ސުންނީ-ޝީޔަޢީ މަޒުހަބީ ތަޢައްޞުބްގެ ތެރެއަށް ދިވެހިރާއްޖޭގެ މުޖުތަމަޢު ވެއްޓިގެން ދިޔުމުގެ ފުރުޞަތު ދެވިގެން ނުވާނެ ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
މިނިސްޓަރު ޝަހީމް މި ބީދައިން ވިދާޅުވީ އެކްސްގައި ޙިއްޞާކުރެއްވި ޕޯސްޓެއްގައެވެ. މިނިސްޓަރު ޙިއްޞާކުރެއްވި ޕޯސްޓުގައި ވިދާޅުވީ، ދިވެހިންނަކީ ސުންނަތް ޖަމާޢަތުގެ ޞައްޙަ މަތިވެރި ޢަޤީދާގެ މަތީގައި، ޤުރުއާނާއި ސުންނަތާއި ސަލަފުއްޞާލިޙުންގެ މަންހަޖުގައި އެތައް ޤަރުނެއްވަންދެން ސާބިތުކަމާއެކު ދެމިތިބި ބައެއް ކަމަށެވެ.
ދިވެހިންނަކީ އިސްލާމްދީނުގެ ވަސަޠީ އުޞޫލުތަކުގައި އެތަށް ޤަރުނެއްވަންދެން ހިފަހައްޓައިގެން ތިބި ބައެއްކަން ފާހަގަކުރައްވަމުން މިނިސްޓަރު ޝަހީމް ވަނީ، މި އަސާސްތައް ދެމެހެއްޓުމަށް އެންމެހައި ރައްޔިތުންނާއި ދީނީ ޢިލްމުވެރިންގެ އަރިހުން އެދިވަޑައިގެންފައެވެ.
”ރާއްޖޭގެ ދީނީ އެއްބައިވަންތަކަމަށް އެއްވެސް ލޮޅުމެއް އަރާނެ ފަދަ ކަމަކަށް ޖާގަ ނުދެއްވުމަށް ވެސް އިލްތިމާސްކުރަން، އަދި ފިރުޤާތަކުގެ ޢަޤީދާތައް އޭގެ ޢިލްމީ ޙަޤީޤަތްތަކާ ޚިލާފަށް ރައްޔިތުންނަށް އޮޅޭނެ ފަދަ ގޮތަކަށް ނުފަތުރަންވެސް އިލްތިމާސްކުރަން،“ – މިނިސްޓަރު ޝަހީމް ވިދާޅުވިއެވެ.
ދީނީ ފިކުރީ ގޮތުން އިސްލާމީ މުޖުތަމަޢު ބައިބައިކޮށްލައި ދުޝްމަނުން ކުރަމުންދާ މަސައްކަތްތަކާ މެދު އަބަދުވެސް ސަމާލުވެ ތިބެންޖެހޭ ކަމަށާއި، ފިރުޤާތަކުގެ ޢަޤީދާތަކާ ގުޅޭ ކަންކަމުގައި، އެކަމުގެ ޢިލްމު ލިބިގެންވާ ޢިލްމުވެރިން މެނުވީ ވާހަކަ ނުކެއްކުމަށް ވެސް މިނިސްޓަރު ޝަހީމް ވަނީ ނަސޭޙަތްތެރިވެ ވަޑައިގެންފައެވެ.
