ކުރީގައި ސަރުކާރުގެ އެކި އިދާރާތައް ހިންގުމަށް ބޭނުންކުރަމުންދިޔަ ޣާޒީ ބިލްޑިންގ ހުރި ސަރަޙައްދުގައި ޕާކެއް ތަރައްޤީކުރުމަށް ސަރުކާރުން ނިންމައިފިއެވެ.
އެ ސަރަޙައްދުގައި ޕާކެއް ތަރައްޤީކުރަން ނިންމަވާފައިވާކަން ހާމަކުރެއްވީ ކޮންސްޓްރަކްޝަން މިނިސްޓަރު ޑރ. ޢަބްދުﷲ މުއްޠަލިބުއެވެ. މިކަމާ ގުޅިގެން މިނިސްޓަރު މުއްޠަލިބް އެކްސްގައި ޚިއްޞާކުރެއްވި ޕޯސްޓެއްގައި ވިދާޅުވީ، އެ ސަރަޙައްދުގައި ޕާކު ތަރައްޤީކުރުމަށް މިނިސްޓްރީން ޙަވާލުކޮށްފައިވަނީ ރޯޑް ޑިވެލޮޕްމެންޓް ކޯޕަރޭޝަން (އާރުޑީސީ) އަށް ކަމަށެވެ.
މާލޭގެ މަލަމަތި ރީތިކޮށް ތޮއްޖެހިފައިވާ މިމާލޭގައި ހިތްފަސޭހަ މައިޒާންތައް އިތުރުކުރުމަށް ސަރުކާރުން ކުރަމުންދާ މަސައްކަތުގެ ތެރެއިން ޣާޒީ ބިލްޑިންގ ހުރި ބިމުގައި ޕާކެއް ހެދުމުގެ މަސައްކަތް އާރު.ޑީ.ސީއާ ޙަވާލުކޮށްގެން މިހާރު ވަނީ ފަށާފައެވެ. pic.twitter.com/9bokRq5K08
— Abdulla Muththalib (@muththo) March 16, 2026
މިނިސްޓަރު ވިދާޅުވި ގޮތުގައި، މި ޕާކު ތަރައްޤީކުރަނީ މާލޭ ސިޓީގެ މަލަމަތި ރީތިކޮށް، ތޮއްޖެހިފައިވާ މާލޭ ސިޓީގައި ހިތްފަސޭހަ މައިޒާންތައް އިތުރުކުރުމަށް ސަރުކާރުން ކުރާ މަސައްކަތުގެ ދަށުން ކަމަށެވެ. މި ޕާކު ތަރައްޤީކުރެވިގެންދާނީ ޖުމްހޫރީ މައިދާނެކޭ އެއްފަދައިން އިށީނދެ ތިބެވޭނެ ބެންޗުތަކުގެ އިތުރުން ފެހިކަން އެކުލެވިގެންދާ ތަނެއްގެ ގޮތުގައި ކަމަށްވެސް މިނިސްޓަރު ވަނީ ވިދާޅުވެފައެވެ.
ޣާޒީ ބިލްޑިންގ ހުރި ސަރަޙައްދުގައި ޕާކެއް ތަރައްޤީކުރަން ސަރުކާރުން ނިންމާފައިވާއިރު ފާހަގަކޮށްލަންޖެހޭ ކަމަކީ، 2023 ވަނަ އަހަރު ޣާޒީ ބިލްޑިންގ ތަޅައިލުމަށްފަހު، އެ ސަރަޙައްދު ބޭނުންކުރަމުން އަންނަނީ ޕާކިންގ ޒޯނެއްގެ ގޮތުގައެވެ.
