ގ. ހިޔާރޯދި ގޭގައި އަލިފާން ރޯކޮށްލިކަމުގެ ތުހުމަތުގައި މީހަކު ހައްޔަރުކޮށްފިއެވެ.
މި މައްސަލައާ ގުޅިގެން ފުލުހުން މީޑިއާތަކަށް ފޮނުވި މެސެޖެއްގައި ބުނެފައިވަނީ، އެގޭގައި އަލިފާން ރޯކޮށްލިކަމުގެ ތުހުމަތުގައި ހައްޔަރުކޮށްފައި ވަނީ ޙުސައިން ޝަޙްބާން، ސަބުނަމް ހައުސް / ލ. މައިބާދޫ (29) ކަމަށެވެ.
ފުލުހުން ބުނީ، ޙުސައިން ޝަޙްބާން (29އ) ހައްޔަރުކޮށްފައިވަނީ ކޯޓު އަމުރެއްގެ ދަށުން 22 މާރިޗު 2026 ވަނަ ދުވަހުގެ ރޭގައި ކަމަށެވެ. މި މައްސަލައާ ގުޅިގެން އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން ކޯޓުން ވަނީ، އޭނާ ފަސް ދުވަހުގެ މުއްދަތަކަށް ބަންދު ކުރުމަށް އަމުރު ކޮށްފައެވެ.
މިކަމާ ގުޅޭ އެއްވެސް އިތުރު ތަފްޞީލެއް ހާމަކޮށްފައިނުވާއިރު، މި މައްސަލަ އިތުރަށް ތަޙުޤީޤުކުރަމުން ގެންދާ ކަމަށް ފުލުހުން ވަނީ ބުނެފައެވެ.
