އދ. މާމިގިލީގައި ބޭއްވި ޒުވާން ޚަޠީބުން ތަމްރީނުކުރުމުގެ ޚާއްޞަ ޕްރޮގުރާމުގައި 26 ޚަޠީބަކު ސަނަދު ޙާސިލްކޮށްފައިވާ ކަމަށް އިސްލާމިކް މިނިސްޓްރީން ހާމަކޮށްފިއެވެ.
މާމިގިލީގައި ކުރިޔަށް ގެންދިޔަ މި ޕްރޮގްރާމް ނިންމުމުގެ ރަސްމިއްޔާތު ބާއްވާފައި ވަނީ މިދިޔަ ހޮނިހިރު ދުވަހުގެ ރޭގައެވެ. މި ރަސްމިއްޔާތުގައި އިސްލާމިކް މިނިސްޓްރީގެ ބައެއް އިސް ބޭފުޅުންގެ އިތުރުން، މާމިގިލީ ކައުންސިލްގެ ރައީސް އާއި އެހެނިހެން ބައެއް އިސްފަރާތްތައް ވަނީ ބައިވެރިވެވަޑައިގެންފައެވެ.
މި ޕްރޮގްރާމްގެ ތެރެއިން ޚުތުބާ ކިޔުމަށާއި، އިމާމުވެ ނަމާދު ކުރުމަށާއި، ދީނާ ގުޅުން ހުރި އެހެނިހެން ޚާއްޞަ ތަމްރީނުތައް ޕްރޮގްރާމުގެ ބައިވެރިންނަށް ވަނީ ދީފައެވެ. މި ޕްރޮގްރާމުގެ ދަށުން ގްރޭޑް 10، 11 އަދި 12 ގައި ކިޔަވާ ދަރިވަރުންނަށާއި ސްކޫލް ނިމިފައިވާ ކުދިންނަށް ހުކުރު ނަމާދު ކުރުމުގެ ހުއްދަ ދިނުން ހިމެނޭކަން ފާހަގަކޮށްލެވެއެވެ.
ޒުވާން ޚަޠީބުން ތަމްރީނުކުރުމުގެ ޕްރޮގުރާމަކީ ރާއްޖޭގެ ރަށްރަށަށް ދިމާވެފައިވާ ޚަޠީބުން ލިބުން ދަތިވުމުގެ މައްސަލައަށް ދާއިމީ ޙައްލެއް ހޯދައިދިނުމަށާއި ޒުވާނުންނަށް މި ފުރުޞަތު ފަހިކޮށްދިނުމުގެ ގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްނެންގެވުމުގެ ދަށުން އިސްލާމިކް މިނިސްޓްރީން ކުރިއަށްގެންދާ އެއް ޕްރޮގުރާމެވެ.
މި ޕްރޮގްރާމުގެ ދަށުން އެތައް ޒުވާނުންނެއް ވަނީ ޚަޠީބުންގެ ގޮތުގައި ތަމްރީނުވެފައެވެ. މިކަމުގެ ސަބަބުން މި ސަރުކާރުވެގެން ގޮސްފައިވަނީ އެންމެ ގިނަ ޒުވާން ޚަޠީބުން ތަމްރީނުކުރުމަށް އެންމެ ގިނަ މަސައްކަތްތަކެއް ކޮށްފައިވާ ސަރުކާރަށެވެ.
