މައި ދެ އިންތިޚާބު އެއްދުވަހެއްގައި ބޭއްވުމަކީ ޤާނޫނީ އެއްވެސް މައްސަލައެއް އޮތްކަމެއް ނޫންކަން ދަނީ ހާމަވަމުން ކަމަށް ޕީއެންސީގެ ނައިބު ރައީސް އަދި ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހީމް ޝުޖާއު ވިދާޅުވެއްޖެއެވެ.
ރައްޔިތުންގެ ޚިޔާލު ހޯދުމަށް ނަގަން ހަމަޖެހިފައިވާ ފެންނަ ނުފެންނަ ވޯޓުގައި ނޫނެކޭ ބުނެ ވޯޓު ދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ނޫނެކޭ ބުނެ ދެވޭ ވޯޓެއް ކަމަށް ވިދާޅުވެ އިލެކްޝަންސް ކޮމިޝަނުގެ ކުރީގެ ރައީސް އަޙްމަދު ޝަރީފް، ރާއްޖެ ޓީވީން ގެނެސްދޭ ނޫނެކޭ ކެމްޕޭނު ޕްރޮގްރާމުގައި ދެއްކެވި ވާހަކަތަކަށް ރައްދުދެއްވަމުން މެންބަރު ޝުޖާއު އެކްސްގައި ޙިއްޞާކުރެއްވި ޕޯސްޓެއްގައި ވިދާޅުވީ، ދެ އިންތިޚާބު އެއްދުވަހެއްގައި ބޭއްވުމަކީ ޤާނޫނީ އެއްވެސް މައްސަލައެއް ނުވަތަ ބަހުސެއް އޮތްކަމެއް ނޫންކަން ފެންނަ މަންޒަރުތަކާއި އިވޭ އަޑުތަކުން ދަނީ ހާމަވަމުން ކަމަށެވެ.
އެ ޕްރޮގްރާމްގައި ވާހަކަދައްކަވަމުން ޝަރީފް ވިދާޅުވީ، މި ސަރުކާރުގައި ރައްޔިތުންނަށް ކޮށްދީފައިވާ އެއްވެސް ކަމެއް ފެންނަން ނެތް ކަމަށާއި، ރައްޔިތުންގެ ލާބައާއި މަންފާއަށް ކޮށްދިން ކަމެއްވެސް ފެންނަން ނެތް ކަމަށެވެ. އަދި ލޯކަލް ކައުންސިލްތަކުގެ އިންތިޚާބާއެކު ބާއްވާ ފެންނަ ނުފެންނަ ވޯޓުގައި ހުރިހާ ރައްޔިތުންވެސް ރައީސް ޑރ. މުޢިއްޒަށް ނޫނެކޭ ބުނުމަށް އެދޭ ކަމަށް ޝަރީފް ވަނީ ވިދާޅުވެފައެވެ.
ޝަރީފްގެ މި ވާހަކަތަކަށް ރައްދުދެއްވަމުން މެންބަރު ޝުޖާއު ވިދާޅުވީ، ދެ އިންތިޚާބު އެއް ދުވަހެއްގައި ބޭއްވުމަކީ ސިޔާސީ ކަމެއްގެ ގޮތުގައި ދައްކަން އެމްޑީޕީން މަސައްކަތް ކުރާ ކަމަށާއި ނަމަވެސް އެކަމުގައި އެމްޑީޕީ ބޮޑުތަނުން ބަލިވެއްޖެ ކަމަށެވެ. އަދި މިކަމުގައި އެމްޑީޕީއަށް މިހާރު ދެއްކޭނެ އެއްވެސް ވާހަކައެއް ނެތް ކަމަށްވެސް ޝުޖާއު ވަނީ ވިދާޅުވެފައެވެ.
އެހެންކަމުން އެމްޑީޕީއަށް އިތުރު ފުރުޞަތު ނުދިނުމަށް ހުރިހާ ރައްޔިތުންގެ ކިބައިން އެދި ވަޑައިގަންނަވާ ކަމަށާއި ދެ އިންތިޚާބު އެއްދުވަހެއްގައި ބޭއްވުމަށް އާނއެކޭ ވިދާޅުވެ ދެއްވުމަށް މެންބަރު ޝުޖާއު ވަނީ ރައްޔިތުންގެ ކިބައިން އެދިވަޑައިގެންފައެވެ.
