ރާއްޖޭގެ ހުރިހާ ސްކޫލެއްގައި އޭސީ ހަރުކުރުމަށް ކުރިއަށްގެންދާ ”ކޫލް ސްކޫލް“ ޕްރޮގްރާމްގެ ދަށުން ހއ. އަތޮޅުގެ ހުރިހާ ސްކޫލްތަކަށް އޭސީ ފޮނުވައިފިއެވެ.
”ކޫލް ސްކޫލް“ ގެ ދަށުން ކުރިއަށްގެންދާ މި މަޝްރޫޢަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން، އެޑިއުކޭޝަން މިނިސްޓްރީން ކުރިއަށްގެންދާ މަޝްރޫޢެކެވެ. މި މަޝްރޫޢަކީ ރާއްޖޭގެ ސްކޫލުތަކުގެ ކްލާސްރޫމްތަކުގެ ހޫނުމިން މަތިވުމުގެ ސަބަބުން ދަރިވަރުންނާއި މުދައްރިސުންނަށް ދިމާވާ ދަތިތަކަށް ދާއިމީ ޙައްލެއް ހޯދައިދިނުމުގެ ގޮތުން ސަރުކާރުން ފަށާފައިވާ މުހިއްމު މަޝްރޫޢެކެވެ.
މި މަޝްރޫޢުގެ މަސައްކަތްތަކާ ގުޅޭގޮތުން އެކްސްގައި ޙިއްޞާކުރެއްވި ޕޯސްޓެއްގައި ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހިމް ޝުޖާއު ވިދާޅުވީ، ރައީސް ޑރ. މުޢިއްޒުގެ ”ކޫލް ސްކޫލް“ ޕްރޮގްރާމްގެ ދަށުން ބާރަށު ދާއިރާގެ ހަތަރު ރަށް (ބާރަށް، މުރައިދޫ، އުތީމު، ތަކަންދޫ) ގެ ސްކޫލްތަކަށް ބޭނުންވާ އޭސީތައް ބާރަށު ދާއިރާ ހިމެނޭހެން ހއ. އަތޮޅުގެ ހުރިހާ ސްކޫލްތަކަށް ފޮނުވުމަށް މިހާރު ލޯޑްލުރެވިފައިވާ ކަމަށެވެ.
ރައީސް ޑރ @MMuizzu ގެ ”ކޫލް ސްކޫލް“ ޕްރޮގްރާމްގެ ދަށުން ބާރަށު ދާއިރާގެ 4 ރަށް (ބާރަށް،މުރައިދޫ،އުތީމު،ތަކަންދޫ) ގެ ސްކޫލްތަކަށް ބޭނުންވާ އޭ.ސީ ތައް ބާރަށު ދާއިރާ ހިމެނޭގޮތަށް ހއ.އަތޮޅުގެ ހުރިހާ ސްކޫލްތަކަށް ފޮނުވުމަށް މިހާރު ވަނީ ލޯޑް ކުރެވިފަ.މާތްاللهގެ ހެޔޮރަޚްމަތާއެކު މާދަމާ… pic.twitter.com/GbyrUjCtWj
— Ibrahim Shujau (@IbrahimShujaau) March 14, 2026
މި އޭސީތައް މާދަމާގެ ވަޤުތެއްގައި އެ ރަށްތަކާއި ހަމައަށް ފޯރާނެކަމަށްވެސް ޝުޖާއު ވަނީ ވިދާޅުވެފައެވެ.
”ކޫލް ސްކޫލް“ ޕްރޮގްރާމުގެ ދަށުން ކުރިއަށްގެންދާ މި މަޝްރޫއަކީ ފެނަކަ ކޯޕަރޭޝަނާ ޙަވާލުކޮށްގެން ކުރިއަށްގެންދާ މަޝްރޫއެކެވެ. މި މަޝްރޫޢުގެ ޢަމަލީ މަސައްކަތް ނިމުމުން، ސްކޫލުތަކުގެ ކިޔަވައިދޭ މާޙައުލަކީ ދަރިވަރުންނަށް އަރާމު އަދި ހިތްހަމަޖެހިގެން ކިޔަވާލެވޭ ތަނަކަށް ވެގެންދާނެ ކަމަށް ސަރުކާރުން ޤަބޫލުކުރެއެވެ.
