެވެ.
މީގެ އިތުރުން 2023 ވަނަ އަހަރުގެ ރިޔާސީ އިންތިޚާބާ ދިމާކޮށް ”ދޮންމަންމަ“ ގެ ނަމުގައި ވެސް އެ ނޫހުން ޑޮކިއުމެންޓްރީއެއް ނެރެފައިވެއެވެ. ”އަދަދު“ ނޫހުން ހުއްޓުމެއްނެތި ރައީސް މުޢިއްޒުގެ އަބުރު ކަތިލާ، ޙަޤީޤަތާ ޚިލާފު ޑޮކިއުމެންޓްރީތައް ނެރުނު ނަމަވެސް ރައީސް މުޢިއްޒަށް ރައްޔިތުން ކުރަމުން އަންނަ ތާއީދަށް އެއްވެސް ބަދަލެއް ނާދެއެވެ.
