މެދުއިރުމަތީގައި އެމެރިކާއާއި އިސްރާއީލުން ދެމުން އަންނަ ހަމަލާތަކަށް މިހާރު ތިން ހަފްތާވެފައިވާއިރު އެ މީހުން ހަމަލާ އަމާޒުކޮށްފައިވާ އީރާނާއި ލުބުނާން ހިމެނޭ ގޮތަށް މެދުއިރުމަތީގެ ޤައުމުތަކަށް އިންސާނީ އެހީތެރިކަން ފޯރުކޮށްދޭނެ ކަމަށް ޗައިނާއިން ބުނެފިއެވެ.
އެމެރިކާ އާއި އިސްރާއީލަށް ދޭ ހަމަލާތައް ހުއްޓާލުމަށް އެ ޤައުމުން އިލްތިމާސްކޮށްފައިވާއިރު، އެމެރިކާގެ އަސްކަރީ މަރުކަޒުތައް ހުންނަ ގަލްފް ޤައުމުތަކަށް އީރާނުން ދެމުން އަންނަ ހަމަލާތަކަށް ވެސް އެ ޤައުމުން ވަނީ ފާޑުކިޔާފައެވެ.
ޗައިނާގެ ފޮރިން މިނިސްޓްރީގެ ތަރުޖަމާނު ލިން ޖިއާން ވިދާޅުވީ މި ހަނގުރާމައިގެ ސަބަބުން އީރާނާއި މެދުއިރުމަތީގެ އެހެން ގައުމުތަކަށް ”ބޮޑެތި އިންސާނީ ކާރިސާތަކެއް“ ކުރިމަތިވެފައިވާ ކަމަށެވެ.
”ޗައިނާއިން ވަނީ އީރާނާއި އުރުދުން، ލުބުނާން، އަދި އިރާގަށް ކުއްލި އިންސާނީ އެހީތެރިކަން ފޯރުކޮށްދިނުމަށް ނިންމާފައި. އުންމީދު ކުރެވެނީ މިއީ އާންމު އާބާދީތަކަށް ކުރިމަތިވެފައިވާ އިންސާނީ ދަތިކަން ކުޑަކުރުމަށް އެހީތެރިވެދޭނެ ކަމެއް ކަމަށް،“ އިތުރު ތަފްސީލެއް ނުދީ ލިން ވިދާޅުވިއެވެ.
