މި އަހަރުގެ ފިޠުރު ޒަކާތުގެ ގޮތުގައި ގޮވާމުން ލިބިފައިވާ ބާވަތްތައް ފަޤީރުންނާއި މިސްކީނުންގެ ދަފްތަރުގައި ރަޖިސްޓްރީވެފައިވާ ފަރާތްތަކަށް ބެހުމުގެ މަސައްކަތް ފަށާފައިވާ ކަމަށް މޯލްޑިވްސް ޒަކާތު ހައުސްއިން ހާމަކޮށްފިއެވެ.
ގޮވާމުގެ ބާވަތްތަކުން ފިޠުރު ޒަކާތް ބަލައިގަންނަން ފެށީ މީގެ ތިން ދުވަސް ކުރިން، މި މަހުގެ 14 ވަނަ ދުވަހުއެވެ. ޒަކާތު ހައުސްއިން މީގެ ކުރިން ބުނީ، ފިޠުރު ޒަކާތުގެ ގޮތުގައި ގޮވާމުގެ ބާވަތްތަކުން ލިބިފައިވާ ތަކެތި ބެހުމުގެ މަސައްކަތް މި މަހުގެ 17 އަދި 18 ވަނަ ދުވަހު ކުރިއަށްދާނެ ކަމަށެވެ.
ޒަކާތުގެ ގޮތުގައި ލިބިފައިވާ ތަކެތި ބަހަމުންދާނީ މި ދެ ދުވަހުގެ ހެނދުނު 10:00 އިން ފެށިގެން މެންދުރު 12:00 އާއި ހަމައަށް އަދި މެންދުރުފަހު 13:00 އިން ފެށިގެން ހަވީރު 15:00 އާއި ހަމައަށް ކަމަށް ޒަކާތު ހައުސްއިން ވަނީ ބުނެފައެވެ. އަދި މި ތަކެތި ބެހުމުގެ މަސައްކަތްތައް ކުރިއަށްދާނީ މާލޭގައި ހުންނަ ސެންޓަރ ފޯރ ހަޔަރ ސެކަންޑަރީ އެޑިއުކޭޝަން (ސީއެޗްއެސްއީ) ގައި ކަމަށްވެސް ޒަކާތު ހައުސްއިން ވަނީ މަޢުލޫމާތު ދީފައެވެ.
ޕީއެސްއެމްގެ ޕްރޮގްރާމެއްގައި މިކަމާ ގުޅޭ މަޢުލޫމާތު ދެއްވަމުން ޒަކާތު ހައުސްގެ އެސިސްޓެންޓް ޑިރެކްޓަރ ޖެނަރަލް މޫސާ މުޢިއްޒު ވިދާޅުވީ، މިހާތަނަށް 5.7 ޓަނުގެ ގޮވާން ޒަކާތުގެ ގޮތުގައި ލިބިފައިވާ ކަމަށާއި، އޭގެ ތެރޭގައި އެންމެ ގިނައީ ބާސްމަތީ ހަނޑޫ ކަމަށެވެ. އެގޮތުން 3.2 ޓަނުގެ ބާސްމަތީ ހަނޑުލާއި، 1.4 ޓަނުގެ އާދައިގެ ހަނޑުލުގެ އިތުރުން 300 އެއްހާ ކިލޯގެ ފުއް ލިބިފައިވާ ކަމަށް އޭނާ ވަނީ ވިދާޅުވެފައެވެ.
އޭނާ އިތުރަށް ވިދާޅުވީ، ޒަކާތުގެ ގޮތުގައި ލިބިފައިވާ ގޮވާމުގެ ބާވަތްތައް ފަޤީރުންނާއި މިސްކީނުންގެ ދަފްތަރުގައި ރަޖިސްޓްރީވެފައިވާ ފަރާތްތަކަށް ބެހުމަށްފަހުގައި ބާކީވާ ތަކެތި، ބޭނުންޖެހިފައިވާ އެހެން ފަރާތްތަކަށް ހަދިޔާކުރުމަށް ނިންމާފައިވާ ކަމަށެވެ. އެގޮތުން މި މަހުގެ 19 ވަނަ ދުވަހު އެ ތަކެތި ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީއާ ޙަވާލުކުރުމަށް ހަމަޖެހިފައިވާ ކަމަށް އޭނާ ވަނީ ވިދާޅުވެފައެވެ.
