ދިވެހިރާއްޖޭގައި ތިމާވެއްޓާ ރައްޓެހި އުޅަނދުތައް ބޭނުންކުރުން އިތުރުކުރުމަށް ބާރުއެޅުމަށްޓަކައި، އެފަދަ އުޅަނދުތަކުގައި ފެހި ކުލައިގެ ނަންބަރު ބޯޑު ހަރުކޮށް ބޭނުންކުރާ ގޮތަށް ސަރުކާރުން ނިންމައިފިއެވެ.
ސަރުކާރުގެ މި ނިންމުން އިޢުލާންކުރައްވަމުން ޓްރާންސްޕޯޓް މިނިސްޓަރު މުޙައްމަދު އަމީން ވިދާޅުވީ، ރާއްޖޭގައި ފުރަތަމަ ފަހަރަށް އިލެކްޓްރިކް އުޅަނދުތަކުގައި ފެހި ކުލައިގެ ނަމްބަރު ބޯޑު ހަރުކޮށް ބޭނުންކުރަން ފެށުމުން، އެފަދަ އުޅަނދުތައް މަގުތަކުން ފަސޭހައިން ދެނެގަނެވޭނެ ކަމަށެވެ. އަދި މިއީ ރާއްޖޭގައި ދެމެހެއްޓެނިވި ދަތުރުފަތުރުގެ ނިޒާމެއް ބިނާކުރުމުގެ ގޮތުން ފެށި މަޝްރޫއެއް ކަމަށްވެސް މިނިސްޓަރު ވަނީ ވިދާޅުވެފައެވެ.
Soon, for the first time in the Maldives, electric vehicles will carry green number plates, making them easily identifiable on our roads.
This initiative promotes cleaner mobility and supports President @MMuizzu climate commitments announced at COP29. pic.twitter.com/xugnHI86MU
— Mohamed Ameen (@ameen3d) March 12, 2026
އަލަށް ގެނެވުނު އުޞޫލުގައިވާ ގޮތުން، އަމިއްލަ ފަރާތްތަކުން ދުއްވާ އިލެކްޓްރިކް އުޅަނދުތަކުގައި ހަރުކުރާނީ ފެހި ކުލައިގެ ބޯޑެއްގައި ހުދު އަކުރުން ލިޔެފައިވާ ނަންބަރު ބޯޑު ކަމަށާއި، އިލެކްޓްރިކް ޓެކްސީތަކުގައި ބޭނުންކުރާނީ ފެހި ކުލައިގެ ބޯޑެއްގައި ރީނދޫ އަކުރުން ލިޔެފައިވާ ނަންބަރު ބޯޑު ކަމަށް މިނިސްޓަރު އަމީން ވިދާޅުވިއެވެ.
ސަރުކާރުގެ މައިގަނޑު އަމާޒަކީ ރާއްޖޭގައި ހަކަތަ އިސްރާފުކުރުން ކުޑަކޮށް، ތިމާވެއްޓާ ރައްޓެހި ދަތުރުފަތުރުގެ ނިޒާމެއް ޤާއިމުކުރުމެވެ. މި މަސައްކަތުގެ ދަށުން ސަރުކާރުން ވަނީ އިލެކްޓްރިކް ޓެކްސީގެ ޚިދުމަތް ތަޢާރަފުކުރުމަށް ނިންމައި، 150 އަށްވުރެ ގިނަ އުޅަނދު ރާއްޖެއަށް ގެނެސްފައެވެ. މިހާރު ކުރިއަށްދަނީ މި ޚިދުމަތް ފެށުމާ ގުޅޭ އެންމެފަހުގެ މަރުޙަލާތަކެވެ.
ރާއްޖޭގައި މިހާރު އުޅަނދުތަކުގެ ނަންބަރު ބޯޑު ބޭނުންކުރަނީ، އަމިއްލަ އުޅަނދުތަކުގައި ކަޅު ކުލައިގެ ބޯޑު، ޓެކްސީތަކުގައި ރީނދޫ ކުލައިގެ ބޯޑު، ސިފައިންގެ އުޅަނދުތަކުގައި ހުދު ކުލައިގެ ބޯޑު އަދި ޑިޕްލޮމެޓިކް އުޅަނދުތަކުގައި ނޫ ކުލައިގެ ބޯޑެވެ.
