ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއް ދުވަހެއްގައި ބޭއްވި ނަމަވެސް ދިވެހިރާއްޖޭގެ ތިން ބާރު ވަކިވެފައި އޮންނަ ދުސްތޫރީ ނިޒާމަށް އެއްވެސް ކަހަލަ ބަދަލެއް ނާންނާނެކަމަށް ބަނޑާރަ ނައިބު އަޙްމަދު އުޝާމް ވިދާޅުވެއްޖެއެވެ.
ބަންޑާރަ ނައިބު އުޝާމް މި މޭރުމުން ވިދާޅުވީ ދަޢުލަތުގެ މީޑިއާގެ ޕްރޮގްރާމެއް ކަމަށްވާ ”ރާއްޖެ މިއަދު“ ޕޮރޮގްރާމްގައި ވާހަކަ ދައްކަވަމުންނެވެ. އެ ޕްރޮގްރާމުގައި ވާހަކަދައްކަވަމުން އުޝާމް ވިދާޅުވީ، މައި ދެ އިންތިޚާބު އެއްދުވަހެއްގައި ބޭއްވުމުން ރާއްޖޭގެ އިންތިޚާބީ އޮނިގަނޑަށް ބަދަލެއް އައި ނަމަވެސް، މިއީ ރާއްޖޭގެ އަސާސީ ދުސްތޫރީ އޮނިގަނޑަށް ގެނެވޭ ބަދަލެއް ނޫންކަމަށެވެ.
ބައެއް ބޭފުޅުން އެބަ ޤަބޫލުކުރައްވާ މިއީ ދުސްތޫރީ ވަރަށް ބޮޑު ބަދަލެއް ކަމަށްވެސް، ބައެއް ބޭފުޅުން އެބަ ޤަބޫލުކުރައްވާ މިއީ އިންތިޚާބީ އޮނިގަނޑަށް އަންނަ ބަދަލެއް ކަމަށްވެސް، އަނެއްބައި ބޭފުޅުން ޤަބޫލުކުރައްވާ މިއީ ޤާނޫނީ ބަދަލެއް ކަމަށްވެސް، ދުސްތޫރީ އޮނިގަނޑަށް އަންނަ ބަދަލެއްތޯ އެ ކުރެވޭ ސުވާލުގެ ޖަވާބުގައި އަޅުގަނޑު ދެކޭގޮތުގައި މިއީ ދިވެހިރާއްޖޭގެ ދުސްތޫރީ ގެނެވޭ ބަދަލެއްނޫން، މި ބަދަލު މިހެން ގެނައިކަމުގައިވީ ނަމަވެސް ދިވެހިރާއްޖޭގެ ޤާނޫނުއަސާސީ ޤަބޫލުކޮށްފައޮތް އެންމެ މައިގަނޑު އެއް އަސާސަކީ ތިން ބާރު ވަކިވެފައި އޮންނަ ނިޒާމެއް ރާއްޖޭގައި އޮތުން، މި ބަދަލުގެނައި ކަމުގައިވީ ނަމަވެސް އެ ނިޒާމަކަށް އެއްވެސް ބަދަލެއް ނާދޭ،“ – އުޝާމް ވިދާޅުވިއެވެ.
ދެ އިންތިޚާބު އެއްދުވަހެއްގައި ބޭއްވުމާ ގުޅޭ ގޮތުން ބަންޑާރަ ނައިބު އުޝާމް ވިދާޅުވީ، މިހާރު ކަންކަން އޮންނަ ގޮތުން، ރިޔާސީ އިންތިޚާބު ނިމި ހަ މަސްދުވަސް ފަހުން މަޖިލިސް އިންތިޚާބު، އަދި އޭގެ އަހަރެއްހައި ދުވަސް ފަހުން އަނެއްކާ ކައުންސިލް އިންތިޚާބު ބާއްވަންޖެހޭ ކަމަށާއި މިކަމުގެ ސަބަބުން، ސަރުކާރަށް ރައްޔިތުންނަށް ޚިދުމަތް ކުރުމަށް ލިބޭ ފަސް އަހަރުގެ ދައުރުގެ ބޮޑުބައެއް ހޭދަވަނީ އިންތިޚާބީ ވާދަވެރިކަމުގެ ތެރޭގައި ކަމަށެވެ.
ބަންޑާރަ ނައިބު އުޝާމް ވިދާޅުވީ، މިކަމަށް ހައްލެއް ހޯދުމަށް ސިޔާސީ ޕާޓީތަކާއެކު ކުރެވުނު މަޝްވަރާތަކަށްފަހު، ޤާނޫނުއަސާސީއަށް އިޞްލާޙު ގެނައުމުގެ ބިލު މަޖިލީހުން ވަނީ ވަނީ ފާސް ކޮއްފައި ކަމަށާއި. އަދި އަންނަ އެޕްރީލް މަހުގެ ހަތަރު ވަނަ ދުވަހު އޮންނަ ލޯކަލް ކައުންސިލްތަކުގެ އިންތިޚާބާއެކު މިކަމަށް ރައްޔިތުންގެ ފެންނަ ނުފެންނަ ވޯޓު ނަގާނެ ކަމަށެވެ.
އުޝާމް އިތުރަށް ވިދާޅުވީ، މި ބަދަލު އަތުވެއްޖެނަމަ ރައީސުލްޖުމްހޫރިއްޔާ ހުވައިކުރެއްވުމަށްފަހު، ދެ ހަފްތާއެއްހައި ދުވަހުގެ ތެރޭގައި އައު މަޖިލިސް ހުވައިކުރާނެ ކަމަށެވެ. މިކަމުގެ ސަބަބުން ވޭތުވެދިޔަ 20-25 އަހަރު ރާއްޖޭގައި އޮތް ސިޔާސީ ދެކޮޅުވެރިކަން ޙައްލުވެ، ޤައުމަށް ހަމަޖެހުން ލިބިގެންދާނެ ކަމަށް ޤަބޫލުކުރައްވާ ކަމަށްވެސް ބަންޑާރަ ނައިބު އުޝާމް ވަނީ ވިދާޅުވެފައެވެ.
