ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށް ބޭއްވުމަށް ޤާނޫނުއަސާސީއަށް ހުށަހަޅާފައިވާ އިސްލާހުގެ ސަބަބުން، ރާއްޖޭގައި އޮތް ސިޔާސީ ދެކޮޅުވެރިކަމަށް ދާއިމީ ހައްލެއް ލިބި އިޤްތިސާދީ ކުރިއެރުމަށް މަގުފަހިވާނެ ކަމަށް ބަންޑާރަ ނައިބު އަހުމަދު އުޝާމް ވިދާޅުވެއްޖެއެވެ.
ޕީއެސްއެމްގެ ”ރާއްޖެ މިއަދު“ ޕްރޮގްރާމްގައި ވާހަކަދައްކަވަމުން ބަންޑާރަ ނައިބު ވިދާޅުވީ، 2008 ވަނަ އަހަރު އާ ގާނޫނުއަސާސީއަށް އަމަލުކުރަން ފެށީއްސުރެ ރާއްޖެއިން ވަނީ ބޮޑެތި ސިޔާސީ ހަމަނުޖެހުންތަކާއި ގޮންޖެހުންތަކަކާ ކުރިމަތިލާފައި ކަމަށެވެ. އަދި ރާއްޖޭގައި އަބަދުވެސް ކޮންމެވެސް އިންތިޚާބެއްގެ ވާދަވެރިކަން އޮތުމަކީ ގައުމުގެ އިޤްތިސާދަށް އޭގެ ނޭދެވޭ އަސަރު ކުރާ ކަމެއްކަން އޭނާ ފާހަގަކުރެއްވިއެވެ.
”ދިވެހިރާއްޖޭގައި އިންވެސްޓްކުރަން ބޭނުންވާ ފަރާތްތަކުންވެސް އެންމެ ފުރަތަމަ ބަލާ އެއްކަމަކީ ދިވެހިރާއްޖޭގެ ސިޔާސީ ހަމަޖެހުން އެބައޮތްތޯ. އަބަދު މި އިންތިޚާބެއްގެ ތެރޭގައި އަޅުގަނޑުމެން އުޅޭތީވެ، އެކި ފަރާތްތަކުން އެ ކަންބޮޑުވުންތައް އަޅުގަނޑުމެންނާ ހިއްސާކޮށްފައި އެބަހުރި،“ އުޝާމް ވިދާޅުވިއެވެ.
ބަންޑާރަ ނައިބު ވިދާޅުވި ގޮތުގައި މިހާރު ކަންކަން އޮތްގޮތުން، ރިޔާސީ އިންތިޚާބު ނިމި ހަ މަސް ފަހުން މަޖިލިސް އިންތިޚާބު، އަދި އޭގެ އަހަރެއްހާ ދުވަސް ފަހުން ކައުންސިލް އިންތިޚާބު ބާއްވަން ޖެހުމުން، ސަރުކާރަށް ރައްޔިތުންނަށް ޚިދުމަތް ކުރުމަށް ލިބޭ ފަސް އަހަރުގެ ދައުރުގެ ބޮޑުބައެއް ހޭދަވަނީ އިންތިޚާބީ ވާދަވެރިކަމުގެ ތެރޭގައެވެ.
މިކަމަށް ހައްލެއް ހޯދުމަށް ސިޔާސީ ޕާޓީތަކާއެކު ކުރެވުނު މަޝްވަރާތަކަށްފަހު، ގާނޫނުއަސާސީއަށް އިސްލާހު ގެނައުމުގެ ބިލު މަޖިލީހުން ވަނީ ވަނީ ފާސް ކޮއްފައި ކަމަށާއި. އަދި އަންނަ އެޕްރީލް ހަތަރު ވަނަ ދުވަހު އޮންނަ ލޯކަލް ކައުންސިލް އިންތިޚާބާއި އެކު މިކަމަށް ރައްޔިތުންގެ ފެންނަ ނުފެންނަ ވޯޓު ނެގޭނެ ކަމަށެވެ.
އަދި ޤާނޫނު އަސާސީއަށް އިސްލާހު ގެނައުމުގެ މައިގަނޑު ދެ މަޤްސަދަކީ:
ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއް ދުވަހެއްގައި ބޭއްވުން.
މަޖިލީހުގެ ދައުރު ފެށޭ ތާރީޚަކީ 1 ޑިސެމްބަރު ކަމަށް ކަނޑައެޅުން ކަމަށެވެ.
އުޝާމް އިތުރަށް ވިދާޅުވީ، މި ބަދަލު އަތުވެއްޖެނަމަ ރައީސުލްޖުމްހޫރިއްޔާ ހުވާކުރެއްވުމަށްފަހު، ދެ ހަފްތާއެއްހާ ދުވަހުގެ ތެރޭގައި އާ މަޖިލިސް ހުވާކުރާނެ ކަމަށެވެ. މީގެ ސަބަބުން ވޭތުވެދިޔަ 20-25 އަހަރު ރާއްޖޭގައި އޮތް ސިޔާސީ ދެކޮޅުވެރިކަން ވަރަށް ބޮޑަށް ހައްލުވެ، ގައުމަށް ހަމަޖެހުން ލިބިގެންދާނެ ކަމަށް ގަބޫލުކުރައްވާ ކަމަށްވެސް ބަންޑާރަ ނައިބު ވިދާޅުވިއެވެ.
