ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މޭޔަރުކަމުގައި ހުންނެވި ދުވަސްވަރު އެކުލަވާލި މާލޭ ސަރަޙައްދުގެ ލޭންޑު ޔޫސް ޕްލޭން އޮތީ އެމްޑީޕީގެ ވެރިކަމުގެ ހައުސިން މިނިސްޓްރީން ހިފަހައްޓާފައިކަމަށް ޕީއެންސީގެ ނައިބު ރައީސް އަދި ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހީމް ޝުޖާއު ވިދާޅުވެއްޖެއެވެ.
މެންބަރު ޝުޖާއު މި މޭރުމުން ވިދާޅުވީ ޕީއެންސީގެ ހުޅުމާލެ ދެކުނު ދާއިރާގެ ޖަގަހަ ހުޅުވުމަށް ރޭ ބޭއްވި ޖަލްސާގައި ވާހަކަދައްކަވަމުންނެވެ. ޝުޖާއު ވިދާޅުވީ، 11 އަހަރުގެ ދިގު މާޒީއަކަށްފަހު މާލޭ ސިޓީގެ މޭޔަރުކަމަށް ޕީޕީއެމްގެ ޓިކެޓުގައި ރައީސް ޑރ. މުޢިއްޒު ވަޑައިގެންނެވީ މެނިފެސްޓޯއަކާ އެކުގައި ކަމަށާއި، އެ ދުވަސްވަރު އެކުލަވާލެވުނު ލޭންޑް ޔޫސް ޕްލޭނަކީ ރައްޔިތުންގެ ފުރިހަމަ ބައިވެރިވުމާއި އެއްބާރުލުމާއިއެކު އެކުލަވާލެވުނު ލޭންޑް ޔޫސް ޕްލޭނެއް ކަމަށެވެ.
”ޤާނޫނުގައި އޮންނަނީ ހަމައެކަނި ރައްޔިތުންގެ ޚިޔާލު ހޯދަން. އެކަން ފުޅާކުރައްވައި ޖަމުޢިއްޔާ ޖަމާޢަތްތަކާއި ކުލަބުތަކާއި މާލޭގެ ކަމުވޮށިގެންވާ އިސްރައްވެހިންގެ ޚިޔާލާއި މަޝްވަރާ އެމަނިކުފާނު ހޯއްދެވި. ކަންވެގެންދިޔައި ކިހިނެތްތޯ، އެމްޑީޕީގެ ވެރިކަމުގައި އޭރުގެ ހައުސިންގ މިނިސްޓްރީން އޮތީ އެ ލޭންޑް ޔޫސް ޕްލޭން ހިފަހައްޓާފައި ރައީސް މުޢިއްޒު ވެރިކަމާ ހަވާލުވެވަޑައިގަންނަވަންދެން. ކޮބާތޯ އެ މީހުންގެ އިޚުލާޞްތެރިކަން،“ – ބާރަށު ދާއިރާގެ މެންބަރު އިބްރާހީމް ޝުޖާއު ވިދާޅުވިއެވެ.
ނިމިދިޔަ އެމްޑީޕީ ސަރުކާރުން އޭރު ޢަމަލުކޮށްފައިވަނީ ޣައިރު ޒިންމާދާރުގޮތެއްގައިކަން ފާހަގަކުރައްވަމުން މެންބަރު ޝުޖާއު ވިދާޅުވީ، އެ ޕާޓީން ކަންކަން ކޮށްފައި އޮތް ގޮތުގެ ސަބަބުން ރައްޔިތުންނަށް ގިނަ ދުއްތުރާތަކާ ކުރިމަތިލާން ޖެހުނު ކަމަށެވެ. މީގެ އިތުރުން މާލޭ ސިޓީ ކައުންސިލުން ހިންގަން ނިންމި ތަރައްޤީގެ ގިނަ މަޝްރޫޢުތަކެއް ކުރިއަށްގެންދިއުމަށް އޭރުގެ ސަރުކާރުން ހުރަސްއަޅާފައިވާ ކަމަށްވެސް ޝުޖާއު ވަނީ ވިދާޅުވެފައެވެ.
އެހެންކަމުން މާޒީގައި ކަންކަން ހިނގާފައިވާ ގޮތަށް ބަލައި، ރައްޔިތުންނާ ގާތުން ޚިދުމަތް ދިނުމަށް މާލޭގެ ސިޓީ ކައުންސިލުގެ މެޖޯރިޓީ ޕީއެންސީއަށް މިއަދު ކޮންމެހެން ބޭނުންވާ ކަމަށް ޝުޖާއު ވަނީ އިތުރަށް ވިދާޅުވެފައެވެ.
