ޒުވާނުންނަށް ޚާއްޞަކޮށްގެން ހުޅުމާލޭގައި މިއަދު ބޮޑު ބާބަކިއުއެއް ބޭއްވުމަށް ނިންމައިފިއެވެ.
ޕްރެސިޑެންޝަލް ޔޫތު އެޑްވައިޒަރީ ބޯޑުން އިންތިޒާމުކޮށްގެން ކުރިޔަށްގެންދާ މި ބާބަކިއު އޮންނާނީ މިއަދު ހަވީރު 17:30 އިން ފެށިގެން މިރޭ 19:00 އާއި ހަމައަށް ހުޅުމާލޭ ދެވަނަ ފިޔަވަހީގެ ބާބަކިއު ސަރަޙައްދުގައެވެ. މި ބާބަކިއުގައި ވީހާވެސް ގިނަ ޒުވާނުން ބައިވެރިވުމަށް އެ ބޯޑުން ވަނީ ދަޢުވަތުދީފައެވެ.
”ދިވެހި ޒުވާނުންގެ ގައުމީ ލަފާދޭ ކޮމިޓީ“ ގެ ނަމުގައި ޒުވާނުންނަށް ޚާއްޞަކޮށްގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކޮމިޓީއެއް އެކުލަވާލީ 18 ޖަނަވަރީ 2024 ވަނަ އަހަރުއެވެ. 15 މެންބަރުންގެ މައްޗަށް އެކުލެވޭ މި ކޮމިޓީގެ މައިގަނޑު މަޤުޞަދަކީ ސަރުކާރުގެ މެނިފެސްޓޯއާއި މުހިންމު ސިޔާސަތުތައް ތަންފީޒު ކުރުމުގައި ޒުވާނުންގެ ޚިޔާލާ މަޝްވަރާ ހޯދުމެވެ.
ޕްރެސިޑެންޝަލް ޔޫތު އެޑްވައިޒަރީ ބޯޑުން މި ބާބަކިއު ބޭއްވުމަށް ނިންމާފައި މިވަނީ، ރައްޔިތުންގެ މަޖިލީހުގެ ވަކި އިންސައްތައެއް ޒުވާނުންނަށް ޚާއްޞަކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވުމާ ގުޅިގެންނެވެ. އެމަނިކުފާނު މިކަން ހާމަކުރެއްވީ މިދިޔަ ހޯމަ ދުވަހު ނޫސްވެރިންނާ ބައްދަލުކުރައްވައި ދެއްކެވި ވާހަކަފުޅުގައެވެ.
ނޫސްވެރިންނާ ބައްދަލުކުރައްވައި ދެއްކެވި ވާހަކަފުޅުގައި އެމަނިކުފާނު ވިދާޅުވީ، ދަޢުލަތް ހިންގުމުގެ ނިޒާމާއި ޤާނޫނުއަސާސީއަށް ވަރަށް މުހިންމު އިޞްލާޙުތަކެއް ގެންނަންޖެހޭ ކަމަށާއި، އޭގެތެރެއިން އެންމެ މުހިންމު އިޞްލާޙަކީ، ރައްޔިތުންގެ މަޖިލީހުގެ މެންބަރުންގެ އަދަދު އިތުރުވަމުންދާ މައްސަލަ ހޯދައި، އެކަން ހުއްޓުވުމަށް ޤާނޫނުއަސާސީއަށް ގެންނަން ހުށަހަޅާ އިޞްލާޙު ކަމަށެވެ. މި އިޞްލާޙާއެކު މަޖިލީހުގައި ތިބޭ ވަކި އިންސައްތައެއްގެ މެންބަރުންނަކީ ޢުމުރުން 30 އަހަރުން ދަށުގެ ޒުވާނުން ކަމަށް ކަނޑައެޅިގެންދާނެ ކަމަށް ވެސް ރައީސް ވަނީ ވިދާޅުވެފައެވެ.
