އައްޑޫ ސިޓީގެ މިހާރުގެ ސިޓީ ކައުންސިލާއި މޭޔަރު އަލީ ނިޒާރުގެ އިހުމާލުގެ ސަބަބުން ވީރާނާވެފައިވާ އައްޑޫ ސިޓީ ލިންކް ރޯޑު މަރާމާތުކޮށް އެ މައްސަލައަށް ދާއިމީ ހައްލެއް ހޯދައި ދެއްވާނެ ކަމަށް ވެރިކަންކުރާ ޕީއެންސީގެ ފަރާތުން އައްޑޫ ސިޓީގެ މޭޔަރު ކަމަށް ވާދަކުރައްވާ ކެންޑިޑޭޓު މުޝްރިފް އަލީ ވިދާޅުވެއްޖެއެވެ.
މުޝްރިފްގެ ރަސްމީ ކެމްޕޭން އެކައުންޓުތަކުން މިއަދު އާންމުކުރި ވީޑިއޯއެއްގައި މުޝްރިފް ވަނީ އައްޑޫގެ ލިންކް ރޯޑު މިހާރު އޮތީ ބޭނުން ކުރަން އުނދުގޫ، ދެރަ ހާލަތެއްގައި ކަމަށް ވިދާޅުވެ އެތަން އެ ހާލަތަށް ދިޔައީ އެތައް އަހަރެއްގެ އިހުމާލުން ކަން ފާހަގަކުރައްވައިފައެވެ.
އައްޑޫ ސިޓީ ކައުންސިލަށް ދައުލަތުން އަހަރަކު 200 މިލިއަނެއްހާ ރުފިޔާގެ ބަޖެޓެއް ދެމުން ގެންދާއިރު ލިންކް ރޯޑަށް ދިމާވެފައިވާ މައްސަލަތައް ހައްލުކޮށް، މަރާމާތު ކުރުމުގެ އެކަށީގެންވާ އެއްވެސް މަސައްކަތެއް ކައުންސިލްގައި ހިނގަމުންދާ ދައުރުގެ ތެރޭގައި ކުރެވިފައި ނުވާ ކަމަށް އޭނާ ވިދާޅުވިއެވެ.
ކައުންސިލުން އަންގާ މަސައްކަތްތައް ކުރުމަށް އައްޑޫގައި ގާއިމުވެ 50 އަށްވުރެ ގިނަ މުވައްޒަފުން ތިބިއިރު، އަހަރަކު 20 ވަރަކަށް ފީފާގެ ތާރު ގަނެގެން ލިންކްރޯޑުގެ މަރާމާތު ކުރެވެން އޮތް ނަމަވެސް ކައުންސިލުން މިހާތަނަށް އެކަން ކޮށްފައެއް ނުވެއެވެ.
ނަތީޖާއަކަށް ވެގެންގޮސްފައިވަނީ 23 އަހަރު ކުރިން ތަރައްގީ ކުރި ލިންކްރޯޑު ބޭނުންކުރަން ދަތި މިންވަރަކަށް ހަލާކުވެ އެކަމުގެ ސަބަބުން ސިއްހީ ގޮތުން އަދި މާލީ ގޮތުން އައްޑޫގެ ގިނަ ބަޔަކަށް މެދުކެނޑުމެއްނެތި ގެއްލުން ވަމުން ދިޔުމެވެ.
”މިކަހަލަ މަޝްރޫއުތަކަށް ހަދާފައި ހުންނަ އެގްރިމެންޓުތަކުގައި އަބަދުވެސް އޮންނާނެ އެ މީހުންގެ ފަރާތުން ލިބޭ ގެއްލުންތައް ފޫބެއްދޭނެ ފަދަ ކޮންމެވެސް ކްލޯޒް އެއް. އެހެންވީމަ އަޅުގަނޑުމެން ސުވާލުކުރަން އެބަޖެހޭ މި މަޝްރޫއުގެ އެއްބަސްވުމުގައި އެހެން އޮތްތޯ،“ މުޝްރިފު ވިދާޅުވިއެވެ.
ލިންކް ރޯޑު މިހާރު އޮތް ވަރަށް ވީރާނާވެ ހަލާކުވެގެން ދިޔައީ މިދިޔަ ސަރުކާރުގެ ދުވަސްވަރު އައްޑޫގައި ކުރިއަށް ގެންދިޔަ މަގު ހެދުމުގެ މަޝްރޫއަށް، އިންޑިއާގެ އެފްކޮންސް ކުންފުނިން ބޭނުންކުރި ހެވީ ވެހިކަލްތައް ދުއްވުމަށް އެ މަގު ބޭނުންކުރުމުގެ ސަބަބުން ކަން މުޝްރިފް ހަނދާންކޮށްދެއްވިއެވެ.
