މާލޭ ނޯތު ހާބަރު ސަރަޙައްދު ބޭނުންކުރާ އޮޑި ދޯނި ފަހަރުން ނަގާ ފީތައް ބޮޑުކުރުމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އާއި ސަރުކާރުން މަޝްވަރާކުރަމުންދާ ކަމަށް ބުނެ ބައެއް ފަރާތްތަކުން ދައްކަމުން އަންނަ ވާހަކަތައް އެމްޕީއެލްއިން ދޮގުކޮށްފިއެވެ.
މިކަމާ ގުޅިގެން އެމްޕީއެލްއިން ނެރެފައިވާ ނޫސްބަޔާނެއްގައި ބުނެފައިވަނީ، މާލޭ ނޯތު ހާބަރުގައި މިހާރު ނަގަމުންދާ ފީތައް ބޮޑުކުރުމާ ގުޅޭ އެއްވެސް މަޝްވަރާއެއް ސަރުކާރާއެކު އެ ކުންފުނިން ކުރިއަށް ނުގެންދާ ކަމަށެވެ. މި ވާހަކަތަކަކީ އެއްވެސް އަސާސެއް ނެތް ޙަޤީޤަތާ ޚިލާފު ވާހަކަތަކެއް ކަމަށް އެމްޕީއެލްއިން ވަނީ ބުނެފައެވެ.
ނޫސްބަޔާން pic.twitter.com/cvqjtjfwqM
— Maldives Ports Limited (@Portmv) March 15, 2026
މީގެ އިތުރުން ބޮޑުތަކުރުފާނު މަގު ތަރައްޤީކުރުމުގެ މަޝްރޫއާއެކު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނޯތު ހާބަރުގެ ޚިދުމަތްތައް ފުޅާކޮށް ”އޭ ޒޯން“ ބޭނުންކުރާ އުޅަނދުފަހަރަށް ފެނާއި ކަރަންޓު ފޮރުކޮށްދިނުމަށް އަންގަވާފައިވާކަން ފާހަގަކުރަމުން އެ ކުންފުނިން ބުނެފައިވަނީ، އެ ޚިދުމަތްތައް ފެށުމަށް ކުރަންޖެހޭ މަސައްކަތްތައް ކުރިއަށް ގެންދަމުންދާ ކަމަށް ބުނެފައެވެ.
އެމްޕީއެލްއިން ބުނެފައިވަނީ އެ ކުންފުނީގެ އަމާޒަކީ މާލޭ ނޯތު ހާބަރު ބޭނުންކުރާ އޮޑި ދޯނި ފަހަރަށް ވީހާވެސް ލުއި ފަސޭހަ ގޮތަކަށް ޚިދުމަތްތައް ފޯރުކޮށްދިނުން ކަމަށެވެ. އެގޮތުން އެ ސަރަޙައްދުގައި ބަނދަރުކޮށްފައި ހުންނަ އުޅަނދުތަކަށް ޖާގަ ދިނުމަށް ޢަމަލުކުރަމުންދާ އުޞޫލަށް މި މަހުގެ 14 ވަނަ ދުވަހުން ފެށިގެން ބައެއް ބަދަލުތައް ގެނެސްފައިވާ ކަމަށް އެމްޕީއެލްއިން ވަނީ ބުނެފައެވެ.
މި ބަދަލުގެ ސަބަބުން މުދާ އުފުލާ ބޯޓުފަހަރުތަކުން ކިޔުގައި މަޑުކުރަންޖެހޭ ވަގުތު ކުޑަވެ، ޚިދުމަތް ހޯދުމުގައި އިތުރު ފަސޭހަތަކެއް ލިބިގެންދާނެ ކަމަށް އެ ކުންފުނިން ވަނީ ބުނެފައެވެ.
އެމްޕީއެލްއިން ހާމަކޮށްފައިވާ ގޮތުގައި މަސްވެރިކަން ކުރާ އޮޑި ދޯނި ފަހަރަށް ޚާއްޞަކުރެވިފައިވާ ޑީ ޒޯނާއި އީ ޒޯނުގެ އިތުރުން އެފް ޒޯނުން މިހާރުވެސް އެއްވެސް ފީއެއް ނުނަގައެވެ. މާލޭ އުތުރު ފަރާތު ބޮޑުތަކުރުފާނު މަގު ތަރައްޤީކުރުމުގެ މަޝްރޫއަށްފަހު، އެ ޒޯންތައް ހުޅުވާލިއިރު އެ ކުންފުނިން ޢަމަލުކުރަމުންދިޔަ އުޞޫލަށް ގެނައި ހަމައެކަނި ބަދަލަކީ ސަރުކާރުގެ ކަމާބެހޭ އިދާރާތަކުގައި ރަޖިސްޓްރީކޮށްފައިނުވާ އެއްވެސް އުޅަނދަކަށް އެ ސަރަޙައްދު ބޭނުންނުކުރެވޭ ގޮތް ހެދުން ކަމަށް އެމްޕީއެލްއިން ވަނީ ބުނެފައެވެ.
މާލޭ ނޯތު ހާބަރަކީ ގިނަ ރައްޔިތުންތަކެއްގެ މަޞްލަޙަތާ ގުޅިފައިވާ ތަނެއްކަމުން، އެއްވެސް ފަރާތަކުން ޢާންމުންގެ މެދުގައި ނުތަނަވަސްކަން އުފެދޭ ގޮތަށް ދޮގު މަޢުލޫމާތު ނުފެތުރުމަށް އެމްޕީއެލްއިން ވަނީ އެދިފައެވެ.
