ޔަހޫދީންނާއި އެމެރިކާ ގުޅިގެން އީރާނަށް ދެމުންދާ ޙަމަލާތަކުގައި އީރާނުން ޝަހީދުވެގެން ގޮސްފައިވާ އެންމެންގެ މަރުގެ ބަދަލު ހިފާނެ ކަމުގެ ގަދަ އިންޒާރު އީރާނުގެ އައު ރޫޙީ ވެރިޔާ، މުޖުތަބާ ޚާމަނާއީ ދެއްވައިފިއެވެ.
އީރާނަށް ދެމުންގެންދާ ހަމަލާ ތަކުގެ ރައްދުގައި އެ ޤައުމުން ޙަމަލާތައް ދިނުމުގެ މަތީގައި ދެމިތިބޭނެ ކަަމަށާއި، ހުރުމުޒް ކަނޑޮއޮޅި ބަންދުކޮށްފައި ބާއްވާނެ ކަމަށްވެސް މުޖުތަބާ ޚާމަނާއީ ވިދާޅުވިއެވެ.
މިއަހަރުގެ ފެބްރުއަރީ މަހުގެ 28ވަނަ ދުވަހު ޔަހޫދީންނާއި އެެމެރިކާ ގުޅިގެން އީރާނަށް ދޭން ފެށި ޙަމަލާތަކުގައި އީރާނުގެ ކުރީގެ ރޫޙާނީ ލީޑަރު، އާޔަތުالله ޢަލީ ޚަމަނާއީ ވަނީ އަވަހާރަވެފައެވެ. އެއާއެކު، އައު ރޫޙާނީ ލީޑަރުގެ މަޤާމަށް އީރާނުން މިހާރު ވަނީ އޭނާގެ ދަރިކަލުން، މުޖުތަބާ ޚާމަނާއީ ޢައްޔަކުކޮށްފައެވެ.
މަޤާމާ ޙަވާލުވެވަޑައިގެންނެވި ފަހުން ފުރަތަމަ ފަހަރަށް ރައްޔިތުންނާ މުޚާތަބު ކުރައްވައި ނެރުއްވި ބަޔާނުގައި މުޖުތަބާ ވިދާޅުވީ އީރާނުގެ އަވަށްޓެރި ޤައުމުތަކުގައި ހުރި އެމެރިކާގެ އަސްކަރީ މަރުކަޒުތައް ބަަންދުކުރަން ޖެހޭ ކަމަށެވެ. އީރާނަށް އަމާޒުވަމުންދާ ޙަމަލާތަކުގެ ބަދަލުގައި އީރާނުން ރައްދު ޙަމަލާތައް އެ މަރުކަޒުތަކަށް ދެމުން ދާނެ ކަމަށް ވެސް އޭނާ ވިދާޅުވިއެވެ. އަދި ޝަހީދުވި މީހުންގެ މަރަށް ބަދަލު ހިފާނެ ކަމަށް ވެސް އޭނާ ވިދާޅުވިއެވެ.
މުޖުތަބާ އިތުރަށް ވިދާޅުވީ ކާމިޔާބުކަމާއެކު އީރާނުން މިހާރު ވެސް ބޭނުން ކުރަމުންދާ ދިފާޢީ އުކުޅުތައް ކުރިއަށް އޮތް ދުވަސްތަކުގައި ވެސް ބޭނުންކުރަމުން ދިޔުމަށް ގިނަ ރައްޔިތުން އެދޭ ކަމަށެވެ. އަދި ހުރުމުޒް ކަނޑުއޮޅި ހަތިޔާރަކަށް ހަދައި، އެ މަގު ބަންދުކޮށްފައި ބާއްވާނެ ކަމަށް ވެސް އޭނާ ވިދާޅުވިއެވެ.
ހުރުމުޒް ކަނޑުއޮޅިއަކީ ތެލާއި ގުދުުރަތީ ގޭސް ދުނިޔޭގެ އެކި ސަރަޙައްދުތަކަށް އުފުލުމަށް ބޭނުންކުރާ މައި އެއް މަގެވެ. ޔަހޫދީންނާއި އެމެރިކާއިން ހަނގުރާމަ ފެށުމާއެކު އީރާނުން ވަނީ އެ ކަނޑުއޮޅި އެއްވެސް އުޅަނދަކަށް ހުރަސް ނުކުރެވޭނެ ކަމަށް އިޢުލާނުކޮށް، އެ ސަރަޙައްދުން ދަތުރުކުރާ އުޅަނދު ފަހަރަށް ޙަމަލާ ދޭނެ ކަމުގެ އިންޒާރު ދީފައެވެ. އެ ސަރަޙައްދުން ދަތުރުކުރަން މަސައްކަތް ކުރި އުޅަނދުތަކަށް އިންޒާރާ އެއްގޮތަށް އީރާނުން ޙަމަލާ ދީފައިވެއެވެ. އެ ކަނޑުއޮޅި ބޭނުން ނުކުރެވުމުގެ ސަބަބުން ގިނަ ޢަދަދެއްގެ ތެޔޮ ޓޭންކަރުތައް ވަނީ އެ ސަރަޙައްދުގައި ތާށިވެފައެވެ. ނަތީޖާއެއްގެ ގޮތުން ބައިނަލްއަޤްވާމީ ބާޒާރުގައި ތެލުގެ އަގު ވަނީ އިންތިހާއަށް އުފުލިފައެވެ.
