ރާއްޖެއިން އިންޑިއާއާއެކު މިނިވަން ވިޔަފާރީގެ އެއްބަސްވުން އެކުލަވައިލުމުގެ އޮނިގަނޑާއި އުޞޫލުތައް ބަޔާންކުރާ، ޓަރމްސް އޮފް ރިފަރަންސް (ޓީއޯއާރު) ގައި ސޮއިކޮށްފައިވާ ކަމަށް އިންޑިއާގެ ސަރުކާރުން ބުނެފިއެވެ.
ރާއްޖެއިން އިންޑިއާއެކު ދެމެދު ފްރީ ޓްރޭޑް އެގްރީމެންޓް ނުވަތަ މިނިވަން ވިޔަފާރި ފެށުމަށް ރަސްމީ މަޝްވަރާތައް ކުރިއަށް ގެންދިއުމުގެ އެއްބަސްވުމުގައި ސޮއިކޮށްފައިވަނީ، މިދިޔަ 2025 ވަނަ އަހަރުގެ ޖުލައި މަހު އިންޑިއާގެ ބޮޑުވަޒީރު ނަރެންދުރަ މޯދީ ރާއްޖެއަށް ކުރެއްވި ފުރަމާނަ ދަތުރުފުޅުގެ ތެރެއިންނެވެ.
ރާއްޖެއާއެކު އެފްޓީއޭއެއް އެކުލަވައިލުމުގެ މަޝްވަރާތައް ފެށުމުގެ ޓީއޯއާރުގައި ސޮއިކޮށްފައިވާ ކަމަށް އިންޑިއާގެ ކޮމާސް މިނިސްޓްރީން ވަނީ އެ ޤައުމުގެ މީޑިއާތަކަށް މަޢުލޫމާތު ދީފައެވެ. ނަމަވެސް، މިކަމާ ގުޅޭ އިތުރު ތަފްޞީލެއް އެ ޤައުމުގެ ސަރުކާރުން ދީފައި ނުވާއިރު، ދިވެހި ސަރުކާރުން ވެސް މިކަމާ ބެހޭ ގޮތުން ވަކި އެއްޗެއް އަދި ބުނެފައެއް ނުވެއެވެ.
ރާއްޖެ އިން އަންނަނީ އެކި ޤައުމުތަކާއެކު މިނިވަން ވިޔަފާރީގެ އެއްބަސްވުންތައް އެކުލަވާލުމުގެ މަސައްކަތްތައް ކުރަމުންނެވެ. އެގޮތުން މިދިޔަ 2025 ވަނަ އަހަރުން ފެށިގެން ޗައިނާއާއެކު އެފްޓީއޭއެއް ވަނީ އެކުލަވާލައި، ޢަމަލުކުރަން ފަށައިފައެވެ. މީގެ އިތުރުން ތުރުކީއާއެކު ވެސް ރާއްޖެއިން ވަނީ ޕްރިފެންޝަލް ޓްރޭޑް އެގްރީމެންޓެއް އެކުލަވާލައިފައެވެ.
