ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްދުވަހެއްގައި ބާއްވާ ގޮތަށް ހަދަން އުޅެނީ، ރިޔާސީ ދައުރު ދަންމާލުމަށް ކަމަށް ބުނެ އިދިކޮޅު ފަރާތްތަކުން ދައްކަމުން އަންނަ ވާހަކަތަކަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަރުގަދަ ރައްދެއް ދެއްވައިފިއެވެ.
”އެކްސްޕްރެސޯ ވިތް ރައީސް“ ގެ ނަމުގައި ސަންގު ޓީވީން އިންތިޒާމުކޮށްގެން ރޭ ކުރިއަށްގެންދިޔަ ޕްރޮގްރާމުގައި ޒުވާނަކު ވަނީ، ރައީސް އުޅުއްވަނީ ރިޔާސީ ދައުރު ދަންމާލަން ކަމަށް ބުނެ އިދިކޮޅު ފަރާތްތަކުން ކުރާ ތުޙުމަތުތަކާ ގުޅޭގޮތުން ރައީސް މުޢިއްޒުއާ ސުވާލުކޮށްފައެވެ. އެ ސުވާލަށް ޖަވާބުދެއްވަމުން ރައީސް ވިދާޅުވީ، އެކަހަލަ އެއްވެސް ކަމެއް ކުރެއްވުމުގެ ވިސްނުންފުޅެއް އެމަނިކުފާނުގެ ނެތް ކަމަށާއި ކުރިއަށް އޮތް ތަނުގައި ނުވެސް ކުރައްވާނެ ކަމަށެވެ.
މީގެ އިތުރުން އަންނަ އޭޕްރީލް މަހުގެ ހަތަރުވަނަ ދުވަހު ނެގުމަށް ހަމަޖެހިފައިވާ ރެފަރެންޑަމް ނުވަތަ ފެންނަ ނުފެންނަ ވޯޓުގައި އެފަދަ އެއްވެސް ކަމެއް ނޯންނާނެކަން ފާހަގަކުރައްވަމުން ރައީސް ވިދާޅުވީ، އެ ވޯޓުގައި އޮންނާނީ މިހާރު މި ހިނގަމުންދާ 20 ވަނަ ރައްޔިތުންގެ މަޖިލީހުގެ ދައުރު ކުރުކޮށްލުމުގެ ވާހަކަ ކަމަށެވެ.
”ހައެއްކަ މަސް ކުރުކޮށްލަން ޖެހެންޏާ ޤާނޫނުއަސާސީ އޮތް ގޮތުން ރައްޔިތުންގެ ގާތުން އަހަން ޖެހޭނެ، އެހެންވީމާ ވޯޓުގައި މި އަހަނީ މިހާރު މި އޮތް މަޖިލީހުގެ ދައުރު ކުރުކޮށްލާފައި ދެ އިންތިޚާބު އެއްދުވަހެއްގައި ބޭއްވުމަކީ ރައްޔިތުންނަށް ފެންނަ ކަމެއްތޯ، އާނއޭކޭ ނުވަތަ ނޫނެކޭ، އެއަށް އެއްޗެއް ވިދާޅުވެދެއްވާށޭ، މިއަކު ނާދޭ ރިޔާސީ އިންތިޚާބު ދިގުކުރާ ވާހަކައެއް، އެކަހަލަ އެއްވެސް ކަމެއް ކުރާކަށް ނުވެސް އުޅެން، ނުވެސް ކުރާނަން،“ – ރައީސް ވިދާޅުވިއެވެ.
ރައީސް މުޢިއްޒު އިތުރަށް ވިދާޅުވީ، ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއް ދުވަހެއްގައި ބާއްވައިފިނަމަ އެކަމުގެ ސަބަބުން ކުރާނީ ފައިދާ ކަމަށެވެ. ދެ އިންތިޚާބު އެއްދުވަހެއްގައި ބާއްވައިފިނަމަ ޚަރަދުތައް ކުޑަކުރެވި، ޑިމޮކްރަސީ އިތުރަށް ހަރުދަނާވެ، މިނިވަން އިންތިޚާބަކުން ކެންޑިޑޭޓުން އިންތިޚާބު ކުރެވިގެންދާނެ ކަމަށް ރައީސް ވަނީ ވިދާޅުވެފައެވެ. މީގެ އިތުރުން ނުފޫޒުތަކުގައި ޖެހުމުގެ ސަޤާފަތް ވެސް އެކުގައި ނެތިގެންދާނެ ކަމަށް އެމަނިކުފާނު ވަނީ ވިދާޅުވެފައެވެ.
