މައި ދެ އިންތިޚާބު ކަމަށްވާ ރިޔާސީ އިންތިޚާބާއި ރައްޔިތުންގެ މަޖިލިސް އިންތިޚާބު އެއްދުވަހެއްގައި ބޭއްވުމަށް ސަރުކާރުން ގެންގުޅޭ ވިސްނުމަށް ތާއީދުކުރާ ކަމަށް އަދާލަތު ޕާޓީން ބުނެފިއެވެ.
މިކަމާ ގުޅިގެން އެ ޕާޓީން އެކްސްގައި ޙިއްޞާކޮށްފައިވާ ޕޯސްޓެއްގައި ބުނެފައިވަނީ، ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްދުވަހެއްގައި ބޭއްވުމަށް ތާއީދުކުރާ ކަމަށެވެ.
ހަމައެހެންމެ، ރައްޔިތުންގެ މަޖިލީހުގެ ޢުމުރު ގުނުމުގެ އުޞޫލު ބަޔާންކުރުމަށްޓަކައި، ރައްޔިތުންގެ މަޖިލީހުން ފާސްކޮށްފައިވާ ”ޤާނޫނުއަސާސީއަށް 8 ވަނަ އިޞްލާޙު ގެނައުމުގެ ބިލު“ ތަޞްދީޤުކުރުމަށް، އަންނަ އެޕްރީލް މަހުގެ ހަތަރުވަނަ ދުވަހު ބާއްވާ ރައްޔިތުންގެ ޚިޔާލު ހޯދުމުގެ ވޯޓުގައި، ޤައުމާއި ރައްޔިތުންގެ މަޞްލަޙަތަށް ރިޢާޔަތްކޮށް، “ފެންނަކަމަށް” ވޯޓު ދެއްވުމަށް ތާއީދުކުރުމަށް ޢަދާލަތު ޕާޓީގެ މަޝްވަރާ މަޖިލީހުގެ އަޣުލަބިއްޔަތުން ފާސްކޮށްފައިވާ ކަމަށެވެ.
ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެކުގައި ބޭއްވުމަށާއި، ރައްޔިތުންގެ މަޖިލީހުގެ އުމުރު ގުނުމުގެ އުސޫލު ބަޔާންކުރުމަށް ޓަކައި، ރައްޔިތުންގެ މަޖިލީހުން ފާސްކުރައްވައިފައިވާ "ޤާނޫނުއަސާސީއަށް 8 ވަނަ އިޞްލާޙު ގެނައުމުގެ ބިލު" ތަޞްދީޤުކުރެއްވުމާމެދު، 4 އެޕްރީލް… pic.twitter.com/FVmUT5xZKi
— Adhaalath Party (@AdhaalathOffice) March 17, 2026
މައި ދެ އިންތިޚާބު އެއްދުވަހެއްގައި އެއްދުވަހެއްގައި ބޭއްވުމަށް ސަރުކާރުން ގެންގުޅޭ ވިސްނުމަށް ތާއީދު ކުރާ ކަމަށް އަދާލަތު ޕާޓީން ބުނެފައިވާއިރު ފާހަގަކޮށްލަންޖެހޭ ކަމަކީ، ރާއްޖޭގެ ގިނަ ސިޔާސީ ޕާޓީތަކަކުން ސަރުކާރުގެ މި ވިސްނުމަށް ތާއީދުކުރާކަން ވަނީ ހާމަކޮށްފައެވެ. އެގޮތުން މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ) އިން ވެސް ވަނީ ސަރުކާރުގެ ވިސްނުމަށް ތާއީދުކުރާ ކަމަށް ބުނެފައެވެ.
ފާހަގަކޮށްލަންޖެހޭ ގޮތުގައި މި ސަރުކާރު ގެނައުމަށް ރިޔާސީ އިންތިޚާބުގެ ދެވަނަ ބުރުގައި އެމްޑީއޭއިން އޭރު މަސައްކަތްތަކެއް ކޮށްފައިވެއެވެ. ނަމަވެސް، އެ ޕާޓީން ފަހުން ވަނީ ޕީއެންސީ ސަރުކާރުގެ ކޯލިޝަނުން ވަކިވެ ސަރުކާރަށް ވަރަށް ބޮޑަށް ފާޑު ކިޔައިފައެވެ. އޭގެ ފަހުން ސަރުކާރުގެ ނިންމުމަކަށް އެމްޑީއޭއިން ތާއީދުކުރި މިއީ ފުރަތަމަ ފަހަރެވެ.
މީގެ އިތުރުން ޖުމްހޫރީ ޕާޓީގެ ލީޑަރު އޮނަރަބަލް ޤާސިމް އިބްރާހިމް ވެސް ވަނީ ދެ އިންތިޚާބު އެއްދުވަހެއްގައި ބޭއްވުމަށް ސަރުކާރުން ގެންގުޅޭ ވިސްނުމަށް ފުރިހަމައަށް ތާއީދު ކުރައްވާކަން ހާމަކުރައްވައިފައެވެ. އެހެންކަމުން މައި ދެ އިންތިޚާބު އެއް ދުވަހެއްގައި ބޭއްވުމާ ދެކޮޅަށް މިހާރު ވާހަކަދައްކަނީ އިދިކޮޅު އެމްޑީޕީއާއި ކުރީގެ ރައީސް ޔާމީންގެ ޕީއެންއެފްއިންނެވެ.
މި ސަރުކާރުން މައި ދެ އިންތިޚާބު އެއްދުވަހެއްގައި ބާއްވަން ގެންގުޅޭ ވިސްނުމަށް އިދިކޮޅު އެމްޑީޕީން ދެކޮޅު ހެދި ނަމަވެސް މީގެ ކުރިން އެ ޕާޓީގެ ބައެއް އިސްވެރިން މިކަމަށް ތާއީދުކޮށް ވާހަކަދައްކާފައިވެއެވެ. އެގޮތުން ކުރީގެ ދެ ރައީސުން ކަމަށްވާ ރައީސް ނަޝީދާއި ރައީސް ޞާލިޙް ވެސް އޭގެ ތެރޭގައި ހިމެނެއެވެ.
މައި ދެ އިންތިޚާބު އެއް ދުވަހެއްގައި ބޭއްވުމާމެދު ގޮތް ނިންމުމަށް ރައްޔިތުންނަށް އެ ފުރުޞަތު ސަރުކާރުން ވަނީ ދޭން ނިންމައިފައެވެ. އެގޮތުން އެ ނިންމުން ރައްޔިތުން ނިންމާނީ އަންނަ އޭޕްރީލް މަހުގެ ހަތަރުވަނަ ދުވަހު ނެގުމަށް ހަމަޖެހިފައިވާ ފެންނަ ނުފެންނަ ވޯޓަކުންނެވެ.
