ފިޠުރު ޢީދުގެ ބަންދު ދުވަސްތަކަށްފަހު، އަންނަ ހޯމަ ދުވަހު ސަރުކާރުގެ އޮފީސްތައް ހުޅުވޭނެ ކަމަށް ރައީސުލްޖުމްހޫރިއްޔާގެ އޮފީހުން ބުނެފިއެވެ.
މިކަމާ ގުޅިގެން ރައީސް އޮފީހުން ބުނެފައިވަނީ، ރަމަޟާން މަހުގެ ފަހުދިހައެއްގެ ދުވަސްތަކުގެ އިތުރުން ފިޠުރު ޢީދުގެ ތިން ދުވަހަށްފަހު ސަރުކާރުގެ އޮފީސްތައް ހުޅުވޭއިރު، ޝައްވާލް މަހުގެ ފުރުތަމަ ހަތް ދުވަހު މަސައްކަތް ކުރާނީ ހަތަރު ގަޑިއިރު ކަމަށެވެ.
ޝައްވާލް މަހުގެ ފުރަތަމަ ހަތް ދުވަހުގެ ރަސްމީ މަސައްކަތު ގަޑިއަކީ، އެހެން އަހަރުތަކެކޭވެސް އެއްގޮތަށް ހެނދުނު 09:00 އިން ފެށިގެން މެންދުރުފަހު 13:00 އާއި ހަމައަށް ކަމަށް ހިޖުރައިން 1443 ވަނަ އަހަރުން ފެށިގެން ހަމަޖައްސަވާފައިވުމާއެކު، މި ފެށޭ ހަފުތާގައި ސަރުކާރުގެ ރަސްމީ މަސައްކަތު ގަޑި ހަމަޖެހިފައިވަނީ، ހެނދުނު 09:00 އިން މެންދުރުފަހު 13:00 އަށް ކަމަށް ރައީސް އޮފީހުން ވަނީ ބުނެފައެވެ.
ފާހަގަކޮށްލެވޭ ގޮތުގައި، 2024 ވަނަ އަހަރުގެ ރަމަޟާން މަހުން ފެށިގެން، ކޮންމެ އަހަރެއްގެ ރަމަޟާން މަހުގެ 20 ވަނަ ދުވަހުން ފެށިގެން ފިޠުރު ޢީދު ދުވަހާއި ޢީދުގެ މުނާސަބަތުގައި ފާހަގަކުރާ ދެ ދުވަހުގެ ނިޔަލަށް ހިނގާ ދުވަސްތަކަކީ، ސަރުކާރު ބަންދު ދުވަސްތަކެއް ކަމަށް ރައީސުލްޖުމްހޫރިއްޔާ ވަނީ ކަނޑައަޅުއްވައިފައެވެ.
އެމަނިކުފާނު މިގޮތަށް ހަމަޖެއްސެވީ، އިސްލާމީ އުޞޫލުތައް ޤާއިމުކުރެއްވުމަށާއި، ދީނީ ކަންކަމަށް ރައްޔިތުން ލޯބި ޖެއްސުމާއި، ދީނީ ކަންކަމަށް އިސްކަން ދިނުމަށް ރައްޔިތުންނަށް ފުރުޞަތު ދެއްވުމުގެ ގޮތުންނެވެ.
