ސަރުކާރުން ފަށަން ނިންމާފައިވާ ޓެކްސީ ލައިންގެ ޚިދުމަތަށް ބޭނުންވާ ޑްރައިވަރުން ހޯދުމަށް މިއަދު ވޯކް-އިން އިންޓަވިއުއެއް ކުރިއަށް ގެންދިޔުމަށް މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ނިންމައިފިއެވެ.
އެމްޓީސީސީން ކުރިއަށްގެންދާ މި ވޯކް-އިން އިންޓަވިއު ކުރިއަށްދާނީ މާފަންނު ބަސް ޓަރމިނަލުގައި މިއަދު ހެނދުނު 10:00 އިން ފެށިގެން ހަވީރު 16:00 އާއި ހަމައަށެވެ.
މިއީ ސަރުކާރުގެ ޓެކްސީ ލައިންގެ ޚިދުމަތަށް ބޭނުންވާ ޑްރައިވަރުން ހޯދުމަށް އެމްޓީސީސީން ކުރިޔަށްގެންދާ މިފަދަ ދެވަނަ ވޯކް-އިން އިންޓަވިއުއެވެ. އެ ކުންފުނިން ވަނީ މި އަހަރުގެ ޖަނަވަރީ މަހުގެ ތެރޭގައިވެސް މިފަދަ ވޯކް-އިން އިންޓަވިއުއެއް ކުރިއަށް ގެންގޮސްފައެވެ. އެގޮތުން އެ އިންޓަވިއުގައި 250 އަށްވުރެ ގިނަ ފަރާތަކުން ވަނީ ބައިވެރިވެފައެވެ.
ސަރުކާރުން ފަށަން ނިންމާފައިވާ ޓެކްސީ ލައިންގެ ޚިދުމަތުގައި، ޕާޓްޓައިމްކޮށް އަދި ފުލްޓައިމްކޮށް މަސައްކަތް ކުރާނެ ޑްރައިވަރުން ހޯދުމަށް ވަނީ ހަމަޖެހިފައެވެ. މި ޚިދުމަތް ދިނުމަށްޓަކައި ޖުމްލަ 407 ޑްރައިވަރުން ބޭނުންވާއިރު، އޭގެ ތެރެއިން 285 ޑްރައިވަރުން ހޯދަނީ، ފުލްޓައިމްކޮށް މަސައްކަތް ކުރާ ގޮތަށެވެ. ބާކީ 122 އެއްހައި ޑްރައިވަރުން ހޯދަނީ، ޕާޓްޓައިމްކޮށް މަސައްކަތް ކުރާ ގޮތަށެވެ.
ސަރުކާރުން ޓެކްސީ ލައިނެއް ފަށަން ނިންމާފައިވަނީ، މާލޭ ސިޓީގައި ޓެކްސީގެ ޚިދުމަތްދޭ ބައެއް ފަރާތްތަކުން ކަންކަން ކުރަމުން އަންނަ ގޮތުގެ ސަބަބުން ރައްޔިތުން އެކަމާ ޝަކުވާ ކުރަމުން އަންނަ ދަނޑިވަޅެއްގައިކަން ފާހަގަކޮށްލެވެއެވެ.
