މީޑިއާތަކުގެ މިނިވަން ކަމާއި، ދުލާއި ގަލަމުގެ މިނިވަން ކަމާއި، ބަސް ބުނުމުގެ މިނިވަންކަމަށް އެންމެ ބޮޑަށް ވަކާލާތުކުރާ އިދިކޮޅު އެމްޑީޕީން މީޑިއާގެ މިނިވަންކަމަށް އަރައިގަނެ، ޕަބްލިކް ސަރވިސް މީޑިއާ (ޕީއެސްއެމް) ތެރެއަށް ވަދެ ތަނުގެ މުވައްޒަފުންނަށް ބިރުދައްކައިފިއެވެ.
އެމްޑީޕީން މި ނާތަހުޒީބު ޢަމަލު ހިންގާފައިވަނީ އެޕާޓީން ޕީއެސްއެމްގެ މެނޭޖިން ޑިރެކްޓަރާ ބައްދަލުކުރެއްވުމަށް އެދި ފޮނުވި ސިޓީއަށް ޕީއެސްއެމުން ޖަވަބުދީފައި ވަނިކޮށެވެ. އެ ސިޓީގެ ޖަވާބުގައި ޕީއެސްއެމްއިން ބުނެފައިވަނީ، މިވަގުތު ކުންފުނީގެ މެނޭޖިންގ ޑިރެކްޓަރ ރާއްޖޭގައި ނޫޅުއްވާ ކަމަށާއި، އެނބުރި ރާއްޖެއަށް ވަޑައިގަތުމަށް ހަމަޖެހިފައިވަނީ މިމަހުގެ ފަހުކޮޅު ކަމަށެވެ. އެހެންކަމުން އެމްޑީ ރާއްޖެ ވަޑައިގަތުމުން ބައްދަލުކުރެއްވުމަށް އަލުން އެދުމަށެވެ.
މިފަދައިން ޖަވާބު ދެއްވާފައި ވަނިކޮށް އެމްޑީޕީން މި ހިންގި ނާތަހުޒީބު އަމަލު ޕީއެސްއެމުން ވަނީ ކުށްވެރިކޮށްފައެވެ. ޕީއެސްއެމުން ނެރުނު ބަޔާނެއްގައި ބުނީ އެމްޑީޕީގެ ސިޓީއަށް ޖަވާބުދާރީވެފައި ވަނިކޮށް މިނިވަން ދަޢުލަތުގެ މީޑިއާގެ މުވައްޒަފުންގެ ހިތުގައި ބިރުވެރިކަން އުފައްދާ، މީޑިއާ ހިންގުމަށް ހުރަސްއަޅާ އެމްޑީޕީން ކުރިއަށް ގެންދާ ކަންކަން ހުއްޓާލުމަށް ގޮވާލާކަމަށެވެ. އަދި ކުންފުންޏާމެދު ރައްޔިތުންގެ މެދުގައި ނަފްރަތު އުފެދޭ ގޮތަށް ޙަޤީޤަތާއި ޚިލާފު ވާހަކަތައް ނުފެތުރުމަށްވެސް ވަނީ އިލްތިމާސްކޮށްފައެވެ.
— Public Service Media (@psm_mkt) March 16, 2026
އެމްޑީޕީން ވަނީ ޕީއެސްއެމް ތެރެއަށް ވަދެ ހަޑި ހުތުރު ބަހުން މުޢާމަލާތުކޮށް އަދުގަދަކޮށްފައެވެ. އަދި ފުލުހުންނާވެސް ކުރިމަތިލުން ހިންގަން މަސައްކަތްކޮށްފައިވާ މަންޒަރުތައް ސޯޝަލްމީޑިއާގައި ދަނީ ދައުރުވަމުންނެވެ. ޕީއެސްއެމް ތެރެއަށް ވަތް ގުރޫޕުގެ ތެރޭގައި މާލޭގައި ނުރައްކާތެރި މާރާމާރީ ހިންގާ ޖަލު ޙުކުމް ތަންފީޒުކޮށްފައި ތިބި، އަދި ކުށޫގެ ވެށީގައި އުޅޭ ފަރާތްތަކާއި، ނުރައްކާތެރި ކުށުގެ ރެކޯޑު ހުރި ފަރާތްތައް ހިމެނެއެވެ.
ކުރިއަށް އޮތް އިންތިޚާބުތަކާ ގުޅިގެން ރައްޔިތުން ހޭލުންތެރިކުރުމަށް ކުންފުނިން ކުރިއަށްގެންދާ ޕްރޮގްރާމްތަކާ ގުޅޭގޮތުން ޕީއެސްއެމްއިން ބުނެފައިވަނީ، އެ ޕްރޮގްރާމްތަކަކީ ރައްޔިތުންނަށް ފަންނީ އަދި އިޖުރާޢީ މަޢުލޫމާތު ފޯރުކޮށްދިނުމަށް ތައްޔާރުކުރާ ޕްރޮގްރާމްތަކަކަށްވާތީ މިވަގުތު ސިޔާސީ ޕާޓީތަކަށް ފުރުޞަތު ދިނުމުގެ ބަދަލުގައި އިސްކަންދެމުންދަނީ ކުރީގެ ރައްޔިތުންގެ ޚާއްސަ މަޖިލީހުގެ މެންބަރުކަން އަދާކުރައްވާފައިވާ ތަޖުރިބާ ކާރު ބޭފުޅުން މެދުވެރިކޮށް މަޢުލޫމާތު ގެނެސްދިނުމަށް ކަމަށެވެ. އަދި މިހާތަނަށް އެއްވެސް ޕްރޮގްރާމަކަށް ސިޔާސީ ޕާޓީއެއް ތަމްސީލް ކުރާ ފަރާތަކަށް އެ ހައިސިއްޔަތުން ފުރުޞަތު ދީފާނުވާ ކަމަށް ޕީއެސްއެމްއިން ބުނެއެވެ.
މީގެ އިތުރުން ކުންފުނިން އަބަދުވެސް މަސައްކަތް ކުރަމުންދަނީ، ޕަބްލިކް ސަރވިސް މީޑިއާގެ ޤާނޫނުގައި ބަޔާންކޮށްފައިވާ އުޞޫލުތަކާއި ވަކިފަރާތަކަށް ނުޖެހި މިނިވަންކަމާއެކު ރައްޔިތުންނަށް ތެދު މަޢުލޫމާތު ފޯރުކޮށްދިނުމުގެ މިންގަނޑުތަކާ އެއްގޮތަށް ކަމަށް ބުނެފައިވެއެވެ. އެ ސިޓީގައި ވަނީ، އެމްޑީޕީއިން ވެރިކަން ކުރެއްވި އިރުވެސް ޕީއެސްއެމް އޮތީ އެގޮތުގައި ކަމަށާއި، ކުންފުނީގެ މިނިވަންކަމާ ގުޅުވާ ރައްޔިތުންގެ މެދުގައި ނަފްރަތު އުފެދޭ ގޮތަށް ހަޤީޤަތާއި ޚިލާފަށް ވާހަކަތައް ނުފެތުރުމަށްވެސް އިލްތިމާސްކޮށްފައެވެ.
