އެސްޓީއޯގެ ސަބްސިޑަރީ ކުންފުނި މޯލްޑިވް ގޭހުން ވިއްކާ ކައްކާ ގޭހުގެ ސްޓޯރޭޖު އިތުރުކުރުމުގެ މަސައްކަތްތައް ކުރެވެމުންދާ ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.
މިނިސްޓަރު ޒަމީރު މި މޭރުމުން ވިދާޅުވީ ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ. ކައްކާ ގޭހުގެ ސްޓޯރޭޖް އިތުރުކުރުމުގެ މަސައްކަތް ކުރެވެމުންދާކަން ފާހަގަކުރައްވަމުން މިނިސްޓަރު ވިދާޅުވީ، އެ މަޝްރޫޢު ނިމުމުން ގާތްގަނޑަކަށް ދެ މަހާއި 15 ދުވަހުގެ މުއްދަތަށް ގޭހުގެ ސްޓޯރޭޖު މާލޭ ސަރަޙައްދުގައި ބެލެހެއްޓޭނެ ކަމަށެވެ.
”މި އަހަރަށް ބަލާއިރު ގޭހުގެ ދަތިކަން ކޮންމެހެން ފިލުވަންޖެހޭ، ގޭސް ގެންގުޅޭ ޓޭންކަރު ގެންގުޅުމަކީ އެހާ ފަސޭހަ ކަމެއްނޫން، ތެލުގެ ޓޭންކަރު އަޅުގަނޑުމެންނަށް އެބަ ގެންގުޅެވޭ މިހާރު ވެސް، މި އަހަރުގެ ތެރޭގައި ވެސް އެސްޓީއޯ އިން ވެސެލްއެއް ގަނެފި،“ މިނިސްޓަރު ޒަމީރު ވިދާޅުވިއެވެ.
މިނިސްޓަރު ޒަމީރު ވިދާޅުވީ، ގޭސް ރައްކާކުރުމާ ގުޅޭ މަޝްރޫޢުގެ ޕްރޮކިއުމަންޓު މަސައްކަތްތައް މިހާރު ފަށާފައިވާ ކަމަށް އެސްޓީއޯ އިން މަޢުލޫމާތު ދީފައިވާ ކަމަށެވެ. އަދި އެ މަޝްރޫޢު މި އަހަރުގެ ނިޔަލަށް އެއްކޮށް ނިންމާލުމަށް ތާވަލުކޮށްފައިވާ ކަމަށް ވެސް މިނިސްޓަރު ޒަމީރު ވިދާޅުވިއެވެ.
މީގެ އިތުރުން ރާއްޖެއަށް ކައްކާ ގޭސް ލިބުމުގައި އެއްވެސް ވަރެއްގެ ދަތިކަމެއް ނެތް ކަމުގެ ޔަޤީންކަން ދެއްވާ ކަމަށް މިނިސްޓަރު ޒަމީރު ވަނީ އިތުރަށް ވިދާޅުވެފައެވެ.
މޯލްޑިވް ގޭހުގައި އެއްފަހަރާ މިހާރު ރައްކާ ކުރެވެނީ 1،000 ޓަނުގެ ގޭހެވެ. މިކަމަށް ޙައްލެއް ހޯދުމުގެ ގޮތުން ސަރުކާރުން ތަރައްޤީކުރުމަށް ނިންމާފައިވަނީ 1،500 ޓަނުގެ ގޭސް ރައްކާކުރެވޭނެ ސްޓޯރެޖެކެވެ.
