ރާއްޖޭގެ އެކި ސަރަޙައްދުތަކުގައި މިހާތަނަށް 90 ކަނދުފަތި އަޅާފައިވާ ކަމަށް ފިޝަރީޒް މިނިސްޓްރީން ހާމަކޮށްފިއެވެ.
މިކަމާ ގުޅިގެން ފިޝަރީޒް މިނިސްޓަރު އަޙްމަދު ޝިޔާމް މީގެ ކުރިން ވިދާޅުވެފައިވަނީ، އެއްވެސް ސަރުކާރަކުން ރާއްޖޭގައި ކަނދުފަތި ނާޅާ މިންވަރަށް މި ސަރުކާރުން ރާއްޖޭގެ އެކި ސަރަޙައްދުތަކުގައި ކަނދުފަތި އަޅާފައިވާ ކަމަށެވެ. އެގޮތުން، މިހާތަނަށް ރާއްޖޭގެ އެކި ސަރަޙައްދުތަކުގައި 90 ކަނދުފަތި އަޅާފައިވާ ކަމަށާއި، އެއީ 42 ދޮށީ ކަނދުފައްޗާއި 48 ވަދު ކަނދުފަތި ކަމަށް މިނިސްޓަރު ވަނީ ހާމަކުރައްވައިފައެވެ.
އާންމު ގޮތެއްގައި ދޮށީ ކަނދުފަތިތަކަކީ ކަޅުބިލަމަހުގެ މަސްވެރިކަމަށް ޚާއްޞަކޮށްގެން އަޅާފައިވާ ކަނދުފަތިތަކެކެވެ. މީގެ އިތުރުން ވަދު ކަނދުފަތިތަކަކީ ފަރުމަސްވެރި ކަމަށާއި ސްޕޯޓްސް ފިޝިންގ ފަދަ ކަންކަމަށް ޚާއްޞަކޮށްގެން އަޅާފައިވާ ކަނދުފަތިތަކެކެވެ.
ކަނދުފައްޗަށް ބޮޑު ޑިމާންޑެއް އޮތް ނަމަވެސް ރާއްޖޭގައި މި ވަގުތު ހުރީ ކަނދުފަތި ޤާއިމްކުރާ އެންމެ ސެންޓަރެކެވެ. އެއީ ހުޅުމާލޭގައި ހުންނަ ކަނދުފަތި ޤާއިމްކުރާ ސެންޓަރެވެ. ރާއްޖޭގެ އެކި ސަރަޙައްދުތަކުގައި ކަނދުފަތިތައް އެޅުމަށް ދިމާވާ އެންމެ ބޮޑު އެއް ގޮންޖެހުމަކީ ރާއްޖޭގައި ކަނދުފަތި ޤާއިމްކުރާ ސެންޓަރުތައް ނެތުން ކަމަށް ފިޝަރީޒް މިނިސްޓްރީން ވަނީ ބުނެފައެވެ.
ފިޝަރީޒް މިނިސްޓްރީން ހާމަކޮށްފައިވާ ގޮތުގައި، މި މައްސަލައަށް ޙައްލެއް ހޯދުމުގެ ގޮތުން ރާއްޖޭގެ އެކި ސަރަޙައްދުތަކުގައި ކަނދުފަތި އެޅުމަށް އިތުރު ދެ ސެންޓަރެއް ތަރައްޤީކުރުމުގެ މަސައްކަތް އެ މިނިސްޓްރީން ދަނީ ކުރަމުންނެވެ. އެގޮތުން، ށ. ފުނަދޫގައި ތަރައްޤީކުރާ ކަނދުފަތި އަޅާ ސެންޓަރުގެ ޢަމަލީ މަސައްކަތްތައް ވަރަށް އަވަހަށް ފަށާނެ ކަމަށް އެ މިނިސްޓްރީން ވަނީ އިތުރަށް ބުނެފައެވެ.
