ދެ ޝައިތޯނުން ގުޅިގެން ނަމަވެސް ވެރިކަން ހޯދާނެ ކަމަށް ބުނި ޔާމީން އެންމެ ފަހުން ނަޝީދުއާ ގުޅި އެކަން މުޅި ދިވެހިރާއްޖެއަށް ހާމަކޮށްލައިފިއެވެ.
ޔާމީން މިކަން ހާމަކުރީ އޭނާގެ ޕާޓީ ޕީއެންއެފްއިން ކާނިވާ ސަރަޙައްދުގައި ”ޗަގޯސް ޖަލްސާ“ ގެ ނަމުގައި ރޭ ކާނިވާ ސަރަހައްދުގައި ކުރިއަށްގެންދިޔަ ޖަލްސާގައި ވާހަކަދައްކަމުންނެވެ. ޖަލްސާގައި ވާހަކަދައްކަމުން ޔާމީން ބުނެފައިވަނީ ނަޝީދު ވިދާޅުވީހެން ”އަނެއް ދިވެހިރާއްޖެ“ ހޯދަން ޖެހިއްޖެ ކަމަށާއި އެކަން ކުރަން މިހާރު މާ ބޮޑަށްވެސް ލަސްވެއްޖެ ކަމަށެވެ.
އިދިކޮޅު މައި ޕާޓީ އެމްޑީޕީއާ ގުޅިގެން ސަރުކާރަށް ޖެއްސުން ކުރުމުގައި ދެމި ހުންނާނެ ކަމަށާއި އެގޮތުން ކުރިއަށް އޮތް ލޯކަލް ކައުންސިލްތަކުގެ އިންތިޚާބުގައި ވެރިކަން ކުރާ ޕާޓީ ޕީއެންސީގެ ފަރާތުން ކައުންސިލަށް ވާދަކުރާ އެއްވެސް ކެންޑިޑޭޓަކަށް ތާއީދުނުކުރާނެ ކަމަށް ޔާމީން ވަނީ ބުނެފައެވެ. ޔާމީން ބުނީ ޕީއެންސީގެ ފަރާތުން ވާދަކުރާ ކެންޑިޑޭޓުންނަށް ތާއީދު ނުކުރި ނަމަވެސް އެހެން ޕާޓީތަކުގެ ފަރާތުން ވާދަކުރާ ކެންޑިޑޭޓުންނަށް ފުރިހަމައަށް ތާއީދުކުރާނެ ކަމަށެވެ.
މީގެ އިތުރުން ދިވެހިރާއްޖޭގެ ޝަރުއީ ނިޒާމު ފުނޑުފުނޑުކޮށްލީ މިއަދުގެ ސަރުކާރުން ކަމަށް ބުނެ ސަރުކާރުގެ ބޮލުގައި ދޮގު ތުޙުމަތު ވެސް ޔާމީން ވަނީ އަޅުވައިފައެވެ. މިނިވަން ޝަރުޢީ ނިޒާމެއް ދިވެހިރާއްޖެއަށް ގެނައުމަށާއި، ޤައުމުގެ ޙާލަތު މިހާރަށްވުރެ ބޮޑަށް ހަރުދަނާކުރުމަށް ”އަނެއް ދިވެހިރާއްޖެ“ ހޯދުމަކީ މިއަދު ކޮނޑުގައި އެޅިފައިވާ ޒިންމާއެއްގެ ގޮތުގައި ޔާމީން ވަނީ ސިފަކޮށްފައެވެ.
ޔާމީންގެ މި ވާހަކަތަކާ ގުޅިގެން ގިނަ ބަޔަކު އަންނަނީ އޭނާއަށް ފާޑުކިޔަމުންނެވެ. އެގޮތުން ޔާމީންގެ މައްޗަށް އެއްވެސް ހެއްކެއް ނެތި، ދޮގު ތުޙުމަތުތަކެއްގެ މައްޗަށް ”ހަރާމް“ ޙުކުމެއް ކުރުމަށްފަހު، ހައްޔަރުކޮށް އަނިޔާދިން މީހުން މިއަދު އޭނާއަށް ރަނގަޅުވީތޯ ގިނަ ބަޔަކު އަންނަނީ ސުވާލު އުފައްދަމުންނެވެ. މީގެ އިތުރުން ޔާމީންގެ ޙައްޤުގައި މަގުމަތީގައި އިހުތިޖާޖުކޮށް، ޖަލުން މިނިވަންކުރުމަށް މަސައްކަތް ކުރުމުން އެތަކެއް އަނިޔާތަކާއި ދުއްތުރާތަކެއްގެ އިތުރުން މަލާމާތެއް ކުރިމަތިވި ޕީޕީއެމް/ޕީއެންސީގެ އާންމު މެންބަރުންނާއި، ޕާޓީގެ އިސް ފަރާތްތަކުގެ އިތުރުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް ޔާމީން ދިން ޤަދަރަކީ އެއީތޯ ވެސް ގިނަ ބަޔަކު ވަނީ ސުވާލު އުފައްދައިފައެވެ.
ފާހަގަކޮށްލެވޭ ގޮތުގައި ޔާމީން ދައްކަމުން އަންނަ މިފަދަ ވާހަކަތަކާއި، ކަމާ ނުގުޅޭ ފަރާތްތަކުގެ އަބުރު ކަތިލުން ފަދަ ކަންކަން ކުރުމުގެ ސަބަބުން އޭނާއަށް ރައްޔިތުން ކުރަމުން އަންނަ ތާއީދު މިހާރު ވަނީ ވަރަށް ބޮޑުތަނުން ކުޑަވެފައެވެ. އެގޮތުން އިރެއްގައި ރާއްޖޭގެ އެންމެ ގިނަ ބަޔަކު ތާއީދުކުރި ރައީސްގެ ގޮތުގައި ޔާމީން މަޝްހޫރުވެފައިވީ ނަމަވެސް މިހާރު އޭނާއަށް 3،000 އެއްހައި މީހުން ވެސް ތާއީދުނުކުރާނެ ކަމަށް ސިޔާސީ މައިދާނުގައި ވަރަށް އިސްކޮށް އުޅުއްވާ ބޭފުޅަކު ވަނީ ލަފާކުރައްވައިފައެވެ.
