މައި ދެ އިންތިޚާބު އެއްދުވަހެއްގައި ބޭއްވުމަށް އިދިކޮޅު އެމްޑީޕީއަށް ނިސްބަތްވާ ކުރީގެ ދެ ރައީސުން ކަމަށްވާ ރައީސް މުޙައްމަދު ނަޝީދާއި ރައީސް އިބްރާހިމް މުޙައްމަދު ޞާލިޙް ތާއީދުކުރައްވާފައިވާ ކަމަށް ކުރީގެ ބަންޑާރަ ނައިބު ފާޠިމަތު ދިޔާނާ ސަޢީދު ވިދާޅުވެއްޖެއެވެ.
ދިޔާނާ މި މޭރުމުން ވިދާޅުވީ، އެކްސްގައި ސްކްރީންޝޮޓްތަކަކާއެކު ޙިއްޞާކުރެއްވި ޕޯސްޓެއްގައެވެ. ދިޔާނާ ޙިއްޞާކުރެއްވި ސްކްރީންޝޮޓްތަކަކީ އެމްޑީޕީގެ ކުރީގެ ދެ ރައީސުން ކަމަށްވާ ރައީސް ނަޝީދާއި ރައީސް ޞާލިޙް އެކި ދުވަސްވަރު އެކި ތަންތަނުގައި، އިންތިޚާބުތައް އެއްދުވަހެއްގައި ބޭއްވުމަށް ތާއީދުކުރައްވައި ދައްކަވާފައިވާ ވާހަކަތަކަށް ރިޢާޔަތްކޮށް ނޫސްތަކުން ލިޔެފައިވާ ޚަބަރުތަކެއްގެ ސްކްރީންޝޮތްތަކެކެވެ.
އެގޮތުން 2020 ވަނަ އަހަރުގެ ޖަނަވަރީ 14 ވަނަ ދުވަހު ރައީސް ޞާލިޙް ހދ. ނޮޅިވަރަމަށް ވަޑައިގެން، އެ ރަށުގައި ބޭއްވި ހަރުގެ ޖަލްސާއެއްގައި ރިޔާސީ އިންތިޚާބާއި، ރައްޔިތުންގެ މަޖިލީހުގެ އިންތިޚާބުގެ އިތުރުން ލޯކަލް ކައުންސިލްތަކުގެ އިންތިޚާބު އެކުގައި ބޭއްވުމަކީ އެންމެ ރަނގަޅު ގޮތް ކަމަށްވާތީ، ތިން އިންތިޚާބު އެކުގައި ބޭއްވުމަށް ފެނިވަޑައިގަންނަވާ ކަމަށް ވިދާޅުވި ވިދާޅުވުމަށް ރިޢާޔަތްކޮށް ”ރާއްޖެ އެމްވީ“ އިން ލިޔެފައިވާ ޚަބަރުގެ ސްކްރީންޝޮޓް ދިޔާނާ ވަނީ ޙިއްޞާކުރައްވައިފައެވެ.
އެ ޖަލްސާގައި ރައީސް ޞާލިޙް ވިދާޅުވީ، ސަރުކާރުން ކުރިއަށް ގެންދިއުމަށް ނިންމާފައިވާ ތަރައްޤީގެ ބައެއް މަޝްރޫޢުތައް ފެށުމަށް ލަސްވެފައިވާ އެންމެ ބޮޑު އެއް ސަބަބަކީ އިންތިޚާބުތައް ވަކިވަކިން އޮންނަ އޮތުން ކަމަށެވެ. ނަމަވެސް ތިން އިންތިޚާބު އެކުގައި ބޭއްވިއްޖެނަމަ ޤައުމުގެ ތަރައްޤީއަށް އިތުރު ހަލުވިކަމެއް ލިބިގެންދާނެ ކަމަށް ރައީސް ޞާލިޙް ވަނީ އެ ޖަލްސާގައި ވިދާޅުވެފައެވެ.
މީގެ އިތުރުން ކުރީގެ ރައީސް މުޙައްމަދު ނަޝީދު، މައި ދެ އިންތިޚާބު އެއްދުވަހެއްގައި ބޭއްވުމަށް ފެނިވަޑައިގަންނަވާ ކަމަށް ވިދާޅުވެ އެކްސްގައި ޙިއްޞާކުރެއްވި ޕޯސްޓުގެ ސްކްރީންޝޮޓް ވެސް ދިޔާނާ ވަނީ ޙިއްޞާކުރައްވައިފައެވެ. އެގޮތުން ރައީސް ނަޝީދު މިދިޔަ ޖަނަވަރީ މަހު އެކްސްގައި ޚިއްޞާކުރެއްވި ޕޯސްޓެއްގައި ވިދާޅުވީ، ރިޔާސީ އިންތިޚާބާއި ރައްޔިތުންގެ މަޖިލިސް އިންތިޚާބު އެއްދުވަހެއްގައި ބޭއްވުމަކީ ރަނގަޅު ގޮތެއް ކަމުގައި ދެކެވަޑައިގަންނަވާ ކަމަށެވެ.
ނަމަވެސް މި ވާހަކަތައް އެ ދުވަހު ދެއްކެވި ދެ ބޭފުޅުންގެ ޚިޔާލު ބަދަލުވެ، ދެ ބޭފުޅުންގެ ރާގު މިއަދު މިވަނީ ބަދަލުވެފައެވެ. ގިނަ ބަޔަކު ބުނަމުން އަންނަ ގޮތުގައި، އެ ދެ ބޭފުޅުންގެ ވާހަކަތައް މިއަދު ބަދަލުވެފައި މިވަނީ ސިޔާސީ ވާދަވެރިކަމުގެ ތެރެއިން ކަމަށް ބެލެވޭ ކަމަށެވެ.
މައި ދެ އިންތިޚާބު އެއް ދުވަހެއްގައި ބޭއްވުމާ ގުޅޭގޮތުން އިދިކޮޅު އެމްޑީޕީން ދައްކަމުން ގެންދާ ދޮގު ވާހަކަތަކަށް މީގެ ކުރިންވެސް ދިޔާނާ ރައްދުދެއްވާފައިވެއެވެ. އެގޮތުން އިންތިޚާބުތައް ވަކިވަކިން ބޭއްވުމަކީ ރާއްޖޭގައި ފެއިލްވެފައި އޮތް ނިޒާމެއްކަން ޤަބޫލުކުރަންޖެހޭ ކަމަށާއި، އެކަން ބަދަލުކުރުމަށް، ދެ އިންތިޚާބު އެއް ދުވަހެެއްގައި ބާއްވައިގެން ނަމަވެސް އިތުރު ގޮތެއް ޓެސްޓު ކުރަންޖެހޭ ކަމަށް ދިޔާނާ ވިދާޅުވިއެވެ.
ރިޔާސީ އިންތިޚާބާއި ރައްޔިތުންގެ މަޖިލިސް އިންތިޚާބު އެއްދުވަހެއްގައި ބޭއްވުމަށް ރާއްޖޭގެ ގިނަ ސިޔާސީ ޕާޓީތަކުން ތާއީދުކޮށްފައިވީ ނަމަވެސް، އިދިކޮޅު އެމްޑީޕީއާއި ކުރީގެ ރައީސް ޢަބްދުﷲ ޔާމީންގެ ޕީއެންއެފްއިން އަންނަނީ އެކަމާ ދެކޮޅު ހަދަމުންނެވެ.
