މެދުއިރުމަތީގެ ހަމަނުޖެހުންތަކާ ގުޅިގެން ދިވެހިރާއްޖޭގެ އިޤްތިޞާދަށް ކުރިމަތިވެދާނެ ނޭދެވޭ އަސަރުތަކުން ރައްކާތެރިވުމަށްޓަކައި، ދަޢުލަތުގެ ޚަރަދުތައް ކުޑަކުރުމުގެ ފިޔަވަޅެއްގެ ގޮތުން ކޮންމެ އަހަރެއްގެ ވެސް ދެ ޢީދާ ދިމާކޮށް ރަށްރަށުގައި ދިއްލާ ޢީދު ބޮކި މި އަހަރު ނުދިއްލާ ގޮތަށް ސަރުކާރުން ނިންމައިފިއެވެ.
މެދުއިރުމަތީގެ ހަނގުރާމައިގެ ސަބަބުން ދިވެހިރާއްޖެއަށް ކުރިމަތިވެދާނެ ގޮންޖެހުންތަކާ ގުޅޭގޮތުން މަޝްވަރާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކުލަވައިލެއްވި ކެބިނެޓް މިނިސްޓަރުންގެ ޚާއްޞަ ކޮމިޓީން މިއަދު ބޭއްވި ނޫސްވެރިންގެ ބައްދަލުވުމުގައި މިކަން ވަނީ ހާމަކުރައްވައިފައެވެ.
އެގޮތުން މިކަމާ ގުޅޭގޮތުން މަޢުލޫމާތު ދެއްވަމުން ފޮރިންގ މިނިސްޓަރު ޢަބްދުﷲ ޚަލީލް ވިދާޅުވީ، ރަށްރަށުގައި ޢީދު ބޮކި ނުދިއްލުމަށް ނިންމެވީ ކެބިނެޓް މިނިސްޓަރުންގެ ލަފަޔާއި މަޝްވަރާއާއެކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަމަށެވެ. މިނިސްޓަރު ވިދާޅުވީ، ރާއްޖޭގެ ފަސް ސިޓީއެއްގައި ޢީދު ބޮކި ދިއްލާނެ ކަމަށާއި، އެހެންނަމަވެސް އެ ސިޓީތަކުގައި ވެސް ޢީދު ބޮކި ދިއްލާނީ ކަނޑައެޅޭ ވަކި ޚާއްޞަ ސަރަޙައްދުތަކެއްގައި ކަމަށެވެ.
ސަރުކާރުގެ މި ނިންމުމަކީ ބައިނަލްއަޤްވާމީ މަޝްރަޙަށް އަންނަ ބަދަލުތަކާއެކު، ރާއްޖޭގެ މާލީ ފުދުންތެރިކަން އިތުރުކޮށް، އިޤްތިޞާދީ ހަމަޖެހުން ދެމެހެއްޓުމަށްޓަކައި ކޮންމެހެން ކުރަންޖެހޭ ޚަރަދުތަކަށް އިސްކަންދިނުމުގެ ގޮތުން ސަރުކާރުން އަޅާފައިވާ ހަރުދަނާ ފިޔަވަޅެކެވެ.
