އީރާނުގެ ހަމަލާއަކާއި ގުޅިގެން ގަތަރުގެ މައި ގޭސް ފެސިލިޓީގައި ރޯވުމުން އީރާނުން ”ރަތް ރޮނގު“ ހުރަސްކޮށްފި ކަމަށް ޤަތަރުން ބުނެފިއެވެ.
ޤަތަރުގެ ވެރިރަށް ރަހުގެ ލަފާން ގޭސް ޕްލާންޓަށް އީރާނުން ދިން ހަމަލާއާ ގުޅިގެން އެ ޤައުމުގެ ފޮރިން މިނިސްޓްރީން ވަނީ މިކަން ކުށްވެރިކޮށް ބަޔާނެއް ނެރެފަ އެވެ.
ޤަތަރުގެ ބަޔާނުގައި ބުނީ އީރާނުން އާންމުންނާއި، އާންމު ތަންތަނަށް އަމާޒުކޮށް އެ ސަރަޙައްދުގެ ޤައުމުތަކަށް ދިން އަނިޔާވެރި ހަމަލާތަކުގެ ސަބަބުން ”ރަތް ރޮނގު“ ފަހަނައަޅައި ގޮސްފި ކަމަށެވެ.
”އީރާނުން އާންމުންނާއި އާންމު ތަންތަނަށް އަމާޒުކޮށް މި ސަރަހައްދުގެ ގައުމުތަކަށް ދިން އަނިޔާވެރި ހަމަލާތަކުގެ ސަބަބުން އެވަނީ ”ރެޑް ލައިން“ ފަހަނައަޅާފަ“ އެ ބަޔާނުގައި ބުނެފައިވެއެވެ.
މި ހަމަލާތަކުގެ ނަތީޖާއިން އެ ސަރަހައްދު ސަލާމަތް ކުރަން ޖެހޭ ކަމަށް ޤަތަރުގެ މިނިސްޓްރީން ނެރުނު ބަޔާނުގައި ވަނީ ބުނެފައެވެ. އަދި ސަރަހައްދީ އަދި ބައިނަލްއަޤުވާމީ ސަލާމަތާއި ހަމަޖެހުން އަލުން އިއާދަ ކުރުމަށް މަސައްކަތް ކުރަން އިސްކަންދޭ ކަމަށްވެސް ވަނީ ބުނެފައެވެ.
ޤަތަރުގެ މި ފެސިލިޓީއަށް އީރާނުން ދިނުމުގެ ކުރިން،އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ) އިން ވަނީ ސައުދީ އަރަބިއްޔާ، ގަތަރު އަދި އެކުވެރި އަރަބި އިމާރާތް (ޔޫއޭއީ)ގައި ހުންނަ ތެޔޮ ފެސިލިޓީތައް ކަައިރީގައި ދިރިއުޅޭ މީހުން އެތަންތަން ދޫކޮށް ރައްކާތެރި ސަރަހައްދަކަށް ދިއުމަށް އަންގައިފައެވެ.
ޤަތަރުގެ ހާރިޖީ ވުޒާރާއިން ނެރުނު ބަޔާނެއްގައި ބުނީ ރާސް ލަފާން އިންޑަސްޓްރިއަލް ސިޓީއަށް އީރާނުން ދިން އަނިޔާވެރި ހަމަލާތައް ހަރުކަށި އިބާރާތުން ކުށްވެރިކުރާ ކަމަށެވެ.
އަދި މިއީ އެ ގައުމުގެ ސިޔާދަތަށް އަރައިގަނެ، ގައުމީ ސަލާމަތަށް އޮތް ސީދާ ނުރައްކަލެއް ކަމަށްވެސް ބުނެފައި ވެެެއެވެ.
