ކައްކާ ގޭހާއި ތެލަށް ނުޖެހޭނެ ކަމަށާއި، ވަރަށް އަވަހަށް ގޭހާއި ތެލުގެ އިތުރު ޝިޕްމަންޓެއް ރާއްޖެ އަންނާނެ ކަމަށް ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ބުނެފިއެވެ.
މިކަމާ ގުޅިގެން އެސްޓީއޯއިން ބުނެފައިވަނީ، ކައްކާ ގޭހުގެ އިތުރު ޝިޕްމަންޓެއް އަންނަ ހުކުރު ދުވަހު އެސްޓީއޯގެ ސަބްސިޑަރީ ކުންފުނި ކަމަށްވާ މޯލްޑިވް ގޭހަށް ލިބޭނެ ކަމަށެވެ. މީގެ އިތުރުން ކުރިއަށް އޮތް ހަފްތާއެއްހައި ދުވަހުގެ ތެރޭގައި ރާއްޖެއަށް ތެލުގެ އިތުރު ޝިޕްމަންޓެއް ވެސް އަންނާނެ ކަމަށް އެ ކުންފުނިން ވަނީ މަޢުލޫމާތު ދީފައެވެ. އެގޮތުން މި މަހުގެ 20 އަދި 23 ވަނަ ދުވަހު ތެލުގެ ޝިޕްމަންޓް ރާއްޖެ އަންނާނެ ކަމަށް ލަފާކުރެވޭ ކަމަށް އެސްޓީއޯއިން ވަނީ ބުނެފައެވެ.
މެދުއިރުމަތީގައި މިހާރު ހިނގަމުން އަންނަ ހަނގުރާމައިގެ ސަބަބުން ގޭހުގެ ޑިމާންޑު އުފުލުމާ ގުޅިގެން، 10 ކިލޯގެ ގޭސްފުޅީގެ ބަދަލުގައި އެ ކުންފުނިން މިހާރު ވިއްކަނީ ފަސް ކިލޯގެ ގޭސްފުޅިއެވެ. ހުސްވި ފެބްރުއަރީ މަހުގެ ތެރޭގައި ވެސް އެސްޓީއޯއިން ވަނީ 10 ކިލޯގެ ގޭސްފުޅީގެ ބަދަލުގައި ޑިސްކައުންޓު ރޭޓުތަކަކާއެކު ހަތް ކިލޯގެ ގޭސްފުޅި ވިއްކާފައިވެއެވެ.
މެދުއިރުމަތީގައި ހިނގަމުން އަންނަ ހަނގުރާމައިގެ ސަބަބުން އެސްޓީއޯއިން ވަނީ ޕެޓްރޯލާއި ޑީސަލް ވިއްކާ އަގުތަކަށް ވެސް ބަދަލުތަކެއް ގެނެސްފައެވެ. އެގޮތުން އެސްޓީއޯއިން މީގެ ކުރިން 13.50 އަށް ވިއްކި ޕެޓްރޯލް ލީޓަރެއް މިހާރު ވިއްކަނީ 16.01 ރުފިޔާއަށެވެ. އަދި މީގެ ކުރިން 13.92 އަށް ވިއްކި ޑީސަލް ލީޓަރެއް މިހާރު ވިއްކަނީ 17.54 ރުފިޔާއަށެވެ.
އެސްޓީއޯއިން ބުނެފައިވާ ގޮތުގައި ރާއްޖެއަށް ބޭނުންވާ ގޭހާއި ތެޔޮ ގެނައުމުގައި، މި ތަކެތި އެތެރެ ކުރާ ފަރާތްތަކާއެކު، މި ތަކެތީގެ ސަޕްލައި މެނޭޖު ކުރުމުގެ މަސައްކަތް ކުރަމުންދާ ކަމަށާއި، ރާއްޖޭގައި ހުރި ތެލުގެ ސްޓޯރޭޖުގައި އެއްވެސް މައްސަލައެއް ނެތް ކަމަށް އެ ކުންފުނިން ވަނީ ބުނެފައެވެ.
އިޒުރޭލާއި އެމެރިކާ އިސްވެ އީރާނަށް ދިން ނިރުބަވެރި ހަމަލާތަކާ ގުޅިގެން މެދުއިރުމަތީގައި މިހާރު ހިނގަމުން އަންނަ ހަނގުރާމައިގެ ސަބަބުން އީރާނުން ވަނީ ހުރުމުޒް ކަނޑުއޮޅިން އެއްވެސް އުޅަނދަކަށް ދަތުރުނުކުރެވޭނޭހެން އެއްކޮށް ބަންދުކޮށްފައެވެ. މިކަމުގެ ސަބަބުން ގޭހާއި ތެލުގެ އަގު އުފުލި، އެ ތަކެތި ލިބުމަށް ވަނީ ދަތިވެފައެވެ.
