ބޭންކް އޮފް މޯލްޑިވްސް (ބީއެމްއެލް) އިން މާލޭ ސަރަޙައްދުގައި ޢިމާރަތްކުރުމަށް ހަމަޖެހިފައިވާ ހައުސިންގ ޔުނިޓްތަކުގެ އަގަކީ ގާތްގަނޑަކަށް 10،000 ރުފިޔާ ކަމަށް ބީއެމްއެލްގެ ސީއީއޯ މުޙައްމަދު ޝަރީފް ވިދާޅުވެއްޖެއެވެ.
ބީއެމްއެލްގެ ސީއީއޯ ޝަރީފް މި މޭރުމުން ވިދާޅުވީ ދަޢުލަތުގެ މީޑިއާގެ ޕްރޮގްރާމެއް ކަމަށްވާ ”ރާއްޖެ މިއަދު“ ޕްރޮގްރާމުގައި ވާހަކަދައްކަވަމުންނެވެ. އަގުހެޔޮ ހައުސިންގ ޔުނިޓްތަކުގެ މަޝްރޫޢުގެ އެންމެ ބޮޑު އެއް ބޭނުމަކީ ރައްޔިތުންނަށް ހެޔޮއަގުތަކެއްގައި ބޯހިޔާވަހިކަން ފޯރުކޮށްދިނުންކަން ފާހަގަކުރައްވަމުން ޝަރީފް ވިދާޅުވީ، މަހުން މަހަށް ކުލި ދައްކައިގެން ތަން މިލްކު ކުރެވޭ ގޮތަށް އެ މަޝްރޫޢު ކުރިއަށް ގެންދަނީ އެ ސަބަބަށްޓަކައި ކަމަށެވެ.
”މީގެ ތެރޭގައި ކުލި މިހާވަރެކޭ ދަންނަވައި ފައިނަލް ކުރަން ތަންކޮޅެއް އަވަސް، އަޅުގަނޑަށް ޤަބޫލުކުރެވޭ ގޮތުގައި ގާތްގަނޑަކަށް 10،000 ވަރަކަށް ހިސާބުގައި ތިން ކޮޓަރީގެ އެޕާޓްމަންޓެއްގެ ކުލި ހަމަޖެހިގެން ދިއުމަކީ އެކަށީގެންވާ ކަމެއް އަޅުގަނޑުމެން މިހާރު ހިސާބުކުރަމުންދާ ވަރަށް ބަލާއިރު،“ – ޝަރީފް ވިދާޅުވިއެވެ.
ޝަރީފް ވިދާޅުވީ މާކެޓުގައި ތިން ކޮޓަރީގެ އެޕާޓްމަންޓެއްގެ އަގަކީ 25،000 ރުފިޔާ އާއި 30،000 ރުފިޔާއާ ދެމެދުގެ އަގުތަކެއް ކަމަށެވެ. އެހެންކަމުން އެ ހައުސިންގ ޔުނިޓްތަކުގެ ކުލި އެހާ ބޮޑަށް ކުޑަވުމަކީ ތަން ލިބޭ ފަރާތްތަކަށް ވަރަށް ބޮޑު ލުޔަކަށްވެގެންދާނެ ކަމެއް ކަމަށް ވެސް ޝަރީފް ވިދާޅުވިއެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެކުލަވައިލާފައިވާ އިންކްލޫސިވް ނޭޝަނަލް އެފޯރޑަބަލް ހައުސިންގގެ ދަށުން ބީއެމްއެލް އިން މާލޭ ސަރަޙައްދުގައި 3،260 ހައުސިންގ ޔުނިޓު ތަރައްޤީކުރުމަށް ވަނީ ނިންމައިފައެވެ. އެގޮތުން ބީއެމްއެލްގެ ސަބްސިޑިއަރީ ކުންފުނި، ބީއެމްއެލް އެފޯރޑަބަލް ހޯމް ލީސިންގ ކޮމްޕެނީން ހުޅުމާލޭ ތިންވަނަ ފިޔަވަހީގައި ޢިމާރާތްކުރުމަށް ހަމަޖެހިފައިވާ ހައުސިންގ ޔުނިޓްތަކުގެ ތެރެއިން ޗައިނާ މެޝިނަރީ އިންޖީނިއަރިންގ ކޯޕަރޭޝަން (ސީއެމްއީސީ) އާއި ޙަވާލުކޮށްގެން ތަރައްޤީކުރުމަށް ހަމަޖެހިފައިވާ 1،224 ހައުސިންގ ޔުނިޓްގެ ޢަމަލީ މަސައްކަތް ވަނީ މީގެ ހަތަރު ވަރަކަށް ދުވަސް ކުރިން ފަށައިފައެވެ.
މާލޭ ސަރަޙައްދުގައި ތަރައްޤީކުރުމަށް ހަމަޖެހިފައިވާ ހައުސިންގ ޔުނިޓްތަކުގެ މަޢުލޫމާތު:
- 1،224 ފުލެޓު – ސީއެމްއީސީ
- 1،190 ފުލެޓު – ބީޔޫސީޖީ
- 364 ފުލެޓު – އަމީން ކޮންސްޓްރަކްޝަން
- 182 ފުލެޓު – އެފްޑަބްލިޔު ކޮންސްޓްރަކްޝަން
- 300 ފުލެޓު – ރަޝީދު ކާޕެންޓްރީ އެންޑް ކޮންސްޓްރަކްޝަން
މި ހައުސިންގ ޔުނިޓްތަކުގެ ތެރެއިން ސީއެމްއީސީ އާއި ބީޔޫސީޖީއާ ޙަވާލުކޮށްގެން ތަރައްޤީކުރާ ހައުސިންގ ޔުނިޓްތަކަކީ ހުޅުމާލެ ތިންވަނަ ފިޔަވަހީގައި ތަރައްޤީކުރާ ހައުސިންގ ޔުނިޓްތަކެކެވެ. އަމީން ކޮންސްޓްރަކްޝަން އާއި އެފްޑަބްލިއު ކޮންސްޓްރަކްޝަންއާ ޙަވާލުކޮށްގެން ތަރައްޤީކުރާ ހައުސިންގ ޔުނިޓްތަކަކީ ހުޅުމާލެ ފުރުތަމަ ފިޔަވަހީގައި ތަރައްޤީކުރާ ހައުސިންގ ޔުނިޓްތަކެކެވެ. ބާކީ 300 ހައުސިންގ ޔުނިޓް ތަރައްޤީކުރުމަށް ހަމަޖެހިފައިވަނީ ރަޝީދު ކާޕެންޓްރީއާ ޙަވާލުކޮށްގެން ވިލިމާލޭގައެވެ.
މި ހައުސިންގ ޔުނިޓްތަކުގެ މަސައްކަތް އެއްކޮށް ނިންމާލުމަށް ހަމަޖެހިފައިވަނީ 2028 ވަނަ އަހަރުގެ ނިޔަލަށެވެ.
