ސިނަމާލެ އަދި މާލެހިޔާ ފުލެޓުތަކާއި ލިފްޓުތައް މަރާމާތުކޮށް ބެލެހެއްޓުމުގެ މަސައްކަތް ކޮށްދޭނެ ބަޔަކު ހޯދުމަށް މާލެ ސިޓީ ކައުންސިލުން ރޭ އިޢުލާންކޮށްފިއެވެ.
މާލޭ ސިޓީ ކައުންސިލުން ކޮށްފައިވާ މި އިޢުލާނުގައި ބުނެފައިވަނީ، ސިނަމާލެ އަދި މާލެހިޔާގެ ފުލެޓުތައް އެއް އަހަރު ދުވަހުގެ މުއްދަތަށް މަރާމާތުކޮށް ބަލަހައްޓައިދޭނެ ބަޔަކު ބޭނުންވާ ކަމަށާއި މި މަސައްކަތަށް ޝައުޤުވެރިވާ ފަރާތްތަކުން އަންނަ ބުރާސްފަތި ދުވަހު މަޢުލޫމާތު ސާފުކުރުމަށްފަހު، އަންނަ އޭޕްރީލް މަހުގެ ހަވަނަ ދުވަހު މަސައްކަތުގެ އަގު ހުށަހަޅަންޖެހޭނެ ކަމަށެވެ.
ހަމައެހެންމެ އެ ފުލެޓުތަކުގެ ލިފްޓުތައް މަރާމާތުކޮށް ސަރވިސްކޮށްދޭނެ ފަރާތްތަކުންވެސް ބީލަން ހުށަހެޅުމުގެ ފުރުޞަތު މާލޭ ސިޓީ ކައުންސިލުންވަނީ ހުޅުވާލައިފައެވެ. މާލޭ ސިޓީ ކައުންސިލުގެ އިޢުލާނުގައިވާ ގޮތުން ލިފްޓުތައް މަރާމާތުކޮށް ސަރވިސް ކުރުމަށް ޝައުގުވެރިވާ ފަރާތްތަކުން ވެސް އަންނަ ބުރާސްފަތި ދުވަހު މަޢުލޫމާތު ސާފުކުރުމަށްފަހު، އަންނަ މަހުގެ ފަސްވަނަ ދުވަހު މަސައްކަތުގެ އަގު ހުށަހަޅަންޖެހޭނެއެވެ.
ސިނަމާލެ އަދި މާލެހިޔާ ފުލެޓުތަކާއި އެ ފުލެޓްތަކުގެ ލިފްޓުތައް މަރާމާތުކޮށްދޭނެ ބަޔަކު ހޯދުމަށް ސިޓީ ކައުންސިލުން އިޢުލާންކޮށްފައިވީ ނަމަވެސް، މީގެ ކުރިން މާލޭ ސިޓީގެ މޭޔަރުކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުންނެވި ދުވަސްވަރު ވަނީ އެ ޢިމާރާތްތައް ތަޅައިލުމަށްފަހު، އެ ސަރަޙައްދުގައި އައު ޢިމާރާތްތަކެއް ތަރައްޤީކުރުމަށް ނިންމަވައިފައެވެ. ނަމަވެސް އެކި ސަބަބުތަކާ ހުރެ އެ މަސައްކަތް ވަނީ ފެށޭ ގޮތް ނުވެފައެވެ.
މީގެ އިތުރުން، ރައީސް މުޢިއްޒު ވަނީ، ސިނަމާލެ އަދި މާލެހިޔާ ފުލެޓުތަކުގައި ދިރިއުޅޭ ފަރާތްތަކުން ދައްކަންޖެހި ނަމަވެސް ނުދެއްކި ހުރި ޖޫރިމަނާތައް ވެސް މަޢާފުކޮށްދެއްވައި އެ ފުލެޓްތަކުގެ ވެރިންނަށް ޚާއްޞަ އެލަވަންސެއް ދެއްވުމަށް ވެސް ނިންމަވައިފައެވެ.
