ޔަހޫދީ ދަޢުލަތާއި އެމެރިކާ އިސްވެ އީރާނަށް ދިން ހަމަލާތަކާ ގުޅިގެން، އީރާނުން ހުރްމުޒް ކަނޑު އޮޅި ބަންދުކުރުމުގެ ސަބަބުން، ދުނިޔޭގެ ބާޒާރުގައި ތެލުގެ އަގުތައް މައްޗަށް ގޮސްފައިވާ މި ދަނޑިވަޅުގައި، ތެލުގެ އަގަށް އިތުރު އެއްވެސް ބަދަލެއް ގެނައުމުގެ ވިސްނުމެއް ސަރުކާރުގެ ނެތް ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.
މިނިސްޓަރު ޒަމީރު މި މޭރުމުން ވިދާޅުވީ މެދުއިރުމަތީގެ ހަނގުރާމައާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އުފައްދާފައިވާ މިނިސްޓަރުންގެ ޙާއްޞަ ކޮމެޓީން މިއަދު ރައީސުލްޖުމްހޫރިއްޔާގެ އޮފީހުގައި ކުރިއަށްގެންދާ ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ. މިނިސްޓަރު ޒަމީރު ވިދާޅުވީ، ދުނިޔޭގެ ބާޒާރުގައި ތެލުގެ އަގު އުފުލިފައިވާކަމީ އެންމެންވެސް ދަންނަ ޙަޤީޤަތެއް ކަމަށާއި ނަމަވެސް، ތެލުގެ އަގަށް އެއްވެސް ބަދަލެއް ގެނައުމުގެ ވިސްނުމެއް ސަރުކާރުގެ ނެތް ކަމަށެވެ.
ބައެއް ދާއިރާތަކަށާއި، އާންމުންނަށް ދިމާވެދާނެ ދަތިތަކަށް ބަލައި، އެ ދާއިރާތަކުން ތެލުގެ އަގު ބޮޑުނުކޮށް ސަބްސިޑައިޒްކޮށްގެން ވިއްކަމުން ގެންދާ ކަމަށާއި، އޭގެ ތެރޭގައި، މަސްވެރިންނާއި، މާލޭގައި ޕެޓްރޯލް ޕަމްޕުން ތެޔޮ ގަންނަ ފަރާތްތައް ހިމެނޭ ކަމަށް މިނިސްޓަރު ޒަމީރު ވަނީ ވިދާޅުވެފައެވެ. މީގެ އިތުރުން އެކަށީގެންވާ ވަރަށް ތެލުގެ ސްޓޮކް ރާއްޖޭގައި އެބަހުރި ކަން ފާހަގަކުރައްވަމުން މިނިސްޓަރު ޒަމީރު ވިދާޅުވީ، ތެލުގެ ޝިޕްމަންޓްތައް ގެނައުމުގެ މަސައްކަތްތައް ވެސް ކުރިއަށްދާ ކަމަށެވެ. އެގޮތުން މި ފަހުން ރާއްޖެއަށް ގެނައި ތެލުގެ ޝިޕްމަންޓަށް މިނިސްޓަރު ވަނީ އަލިއަޅުއްވާލައްވައިފައެވެ. އަދި އަންނަ އޭޕްރީލް މަހުގެ ތެރޭގައިވެސް ތެލުގެ އިތުރު ޝިޕްމަންޓްތަކެއް ރާއްޖެއަށް އަންނާނެ ކަމުގެ ޔަޤީންކަން މިނިސްޓަރު ޒަމީރު ވަނީ ދެއްވައިފައެވެ.
”އޭޕްރިލް ދޭއް ނުވަތަ ތނެއް ހިސާބުގައި އަަންނާނެ ސިންގަޕޫރުން ބަރުކޮށްގެން އަންނަ އުޅަނދެއް، އޭގައިވެސް ޑީސަލް އާއި ޕެޓެރޯލް ހުންނާނެ، އަދި އޭޕްރިލް ހަތަރެއް ނޫނީ ފަހެއް ހިސާބުގައި އޮމާންގެ ސޮހާރުން ބަރުކޮށްގެން އަންނަ، އަޅުގަނޑުމެންގެ ސްޕޮޓުން ހަޔާކޮށްގެން އަންނަ ވެސަލް އެބަ އާދޭ، އެހެންވީމަ ދުވަހުން ދުވަހަށް ބޭނުންވާނެ ތެޔޮ އިރާދަކުރެއްވިއްްޔާ އެބަހުރި،“ – މިނިސްޓަރު ޒަމީރު ވިދާޅުވިއެވެ.
މެދުއިރުމަތީގައި މިހާރު ހިނގަމުންދާ ހަނގުރާމައިގެ ސަބަބުން ބައިނަލްއަޤްވާމީ ތެލުގެ ބާޒާރަށް އައި ލޮޅުންތަކާ ގުޅިގެން، ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ވިއްކާ ތެލުގެ އަގު ވަނީ ބޮޑުކޮށްފައެވެ. އެގޮތުން ކުރިން 13.50 ރުފިޔާއަށް ވިއްކަމުންދިޔަ ޕެޓްރޯލް ލީޓަރެއް މިހާރު ވިއްކަނީ 16.01 ރުފިޔާއެވެ. މިއީ ލީޓަރަކުން 2.51 ރުފިޔާ ނުވަތަ ގާތްގަނޑަކަށް 18.6 އިންސައްތައިގެ އިތުރުވުމެކެވެ. ހަމައެހެންމެ، ކުރިން 13.92 ރުފިޔާއަށް ވިއްކި ޑީސަލް ލީޓަރެއް އަގު މިހާރު ވަނީ 17.54 ރުފިޔާއަށް އުފުލިފައެވެ. މިއީ ލީޓަރަކުން 3.62 ރުފިޔާ ނުވަތަ ގާތްގަނޑަކަށް 26 އިންސައްތައިގެ އިތުރުވުމެކެވެ.
ޙާލަތު މިހެން އޮތް ނަމަވެސް ދުނިޔޭގެ ބާޒާރުގައި ތެޔޮ ވިއްކާ އަގުތަކާ އަޅައިބަލާއިރު ރާއްޖެއިން މިހާރުވެސް ތެޔޮ ވިއްކަނީ ހެޔޮ އަގުތަކެއްގައެވެ.
