އިޒުރޭލާއި އެމެރިކާ އިސްވެ ހުރެ، އީރާނަށް ދިން ހަމަލާތަކާއި ގުޅިގެން މެދުއިރުމަތީގައި މިހާރު ހިނގަމުންދާ ހަނގުރާމައިގެ ބޭނުމަށް ދިވެހިރާއްޖޭގެ ވައިގެ ސަރަހައްދު ބޭނުންކުރަން އެދުމުން، އެކަމަށް ރާއްޖެއިން އިންކާރުކޮށްފައިވާ ކަމަށް ފޮރިންގ މިނިސްޓަރު ޑރ. ޢަބްދުﷲ ޚަލީލް ވިދާޅުވެއްޖެއެވެ.
މިނިސްޓަރު ޚަލީލް މި މޭރުމުން ވިދާޅުވީ، މެދުއިރުމަތީގައި މިހާރު ހިނގަމުންދާ ހަނގުރާމައިގެ ސަބަބުން ދިވެހިންނަށް ކުރިމަތިވެދާނެ ދަތިތައް ޙައްލުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އުފައްދަވާފައިވާ ކެބިނެޓް މިނިސްޓަރުންގެ ޚާއްޞަ ކޮމިޓީން ރައީސުލްޖުމްހޫރިއްޔާގެ އޮފީހުގައި މިއަދު ހަވީރު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ.
މި ބައްދަލުވުމުގައި މިނިސްޓަރު ޚަލީލް ވިދާޅުވީ، މެދުއިރުމަތީގެ ހަނގުރާމައިގެ އެއްވެސް ބޭނުމަކަށް ރާއްޖޭގެ ވައިގެ ސަރަޙައްދު ބޭނުންކުރުމުގެ ހުއްދަ އެއްވެސް ޤައުމަކަށް ސަރުކާރުން ނުދޭނެ ކަމަށާއި، ސަރުކާރުން މިވަގުތު އެންމެ އިސްކަމެއްދީގެން ކުރާ ކަމަކީ ރާއްޖޭގެ އަމަންއަމާންކަމާއި އިޤްތިޞާދަށް ދިމާވެދާނެ ޙާލަތަކަށް ހަރުދަނާ ފިޔަވަޅުތަކެއް އެޅުން ކަމަށެވެ.
”އޭގެ ދަށުން ރާއްޖޭގެ ވައިގެ ސަރަޙައްދުން އެއްވެސް ޤައުމަކަށް، ހަމަލާދިނުމަށް ބޭނުންކުރެވިފައި ނުވާނެ ކަން އަޅުގަނޑު ހަމަ ދަންނަވާލަން. އަދި އެފަދަ ރިކުއެސްޓުތައް އަޅުގަނޑުމެން ރިޖެކްޓު ކުރަމުންދާ ކަން ތިބޭފުޅުންގެ މަޢުލޫމާތަށްޓަކާ ދަންނަވަން،“ – މިނިސްޓަރު ޚަލީލް ވިދާޅުވިއެވެ.
މިނިސްޓަރު ޚަލީލް ވިދާޅުވީ، މެދުއިރުމަތީގެ ހަނގުރާމައާ ގުޅިގެން ރާއްޖޭގެ އިޤުތިޞާދަށް ކުރާނެ ނޭދެވޭ އަސަރުތައް ދެނެގަނެ، އެކަމުން ރާއްޖެއަށް ކުރާނެ އަސަރުތައް ކުޑަކޮށް، އެއްވެސް ދަތިކަމެއް ނެތި ކާބޯތަކެތި ލިބޭނެކަން ކަށަވަރުކުރުމުގެ މަސައްކަތް ސަރުކާރުން ކުރަމުން އަންނަ ކަމަށެވެ.
މީގެ އިތުރުން ތެޔޮ ލިބުމުގެ ދަތިކަން ކުޑަކުރުމަށްޓަކައި، ތެޔޮ ލިބޭނެ އިތުރު ގޮތްތައް ބަލައި، ތެލުގެ ރައްކާތެރިކަން ކަށަވަރުކުރުމަށް އެއް ޤައުމަކަށް ބަރޯސާވުމުގެ ބަދަލުގައި، އެކި ޤައުމުތަކުން ތެޔޮ ގަތުމަށް މަޝްވަރާތަކެއް ކުރަމުން އަންނަ ކަމަށްވެސް މިނިސްޓަރު ވަނީ ވިދާޅުވެފައެވެ.
