ސަރުކާރު ހިނގަމުންދާގޮތް ރަނގަޅު ކަމަށާއި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް ފުރިހަމައަށް އިތުބާރުކުރައްވާ ކަމަށް މާލޭ ސިޓީގެ ފުރަތަމަ މޭޔަރު ސަރަނގު އާދަމް މަނިކު ވިދާޅުވެއްޖެއެވެ.
ސަރަނގު އާދަމް މަނިކު މި މޭރުމުން ވިދާޅުވީ، ޕީއެންސީން މިއަދު ކުރިއަށްގެންދިޔަ ދޮރުން ދޮރަށް ހަރަކާތުގައި ބައިވެރިވެވަޑައިގެން، މީޑިއާތަކަށް ދެއްވި އިންޓަވިއުއެއްގައެވެ. ސަރަނގު އާދަމް މަނިކު ވިދާޅުވީ، އޭނާ އެމްޑީޕީގެ މެންބަރެއްގެ ގޮތުގައި ހުންނެވި ނަމަވެސް ރައީސް މުޢިއްޒުއަށް ފުރިހަމައަށް އިތުބާރުކުރައްވާ ކަމަށެވެ.
އަޅުގަނޑު މިހުންނަނީ ބައްލަވާ އެމްޑީޕީގައި، އެކަމު އިންތިޚާބުވުމުގެ ކުރިންވެސް އަދި އިންތިޚާބުވުމުގެ ފަހުންވެސް އަޅުގަނޑުމެން ދެ މީހުންގެ ދެމެދުގައި އޮންނަ ގާތް ކަމަކަށް އެއްވެސް ބަދަލެއް ނާދޭ، ދެން މީހުން ފާޑުފާޑު ވާހަކަދައްކާނެ، ރައީސް މުޢިއްޒުއަކީ މިވެނި ކަހަލަ މީހެކޭ، އެއީ ދެން އެ މީހުންގެ އަމިއްލަ ޚިޔާލުތާ،“ – ސަރަނގު އާދަމް މަނިކު ވިދާޅުވިއެވެ.
ވޭތުވެދިޔަ ދެ އަހަރެއްހައި ދުވަހުގެ ތެރޭގައި ރައީސް މުޢިއްޒު ގޯސްކޮށް އެއްވެސް ކަމެއް ކުރައްވާފައިނުވާކަން ފާހަގަކުރައްވަމުން ސަރަނގު އާދަމް މަނިކު ވިދާޅުވީ، މިހާރު ދިވެހިންނަށް ދިމާވެފައިވާ ގިނަ މައްސަލަތަކަކީ ވަކިން ޚާއްޞަކޮށް ދަރަނިތަކަކީ ރައީސް މުޢިއްޒު އުފައްދަވައިގެން އުޅުއްވާ މައްސަލަތަކެއް ނޫން ކަމަށެވެ.
”މި ދަރަނިތަކާއި އަޅުގަނޑުމެންނަށް ހިނގައިނުގަނެވޭ ކަހަލަ ބޮޑެތި އަޅުގަނޑުމެންގެ ދަރިންގެ ދަރިންވެސް ސަލާމަތް ނުވާ ހިސާބުގައި ހުރި ބޮޑެތި ދަރަނިތަކަކީ ރައީސް މުޢިއްޒު އުފެއްދެވި ދަރަނިތަކެއްތޯ؟، ނޫން އަޅުގަނޑުމެން ހަނދާންވެސް ބަލީއޭ އިނގޭތޯ، ކޮވިޑުގެ ތެރޭގައިވެސް ތިބޭފުޅުންނަށް އަޑުއިވޭނެ ކިހިނެއްތޯ ކޮވިޑަށް ލިބުނު ލާރިތަކާ އެއްޗިއްސަށް ވެގެން ދިޔައީ، އެކަހަލަ އަޑެއްވެސް ރައީސް މުޢިއްޒުގެ ފަރާތަކުން ނީވޭ، – ސަރަނގު އާދަމް މަނިކު ވިދާޅުވިއެވެ.
މިއަދު ރައްޔިތުން ކުރިމަތިލާންޖެހިފައިވާ ދަތިތަކަކީ، މީގެ ކުރީގެ ސަރުކާރުތަކުން އުފައްދާފައިވާ ދަރަނިތަކުގެ ސަބަބުން ކުރިމަތިލަންޖެހިފައިވަ ދަތިކަން ކަމަށާއި، މިކަން ހުރިހާ ދިވެހިންނަށް ދަންނަންޖެހޭ ކަމަށް ސަރަނގު އާދަމް މަނިކު ވިދާޅުވިއެވެ.
ފާހަގަކޮށްލަންޖެހޭ ގޮތުގައި ޕީއެންސީން މިއަދު ކުރިއަށްގެންދިޔަ ދޮރުން ދޮރަށް ހަރަކާތުގައި ސަރަނގު އާދަމް މަނިކު ވަނީ، ކުރިއަށް އޮތް ލޯކަލް ކައުންސިލްތަކުގެ އިންތިޚާބުގައި ޕީއެންސީގެ ފަރާތުން މާލޭ ސިޓީގެ މޭޔަރު ކަމަށް ވާދަކުރައްވާ މޫސާ ޢަލީ ޖަލީލަށް ތާއީދުކުރައްވާކަން ވެސް ހާމަކުރައްވައިފައެވެ.
މީނާގެ ބޮޑު އެދުމެއް ފޮރުވިފައި އެބައޮތް