އެމެރިކާ އާއި އިސްރާއީލުން އީރާނާ ދެކޮޅަށް ކުރަމުންދާ ހަނގުރާމަ ދާއިމީކޮށް، އެއްކޮށް ނިމުމަކަށް ގެންނަން ޖެހޭ ކަމަށް އީރާން ހާރިޖީ ވަޒީރު އައްބާސް އަރަގްޗީ ވިދާޅުވެއްޖެއެވެ.
މިދިޔަ ފެބްރުއަރީ މަހުގެ 28 ގައި އެމެރިކާ އިން ޔަހޫދީންނާއި ގުޅިގެން އީރާނަށް ހަމަލާދޭން ފެށީވެސް، އީރާނުން ނިއުކްލިއާ މަސައްކަތްތައް ހުއްޓާނުލައިފިނަމަ ހަމަލާދޭނެ ކަމުގެ އިންޒާރު ދެމުން ދިޔަ ދަނޑިވަޅެއްގައެވެ.
ހަނގުރާމަ މިހާރު އިތުރަށް ހޫނުވަމުން އަންނަ ދަނޑިވަޅެއްގައި ޖަޕާނުގެ ކިޔޯޑޯ ނިއުސް އަށް ދެއްވި އިންޓަވިއުއެއްގައި އަރަގްޗީ ވިދާޅުވީ އެމެރިކާ އާއި އިސްރާއީލުން އީރާނާ ދެކޮޅަށް ހިނގަމުންދާ ހަނގުރާމަ ހުއްޓާލުމަށް ވުރެ، އިތުރަށް ހަނގުރާމަަ ކުރިއަށް ނުގެންދާނެ ކަން ކަށަވަރު ކުރަން ބޭނުންވާ ކަމަށެވެ.
”އަޅުގަނޑުމެންގެ މެސެޖަކީ މި ހަނގުރާމައަކީ އަޅުގަނޑުމެން ފެށި ހަނގުރާމައެއް ނޫން. މިއީ އަޅުގަނޑުމެންނަށް އަމާޒުކޮށް ފެށި ހަނގުރާމައެއް. އަޅުގަނޑުމެންގެ އެމެރިކާއާ މަޝްވަރާ ކުރަމުން ދަނިކޮށް، އެ މީހުން އަޅުގަނޑުމެންނަށް ހަމަލާ ދޭން ނިންމީ. މިއީ ފާޅުކަން ބޮޑު އަނިޔާވެރި އަމަލެއް. ގާނޫނާ ހިލާފު، އިންސާފުވެރި އަދި ނުހައްގު އަމަލެއް،“. އަރަގްޗީ ވިދާޅުވިއެވެ.
އީރާނުން މަސައްކަތް ކުރަމުން ދަނީ ހަމައެކަނި އަމިއްލަ ދިފާއުގައި ކަމަށާއި ކޮންމެ ހާލެއްގައިވެސް ނަފްސު ދިފާއުކުރުމުގައި ދެމިތިބޭނެ ކަމަށް އޭނާ ވިދާޅުވިއެވެ.
”އަމިއްލަ ނަފްސު ދިފާއު ކުރުމުގައި އަޅުގަނޑުމެން ކޮންމެ ފަދަ ހާލެއްގައިވެސް ދެމި ތިބޭނަން، އަޅުގަނޑުމެންގެ ވިސްނުމަކީ، އަދި އަޅުގަނޑު ތަކުރާރުކޮށް ދަންނަވާލަން ބޭނުންވާ ވާހަަކައަކީ މިދިޔަ އަހަރުގެ ހާލަތު ތަކުރާރުވިޔަ ނުދިނުމަށް، ހަނގުރާމަ ހުއްޓާލުުން އެއީ އަޅުގަނޑުމެން ގަބޫލު ކުރާނެ ކަމެއް ނޫން ކަމަށް،“. އޭނާ ވިދާޅުވިއެވެ.
ހިނގަމުންދާ ހަނގުރާމަ ދާއިމީކޮށް ނިމުމަކަށް ގެންނަން ޖެހޭ ކަމަށާއި، މި ހާލަތު ތަކުރާރު ނުވާނެކަމުގެ ޔަގީންކަން އޮންނަން ޖެހޭ ކަމަށްވެސް އޭނާ ވިދާޅުވިއެވެ.
