ތެލަސީމިއާ ސޮސައިޓީގެ ކުރީގެ ޗެއަރޕާސަން އަދި އެ ސޮސައިޓީގެ އެގްޒެކެޓިވް ކޮމެޓީގެ މެންބަރު ޢަބްދުލް މުޢިއްޒު ޙަސަން މިއަދު ނިޔާވެއްޖެއެވެ.
ޢަބްދުލް މުޢިއްޒު ޙަސަން ނިޔާވުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އެނާގެ ޢާއިލާއަށް ތަޢުޒިޔާ ފޮނުއްވައިފައެވެ. ރައީސް ވިދާޅުވީ، ތެލަސީމިއާ ސޮސައިޓީގެ ކުރީގެ ޗެއަރޕާސަން އަދި އެ ސޮސައިޓީގެ އެގްޒެކެޓިވް ކޮމެޓީގެ މެންބަރު ޢަބްދުލް މުޢިއްޒު ޙަސަން ނިޔާވި ޚަބަރު އަޑުއެއްސެވީ ފުންހިތާމައާއެކުގައި ކަމަށެވެ.
إِنَّا لِلّهِ وَإِنَّـا إِلَيْهِ رَاجِعُونَ
ތެލަސީމިއާ ސޮސައިޓީގެ ކުރީގެ ޗެއާޕާސަން އަދި އެ ސޮސައިޓީގެ އެގްޒެކެޓިވް ކޮމެޓީގެ މެންބަރު ޢަބްދުލްމުޢިއްޒު ޙަސަން ނިޔާވި ޚަބަރު އަޅުގަނޑު އަޑުއެހީ ފުންހިތާމައާއެކު. މިއީ، އެޗްޑީސީގެ މުވައްޒަފުންގެ ކްލަބްގެ ރައީސްގެ ހައިސިއްޔަތުންވެސް… pic.twitter.com/Ejck7MRpN9
— Dr Mohamed Muizzu (@MMuizzu) March 16, 2026
ރައީސް މުޢިއްޒު ވިދާޅުވީ، ޢަބްދުލް މުޢިއްޒު ޙަސަން އަކީ އެޗްޑީސީގެ މުވައްޒަފުންގެ ކްލަބްގެ ރައީސްގެ ހައިސިއްޔަތުންވެސް ހިތްވަރުގަދަކަމާއި ހިތްހެޔޮކަމުގެ ރީވެތި ނަމޫނާއެއް ދެއްކެވި ޒުވާނެއް ކަމަށެވެ.
”މަރްޙޫމްގެ ޢާއިލާއަށާއި، ތެލަސީމިއާ ސޮސައިޓީގެ މެންބަރުންނަށް އަދި އެޗްޑީސީގެ މުވައްޒަފުންނަށް ތަޢުޒިޔާ ދަންނަވަން. މާތްﷲގެ ތަނަވަސް ރަޙްމަތުގައި، ސުވަރުގޭގެ ދާއިމީ ނިޢުމަތުގައި މަރްޙޫމް ޢަބްދުލް މުޢިއްޒު ޙަސަން ލަހައްޓަވާށި. އާމީން,“ — ރައީސް މުޢިއްޒު ވިދާޅުވިއެވެ.
ތެލަސީމިއާ ބަލި ތަޙައްމަލުކުރަމުންދިޔަ މުޢިއްޒު ފާހަގަކުރެވިގެން ގޮސްފައިވަނީ ތެލަސީމިއާ ކުދިންގެ ޙައްޤުގައި ވަކާލުކުރުމުގައި ބުރަ މަސައްކަތްތަކެއް ކުރެއްވި ފަރާތެއްގެ ގޮތުގައެވެ.
