ވިސްނުންފުޅުގައި ހުރީ ރައްޔިތުންގެ މަޖިލީހުގެ 10 އިންސައްތަ ގޮނޑި ޒުވާނުންނަށް ޚާއްޞަކުރުމަށް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
”އެކްސްޕްރެސޯ ވިތް ރައީސް“ ގެ ނަމުގައި ސަންގު ޓީވީން އިންތިޒާމުކޮށްގެން ރޭ ކުރިއަށްގެންދިޔަ ޕްރޮގްރާމުގައި ވާހަކަފުޅުދައްކަވަމުން ރައީސް މުޢިއްޒު ވިދާޅުވީ، ރައްޔިތުންގެ މަޖިލީހުގައި ޒުވާނުންގެ ދައުރު މިހާރަށްވުރެ ބޮޑަށް އިތުރުކުރުމަށް، ރައްޔިތުންގެ މަޖިލީހުގެ 10 އިންސައްތަ ގޮނޑި ޒުވާނުންނަށް ޚާއްޞަކުރުމަކީ އެމަނިކުފާނުގެ ވިސްނުންފުޅު ކަމަށެވެ.
މި ބަދަލު ގެނެވޭނީ ރައްޔިތުންގެ މަޖިލީހުގެ ތެރެއިން ޤާނޫނަށް ގެންނަންޖެހޭ ބަދަލުތައް ގެނެސްގެން ކަމަށް ރައީސް ވަނީ ވިދާޅުވެފައެވެ.
ޤައުމުގެ ކަންކަން ބައްޓަންކުރުމުގެ އިތުރުން ކަންކަމުގައި ބަސް އިއްވުމުގައި ޒުވާނުންގެ ބައިވެރިވުން މިހާރަށްވުރެ އިތުރަށް ފުޅާކޮށް އެ ފަރާތްތަކަށް އޮންނަ ފުރުޞަތުތައް ފަހިވާންޖެހޭކަން ފާހަގަކުރައްވަމުން ރައީސް މުޢިއްޒު ވިދާޅުވީ، އެ މަސައްކަތުގެ ތެރެއިން، މި އަހަރުގެ ތެރޭގައި ޔޫތް ޕާލިމަންޓް ވެސް ފެށިގެންދާނެ ކަމަށެވެ.
ރައްޔިތުންގެ މަޖިލީހުގައި 30 އަހަރުން ދަށުގެ ޒުވާނުންނަށް އިސްކަން ދެވޭ ގޮތަށް ކޯޓާއެއް ކަނޑައެޅުމަކީ އަބަދުވެސް ގެންގުޅުއްވާ ވިސްނުންފުޅެއްކަން ފާހަގަކުރައްވަމުން ރައީސް މުޢިއްޒު ވިދާޅުވީ މިކަމުގެ ސަބަބުން ޒުވާނުން ބާރުވެރިކުރުވުމަށް ކުރާ މަސައްކަތްތައް މިހާރަށްވުރެ އިތުރަށް ފުޅާވެގެންދާނެ ކަމަށެވެ.
”އަޅުގަނޑުގެ ވިސްނުމުގައި އޮތީ 10 ޕަސެންޓު ޒުވާނުންނަށް އަދި 10 ޕަސެންޓު އަންހެން ބޭފުޅުންނަށް، އެހެންކަމުން މިސާލަކަށް މިހާރު އޮތް މަޖިލީސް 93 ގޮނޑި އެއީ ގާތްގަނޑަކަށް ނުވަ މެންބަރުން ޒުވާން ބޭފުޅުން 30 އަހަރުން ދަށުގެ، އަދި ނުވަ އަންހެން ބޭފުޅުންނަށް،“ – ރައީސް ވިދާޅުވިއެވެ.
މިކަމުގެ ސަބަބުން، ޤައުމީ ބޮޑެތި ކަންކަމުގައި ގޮތް ނިންމައި، ބަސް ބުނުމުގެ ފުރުޞަތު ޒުވާނުންނަށް ލިބިގެންދާނެ ކަމަށް ރައީސް ވަނީ އިތުރަށް ވިދާޅުވެފައެވެ.
ފާހަގަކޮށްލަންޖެހޭ ގޮތުގައި، މި މަހުގެ 23 ވީ ހޯމަ ދުވަހު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް މުޢިއްޒު ވަނީ ރައްޔިތުންގެ މަޖިލީހުގެ ވަކި އިންސައްތައެއް ޒުވާނުންނަށް ޚާއްޞަކުރައްވާނެ ކަމަށާއި، އެކަން ކުރުމަށް ޤާނޫނަށް ގެންނަންޖެހޭ ބައެއް ބަދަލުތައް ގެނައުމުގެ މަސައްކަތް ވަރަށް އަވަހަށް ފައްޓަވާނެ ކަމަށް ވިދާޅުވެފައެވެ.
