ސަރުކާރުގެ ފަސް އަހަރުގެ ދައުރު ނިމޭއިރު ވިލިމާލެ އޮންނާނީ ތަފާތު އެކި ފުރުޞަތުތަކާއެކު ތަރައްޤީވެފައިވާ އަވަށެއްގެ ގޮތުގައި ކަމަށް ކޮންސްޓްރަކްޝަން މިނިސްޓަރު ޑރ. ޢަބްދުﷲ މުއްޠަލިބް ވިދާޅުވެއްޖެއެވެ.
މިނިސްޓަރު މުއްޠަލިބް މި މޭރުމުން ވިދާޅުވީ، ބޭންކް އޮފް މޯލްޑިވްސް (ބީއެމްއެލް) އިން ވިލިމާލޭގައި ތަރައްޤީކުރުމަށް ހަމަޖެހިފައިވާ 300 ހައުސިންގ ޔުނިޓްތަކުގެ ޢަމަލީ މަސައްކަތް ފެށުމަށް މިރޭ ވިލިމާލޭގައި ބޭއްވި ރަސްމިއްޔާތުގައި ވާހަކަދައްކަވަމުންނެވެ. މިނިސްޓަރު ވިދާޅުވީ، މި ފަސް އަހަރުގެ ދައުރު ނިމޭއިރު ވިލިމާލެ ވެގެންދާނީ މާލެ އާއި ހުޅުމާލެއެކޭ އެއްފަދައިން އެކިއެކި ފުރުޞަތުތައް ތަނަވެސްވެފައި އޮތް އަވަށަކަށް ކަމަށެވެ.
”އެ މަޝްރޫޢުއާއެކު ވިލިމާލެވެގެން ދާނީ ފުރުޞަތު އޮތް ތަރައްޤީވެފައިވާ އަވަށަކަށް، ވަޒީފާއާއި ތަޢުލީމީ ފުރުޞަތުތަކާއި ރަނގަޅު ފެންވަރުގެ ޞިއްޙީ ނިޒާމަކާއި ދިރިއުޅުމުގެ ގިނަކަންކަން ހަމަޖެހިފައިވާ ތަނަކަށް، މާލެއާއި ހުޅުމާލެއެކޭ އެއް ހަމައެއްގައި ފުރުޞަތު ތަނަވެސްފައިވާ ރަށަކަށް،“ – މިނިސްޓަރު މުއްޠަލިބު ވިދާޅުވިއެވެ.
ވިލިމާލޭގެ ރައްޔިތުންގެ އެންމެ ބޮޑު އެއް ކަންބޮޑުވުމަކީ ބޯހިޔާވަހި ކަމަށް ދިމާވެފައިވާ މައްސަލަކަން ފާހަގަކުރައްވަމުން މިނިސްޓަރު ވިދާޅުވީ، ވިލިމާލޭގެ ރައްޔިތުން ލޯނު ނަގައިގެން އެ މީހުން ގެތައް ހަދާފައިވާއިރު ކުއްޔަށް ދޭނެ ޖާގައެއްވެސް ގޭގައި ނުހުންނަ ކަމަށެވެ. އެހެންކަމުން އެ ފަރާތްތަކުން ލޯނު ދައްކަމުން ދަނީ ލިބޭ މުސާރަކޮޅުން ވަރަށް ދަތި ޙާލަތެއްގައި، ނަމަވެސް އަލަށް ތަރައްޤީކުރެވޭ ހައުސިންގ ޔުނިޓްތަކާއެކު އެ މައްސަލައަށް ޙައްލެއް ލިބިގެންދާނެ ކަމަށް ޤަބޫލުކުރައްވާ ކަމަށް މިނިސްޓަރު ވިދާޅުވިއެވެ.
ވިލިމާލޭގެ ގޯތިތަކުގައި 10 ފަންގިފިލާއަށް ޢިމާރާތްކުރުމަށް މި ސަރުކާރުން ހުއްދަ ދިނުމާ ގުޅިގެން އެކަމަށް ފާޑުކީ ބަޔަކު ތިބި ކަމަށާއި ނަމަވެސް، ސަރުކާރުން އެކަން އެގޮތަށް ކުރަން ނިންމީ ވިލިމާލޭގައި އިތުރުވަމުން އަންނަ އާބާދީގެ ނިޞްބަތަށް ބަލައި، ކުރިއަށް އޮތް ޖީލުތަކަށް ބޯހިޔާވަހިކަމުގެ ފުރުޞަތުތައް ފަހިކޮށްދިނުމުގެ މަޤުޞަދުގައި ކަމަށް މިނިސްޓަރު ވިދާޅުވިއެވެ.
މާލެ އާއި ހުޅުމާލެއެކޭ އެއްފަދައިން ވިލިމާލެ އަކީވެސް ތަރައްޤީވެފައިވާ އަވަށަކަށް ހެދުމަށް ސަރުކާރުން އަންނަނީ ވަރަށް ގިނަ މަސައްކަތްތަކެއް ކުރަމުންނެވެ. އެގޮތުން ވިލިމާލޭގައި ޒަމާނީ ފެންވަރަކަށް ހޮސްޕިޓަލެއް ތަރައްޤީކުރުމަށް ޖަޕާނުގެ ކުންފުންޏަކާއެކު ވަނީ މިދިޔަ އަހަރުގެ ތެރޭގައި ސޮއިވެސް ކޮށްފައެވެ. މީގެ އިތުރުން ވިލިމާލޭގެ މަގުތައް ޒަމާނީ ފެންވަރަކަށް ތަރައްޤީކުރުމުގެ އިތުރުން ސަރުކާރުން މާލޭ ސިޓީގައި ފެށުމަށް ނިންމާފައިވާ ޓެކްސީ ލައިނުގެ ފަސް ކާރު އެ އަވަށުގައި ދުއްވާ ގޮތަށް ވަނީ ހަމަޖައްސައިފައެވެ.
