ޖަނަވާރުންނަށް އަނިޔާކޮށް މެރުން ފަދަ ޢަމަލުތައް ހިންގާ ނަަމަ، އެފަދަ ޢަމަލެއް ހިންގި ފަރާތަކާ މެދު ޤާނޫނީ ގޮތުން އެޅެން އޮތް އެންމެ ހަރުކަށި ފިޔަވަޅު އަޅާނެ ކަމަށް އެގްރިކަލްޗަރ އެންޑް އެނިމަލް ވެލްފެއަރ މިނިސްޓްރީން ބުނެފިއެވެ.
އެނިމަލް ވެލްފެއަރ މިނިސްޓްރީން މި މޭރުމުން ބުނެފައިވަނީ ހއ. ހޯރަފުށީގައި ބުޅަލެއް ދަންޖައްސައި، މަރާލި މައްސަލައެއް ފެންމަތިވުމާ ގުޅިގެން ނެރުނު ބަޔާނެއްގައެވެ. އެ މިނިސްޓްރީން ބުނީ، އެފަދަ ޢަމަލުތައް ހިންގާ މީހުންނާ މެދު ގާނޫނީ ގޮތުން އެޅެން އޮތް އެންމެ ހަރުކަށި ފިޔަަވަޅު އަޅާނެ ކަމަށާއި އޭގެ ތެރޭގައި ޖަލަށްލުމާއި ޖޫރިމަނާކުރުން ހިމެނޭ ކަމަށެވެ.
މި މައްސަލައާ ގުޅިގެން އެނިމަލް ވެލްފެއަރ މިނިސްޓްރީން ނެރުނު ބަޔާނުގައި ބުނީ، ފަހަކަށް އައިސް ބައެއް ފަރާތްތަކުން ޖަނަވާރުންނަށް އަނިޔާކުރުމާއި އެ ތަކެތި މެރުމުގެ އިތުރުން އެ ތަކެއްޗަށް އަޅައިނުލާ ދޫކޮށްލާކަމުގެ ޝަކުވާތައް އެ މިނިސްޓްރީއަށް ލިބޭ ކަމަށެވެ. އެފަދަ ޢަމަލުތަކަކީ އެއްވެސް ޙާލެއްގައި ބަލައިގަނެވޭނެ ކަންކަމެއްނޫން ކަމަށް މިނިސްޓްރީން ވަނީ ބުނެފައެވެ.
ޖަނަވާރުންނަކީ ވޭނާއި ބިރާއި ތުރާ އިހުސާސްކުރެވޭނެ މަޚްލޫޤުންނަށް ވާއިރު އެ ތަކެއްޗާ މެދު އޯގާތެރިކޮށް ހިތައި ރައްކާތެރިކަން ފޯރުކޮށްދިނުމަކީ އިންސާނިއްޔަތުކަމުގެ ގޮތުންނާއި ދީނީ ގޮތުން އަދި ޤާނޫނީ ގޮތުންވެސް ކޮންމެ ފަރުދެއްގެ މައްޗަށް އޮތް ޒިންމާއެއްކަން ފާހަގަކުރަމުން އެނިމަލް ވެލްފެއަރ މިނިސްޓްރީން ބުނެފައިވަނީ ޖަނަވާރު ގެންގުޅުމާއި ޖަނަވާރުންގެ ރައްކާތެރިކަމުގެ ޤާނޫނުގެ ދަށުން، ޖަނަވާރުންނަށް ލިބެންޖެހޭ އަސާސީ ޙައްޤުތަކެއްވެސް ކަނޑައަޅާފައިވާ ކަމަށެވެ.
ކަން މިހެން އޮތް އިރު، ޖަނަވާރުންނަށް ކުރާ އަނިޔާ ހުއްޓުވުމަށް ހުރިހާ ފަރާތްތަކުން ވެސް މިނިސްޓްރީއަށް އެއްބާރުލުން ދިނުމަށާއި އެފަދަ ޢަމަލެއް ހިންގާ ފަރާތެއް ފާހަގަވެއްޖެނަމަ ލަސްނުކޮށް އެކަން ރިޕޯޓުކުރުމަށް އެ މިނިސްޓްރީން ވަނީ އެދިފައެވެ.
ފާހަގަކޮށްލެވޭ ގޮތުގައި، ބުޅަލެއް ދަންޖައްސައި މަރާލުމަށްފަހު އެ ބުޅާ ދަމާފައި ގެންގޮސް މޫދަށް އެއްލާލާ މަންޒަރު ފެންނަ ވީޑިއޯއެއް ދަނީ މީސް މީޑިއާގައި ދައުރުވަމުންނެވެ. މި ވީޑިއޯ ދައުރުވާން ފެށުމާއެކު ފުލުހުން ގެންދަނީ މި މައްސަލަ ބަލައި، ސުވާލުކުރަންޖެހޭ ފަރާތްތަކާ ސުވާލުކުރަމުންނެވެ.
