އާންމު ދަތުރުފަތުރާއި ޕަބްލިކް ފެރީގެ ޚިދުމަތް ދޭ ފަރާތްތަކުގެ އިތުރުން މަސްވެރިންނަށް ޚާއްޞަކޮށްގެން ކުރިންވެސް ކަނޑައެޅިފައިވާ އަގުތަކުގައި ތެޔޮ ލިބޭނެ ގޮތް ފަހިކޮށްދޭނެ ކަމަށް ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ބުނެފިއެވެ.
މިކަމާ ގުޅިގެން އެސްޓީއޯއިން މިއަދު ބުނެފައިވަނީ، އާންމު ދަތުރުފަތުރާއި ޕަބްލިކް ފެރީގެ ޚިދުމަތް ދޭ ފަރާތްތަކަށް ކުރިންވެސް ކަނޑައެޅިފައިވާ އަގުތަކުގައި ތެޔޮ ލިބޭނެ ގޮތް ފަހިކޮށްދޭނެ ކަމަށެވެ. މީގެ އިތުރުން މަސްވެރިންނަށް ޚާއްޞަކޮށްގެން ސަރުކާރުން ކުރިއަށްގެންދާ ’ފަހިހަކަތަ‘ ޕްރޮގްރާމްގެ ދަށުން، ސަބްސިޑީ ދެވިފައިވާ އަގުތަކެއްގައި މަސްވެރިންނަށްވެސް ތެޔޮ ލިބޭނެ ގޮތް ފަހިކޮށްދޭނެ ކަމަށެވެ.
މާލެ ސަރަޙައްދުގައި ހުންނަ އެފްއެސްއެމްގެ ފިއުލް ޝެޑްތަކުން ތެޔޮ ވިއްކާ އަގުތަކަށް އެއްވެސް ބަދަލެއް ގެނެސްފައިނުވާނެ ކަމަށާއި އަތޮޅުތެރޭގެ ރަށްރަށުގައި އެސްޓީއޯއިން ތެޔޮ ގަނެގެން ފިއުލް ޝެޑްތައް ހިންގާ ފަރާތްތަކަށްވެސް ކުރީގެ އަގުތަކުގައި ތެޔޮ ލިބޭނެ ގޮތް ފަހިކޮށްދީފައިވާ ކަމަށްވެސް އެސްޓީއޯއިން ވަނީ ބުނެފައެވެ.
އެސްޓީއޯގެ މި ނިންމުމަކީ އާންމުންނަށް މާލީ ގޮތުން އިތުރު ތަކުލީފެއް ކުރިމަތިނުވާނޭހެން ޕެޓްރޯލާއި ޑީސަލް ފޯރުކޮށްދިނުމަށް އެޅުނު ފިޔަވަޅުތަކެއް ކަމަށް އެ ކުންފުނިން ވަނީ އިތުރަށް ބުނެފައެވެ.
ފާހަގަކޮށްލަންޖެހޭ ގޮތުގައި، އިޒުރޭލާއި އެމެރިކާ އިސްވެ، އީރާނަށް ދިން ނިރުބަވެރި ހަމަލާތަކާ ގުޅިގެން، އީރާނުން ހުރްމުޒް ކަނޑުއޮޅިން ތެޔޮ އުފުލާ އުޅަނދުތަކަށް ދަތުރުނުކުރެވޭނޭހެން ބަންދުކުރުމުގެ ސަބަބުން ދުނިޔޭގެ ބާޒާރުގައި ތެލުގެ އަގު ވަނީ އިންތިހާއަށް ބޮޑުވެފައެވެ. މިކަމުގެ އަސަރު ރާއްޖެއަށްވެސް ވަނީ ކޮށްފައެވެ. ރާއްޖޭގައި ޕެޓްރޯލާއި ޑީސަލް ވިއްކާ އަގު ބޮޑުކޮށްފައިވާއިރު، ޕަބްލިކް ޓްރާންސްޕޯރޓް ޓިކެޓްގެ އަގުތައްވެސް ވަނީ އިންތިހާއަށް ބޮޑުވެފައެވެ.
އެގޮތުން ކުރިން 13.50 ރުފިޔާއަށް ވިއްކަމުންދިޔަ ޕެޓްރޯލް ލީޓަރެއް މިހާރު ވިއްކަނީ 16.01 ރުފިޔާއެވެ. މިއީ ލީޓަރަކުން 2.51 ރުފިޔާ ނުވަތަ ގާތްގަނޑަކަށް 18.6 އިންސައްތައިގެ އިތުރުވުމެކެވެ. ހަމައެހެންމެ، ކުރިން 13.92 ރުފިޔާއަށް ވިއްކި ޑީސަލް ލީޓަރެއް އަގު މިހާރު ވަނީ 17.54 ރުފިޔާއަށް އުފުލިފައެވެ. މިއީ ލީޓަރަކުން 3.62 ރުފިޔާ ނުވަތަ ގާތްގަނޑަކަށް 26 އިންސައްތައިގެ އިތުރުވުމެކެވެ.
ސަރުކާރުން އަންނަނީ ރާއްޖެއަށް ބޭނުންވާ ޕެޓްރޯލާއި ޑީސަލް ބައިނަލްއަޤުވާމީ އިތުރު މާކެޓުތަކުން ލިބޭނެގޮތް ހޯދުމުގެ މަސައްކަތްތައް ކުރަމުންނެވެ.
