މައި ދެ އިންތިޚާބު ކަމަށްވާ ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްދުވަހެއްގައި ބޭއްވުމަށް ނިންމުމުގެ ކުރިން ރައްޔިތުންގެ ޚިޔާލު ހޯދުމަށް ނަގާ ފެންނަ ނުފެންނަ ވޯޓަކީ ”ޗައްކަރެއް“ ކަމަށް ބުނާ ފަރާތްތަކަށް ކުރީގެ ބަންޑާރަ ނައިބު ދިޔާނާ ސަޢީދު ވަރުގަދަ ރައްދެއް ދެއްވައިފިއެވެ.
ފެންނަ ނުފެންނަ ވޯޓަކީ ރައްޔިތުންގެ ގާތަށް ވެރިން އަންނަ އައުން މަދުކުރުމަށް ޖަހާ ”ޗައްކަރެއް“ ކަމަށް ބުނެ އަޙްމަދު ރަޝީދު ނަމަކަށް ކިޔާ ފަރާތަކުން އެކްސްގައި ޙިއްޞާކުރި ޕޯސްޓަކަށް ރައްދުދެއްވަމުން ދިޔާނާ ވިދާޅުވީ އޭނާގެ އެ ވާހަކަ ޤަބޫލުކުރަން ދަތި ކަމަށެވެ. ސަބަބަކީ ރައްޔިތުންނާ ގާތުން ޚިދުމަތް ލިބިދިނުން ފަހިކުރުމަށްޓަކައި ރާއްޖޭގެ ހިންގުން ޤާނޫނުއަސާސީ އާއި ޤާނޫނުން ލާމަރުކަޒުކުރެވި، ރައްޔިތުން އިންތިޚާބުކުރާ ކައުންސިލްތަކުގެ ދައުރު ފުޅާކުރެވި, ބާރުތައް ޑިވޯލްވްކުރެވުމުގެ އިތުރުން މިނިސްޓްރީތަކާ ދެމެދު ފާލަން އެޅިފައިވާ ކަމަށް ދިޔާނާ ވިދާޅުވިއެވެ.
Noon izzaiytheri akhu, thiya vaahakafulhu gaboolukuran dhathi. Sababakee rayyithunnaa gaathun khidumaiylibidhinun fahikurmattakaa Rajjeyge hingun vanee QA innaai qaanoonun laamarukazukurevi, rayyithun inthikhaabkuraa council thakuge dhauru fulhaakurevi baaruthah devolvekurevifa;… https://t.co/HZBCleS6zW
— Dhiyana ?🌹 (@dhiyanasaid) March 18, 2026
މީގެ އިތުރުން ރައްޔިތުންގެ އަޑު ވަގުތުން އިއްވޭނެ އެތައް ވަސީލަތެއް ޤާއިމުކުރެވިފައިވާކަން ފާހަގަކުރައްވަމުން ދިޔާނާ ވިދާޅުވީ، މިހާރު ނިޒާމުގައި އޮތް އެންމެ ބޮޑު މައްސަލައަކީ، ރައްޔިތުންގެ ބޭނުންތަކަށް އެދެވޭ ގޮތުގައި ވަކާލާތުކޮށްދޭނެ އަދި ސަރުކާރު ޖަވާބުދާރީ ކުރުވޭނެ ފެންވަރުގެ މަޖިލީހެއް އިންތިޚާބީ ނިޒާމުން ލިބިނުގަނެވި އޮތުން ކަމަށެވެ.
މައި ދެ އިންތިޚާބު އެއްދުވަހެއްގައި ބޭއްވުމުގެ ކުރިން އެކަމާ ގުޅޭ ގޮތުން ރައްޔިތުންގެ ޚިޔާލު ހޯދުމަށް ނެގުމަށް ހަމަޖެހިފައިވާ ފެންނަ ނުފެންނަ ވޯޓުން މަސައްކަތްކުރަނީ އެ ކަމަށް ޙައްލެއް ހޯދައިދިނުމަށް ކަމަށް ދިޔާނާ ވަނީ އިތުރަށް ވިދާޅުވެފައެވެ.
މައި ދެ އިންތިޚާބު އެއްދުވަހެއްގައި ބޭއްވުމަށް ތާއީދުކުރައްވާކަން ދިޔާނާ މީގެ ކުރިންވެސް ހާމަކުރައްވައިފައެވެ. އެގޮތުން މިހާރު މިއޮތް ސްޓެގާރޑް އިންތިޚާބީ ނިޒާމަކީ ރާއްޖޭގެ ކޮންޓެކްސްޓްގައި ފެއިލްވެފައި އޮތް ނިޒާމެއް ކަމަށާއި، ކަން މިހެން އޮތްއިރު ދެންހުރި އޮޕްޝަންސްތައް ނުވަތަ ގޮތްތައް ބެލުމަކީ ލާޒިމު ކަމެއް ކަމަށް މީގެ ކުރިން ދިޔާނާ ވަނީ ވިދާޅުވެފައެވެ.
