ހދ. ކުޅުދުއްފުށި ސިޓީ ރީޖަނަލް ހޮސްޕިޓަލްގައި އަލަށް ތަރައްޤީކުރި އިމަރޖެންސީ ރޫމާއި ޑައިލިސިސް ރޫމް، ރައީސުލްޖުމްހޫރިއްޔާގެ އަނބިކަނބަލުން ފަސްޓް ލޭޑީ ސާޖިދާ މުޙައްމަދު ހުޅުވައިދެއްވައިފިއެވެ.
ކުޅުދުއްފުށީ ރީޖަނަލް ހޮސްޕިޓަލްގައި އަލަށް ތަރައްޤީކުރި އިމަރޖެންސީ ރޫމާއި ޑައިލިސިސް ރޫމް މެޑަމް ސާޖިދާ ހުޅުއްވައިދެއްވީ، އެކަމަނާ ކުޅުދުއްފުށި ސިޓީއަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިންނެވެ. މި ދެތަން ހުޅުވައިދެއްވުމަށްފަހު މެޑަމް ސާޖިދާ ވަނީ އިމަރޖެންސީ ރޫމާއި ޑައިލިސިސް ސެންޓަރު ބައްލަވާލައްވައިފައެވެ.
އަލަށް ހުޅުވިގެންދިޔަ އިމަރޖެންސީ ރޫމަކީ ޖާގަ ތަނަވަސް، ޒަމާނީ ފެންވަރުގެ ވަސީލަތްތަކާއެކު ހަ އެނދުގެ މައްޗަށް އެކުލެވޭ ބަލިމީހުންނަށް ފަސޭހަކަމާއެކު ޚިދުމަތް ލިބޭނެހެން ތަރައްޤީކޮށްފައިވާ ތަނެކެވެ. މީގެ އިތުރުން އަލަށް ހުޅުވުނު ޑައިލިސިސް ސެންޓަރަކީވެސް ޖާގަ ތަނަވަސް އަދި ޒަމާނީ ވަސީލަތްތަކާއެކު ނުވަ އެނދުގެ މައްޗަށް އެކުލެވޭ ތަނެކެވެ. މީގެކުރިން މި ޚިދުމަތް ދެމުންދިޔައީ ވަސީލަތްތައް މަދު އެންމެ ހަތަރު އެނދުގެ މައްޗަށް އެކުލެވޭ ޑައިލިސިސް ސެންޓަރެއްގައެވެ.
ފާހަގަކޮށްލަންޖެހޭ ގޮތުގައި ކުޅުދުއްފުށީ ރީޖަނަލް ހޮސްޕިޓަލުގައި މީގެކުރިން އިމަރޖެންސީ ފަރުވާ ދެމުންދިޔައީ ޢިމާރާތުގެ އެތޭރޭގައި ހުންނަ ވަރޑެއްގައެވެ. ނަމަވެސް އަލަށް ތަރައްޤީކުރެވުނު އިމަރޖެންސީ ރޫމާއެކު ސީދާ އިމަރޖެންސީ ރޫމްގެ ވަންނަ ދޮރާ ދިމާލަށް އެމްބިއުލާންސަށް ކައިރި ކުރެވި، ކުއްލި ޙާލަތްތަކުގައި ބަލިމީހުންނަށް ދެވޭ ފަރުވާ އަވަސްވެގެންދާނެ ކަމަށް އެ ހޮސްޕިޓަލުން ޤަބޫލުކުރެއެވެ.
ސަރުކާރުގެ އަމާޒަކީ ރާއްޖޭގެ އެކި ކަންކޮޅުތަކުގައި ޞިއްޙީ ދާއިރާގެ ޚިދުމަތްތައް އިތުރަށް ފުޅާކުރުމެވެ. އެގޮތުން ރާއްޖޭގެ އެކި ރަށްރަށުގައި ޑައިލިސިސް ސެންޓަރުތަކާއި ޞިއްޙީ މަރުކަޒުތަކުގެ ޖާގަ ތަނަވަސް ކުރުމަށް އަޅާ އެކްސްޓެންޝަން ބިލްޑިންގތައް އިތުރުކުރުމުގެ އިތުރުން އެމްބިއުލާންސްތައް ފޮނުވުމުގެ މަސައްކަތް ސަރުކާރުން ދަނީ ކުރަމުންނެވެ.
