ބޯހިޔާވަހިކަމުގެ މަޝްރޫޢަކުން ޖާގަލިބި، ދަޢުލަތަށް ދޫކޮށްލަންޖެހޭ ބިންކޮޅު ދޫކޮށްލަން ނުޖެހޭގޮތަށް ބޯހިޔާވަހިކަމުގެ އުޞޫލު އިޞްލާޙުކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މި މޭރުމުން ވިދާޅުވީ، ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ރާއްޖޭގައި ހިނގަމުންދާ އެކި ކަންކަމާއި، އަދި ކުރިއަށް އޮތްތަނުގައި ސަރުކާރުން އެކި ކަންކަމުގައި އަޅަން ނިންމާފައިވާ ފިޔަވަޅުތަކާ ބެހޭގޮތުން ނޫސްވެރިންނަށް މަޢުލޫމާތު ދެއްވަމުންނެވެ.
ބޯހިޔާވަހިކަމުގެ ސްކީމުން އެޕްލިކޭޝަން ހުށައެޅުމުގެ ފުރުޞަތު މިހާރުވެސް ހުޅުވާލާފައިވާކަން ފާހަގަކުރައްވަމުން ރައިސް ވިދާޅުވީ، އަންނަ އޭޕްރީލް މަހުގެ ނިޔަލަށް އެކަން ކުރިޔަށްދާނެ ކަމަށެވެ. މީގެ އިތުރުން ބޯހިޔާވަހިކަމުގެ މަޝްރޫޢަކުން ޖާގަލިބި ދަޢުލަތަށް ދޫކޮށްލަންޖެހޭ ބިންކޮޅާބެހޭ ތަފްޞީލުތައް މިއަދު ނުވަތަ މާދަމާގެ ވަގުތެއްގައި ގެޒެޓުކުރައްވާނެ ކަމަށްވެސް އެމަނިކުފާނު ވަނީ ވިދާޅުވެފައެވެ.
މިހާރު އޮންނަގޮތުން 400 އަކަފޫޓަށްވުރެ ކުޑަ ބިންކޮޅެއް އޮތިއްޔާ ދަޢުލަތަށް އެ ބިންކޮޅު ދޫކޮށްލަންޖެހޭ ކަމަށާއި ނަމަވެސް އެ އުޞޫލު ބަދަލުކުރާނީ އެ މީހާގެ އަނބިމީހާ ނުވަތަ ފިރިމީހާގެ އިތުރުން ދަރިން ނުވަތަ އެއްބަނޑު އެއްބަފާ މީހުންގެ ތެރެއިން އެ މީހަކު ބޭނުންވާ މީހަކަށް ދޫކޮށްލެވޭ ގޮތަށް ކަމަށާއި ދަޢުލަތަށް އެ ބިން ދޫކޮށްލަން ނުޖެހޭނެ ކަމަށް އެމަނިކުފާނު ވިދާޅުވިއެވެ.
މީގެ އިތުރުން ނިމިދިޔަ ސަރުކާރުން ހިންގި ބިންވެރިޔާ ސްކީމްގެ ފަރާތްތަކާއި މިދިޔަ ސަރުކާރުން ފެށިގެން އައިސް މި ސަރުކާރުގައި ފްލެޓް ޙަވާލުކުރެވުނު ފަރާތްތަކަށްވެސް މި އުޞޫލު ހިނގާނެކަން ފާހަގަކުރައްވަމުން ރައީސް ވިދާޅުވީ، ދަޢުލަތަށް ދޫކޮށްލަންޖެހޭނީ ސަރުކާރުން ދީފައިވާ ސޯޝަލް ހައުސިންގ ފްލެޓެއް ދޫކޮށްލާފައި ދާންޖެހޭ ޙާލަތެއްގައި އެ ފްލެޓެއް ކަމަށެވެ.
ރައީސް މުޢިއްޒު ވިދާޅުވީ، ޖޮއިންޓް އެޕްލިކޭޝަންގެ ތެރެއިން ގޯތި ލިބިފައިވާ ފަރާތްތަކުގެ ތެރެއިން، މުޅިގޯތި އެއްކޮށް ދޫކޮށްލާފައި ހުރިހާ ފަރާތްތަކުން އަލުން އެޕްލައިކޮށްގެން ގޯތި ލިބިފައިވާނަމަ، އެ ފަރާތްތަކުން އެ ބިން ދަޢުލަތަށް ދޫކޮށްލަން ޖެހޭނެ ކަމަށެވެ. ހަމައެއާއިއެކު ލާޖައްސާ އުޞޫލުން ބިން ދޫކޮށްލާ ކެޓެގަރީން ދޫކޮށްލާ މުޅި ގޯތިވެސް ދަޢުލަތަށް ދޫކޮށްލަން ޖެހޭނެ ކަމަށްވެސް އެމަނިކުފާނު ވަނީ ވިދާޅުވެފައެވެ.
