ވޭތުވެދިޔަ 48 ގަޑިއިރުގެ ތެރޭގައި ވައްކަމާއި ފޭރުމުގެ އެކިއެކި މައްސަލަތަކުގައި 11 މީހަކު ހައްޔަރުކުރެވިފައިވާ ކަމަށް އެސިސްޓެންޓް ކޮމިޝަނަރ އޮފް ޕޮލިސް އަދި ފުލުހުންގެ ސްޕޯކްސް ޕާސަން އަޙްމަދު ޝިފާން ހާމަކުރައްވައިފިއެވެ.
މިކަމާ ގުޅިގެން ޝިފާން އެކްސްގައި ޙިއްޞާކުރެއްވި ޕޯސްޓެއްގައި ވިދާޅުވީ، ފާއިތުވި 48 ގަޑިއިރުގެ ތެރޭގައި ފުލުހުން ހިންގި ޚާއްޞަ އޮޕަރޭޝަނެއްގައި 11 މީހަކު ހައްޔަރުކުރެވިފައިވާ ކަމަށެވެ. މީގެ އިތުރުން ވައްކަމާއި ފޭރުމާއި އަދި އެހެނިހެން ކުށްތަކާއި ގުޅިގެން ޖުމްލަ 231،000 ރުފިޔާ ހޯދާފައިވާ ކަމަށްވެސް ޝިފާން ވަނީ ވިދާޅުވެފައެވެ.
In the past 48 hours, police operations led to 11 arrests and the recovery of MVR 231,000 linked to theft and crime. Continuous patrols and community engagement remain key to keeping Malé safe. @PoliceMv
— Ahmed Shifan (@Shifan4040) March 11, 2026
މާލެ ސިޓީގެ އަމާންކަމާއި ރައްކާތެރިކަން ކަށަވަރުކުރުމަށްޓަކައި، ފުލުހުން މެދުނުކެނޑި ކުރަމުންދާ މަސައްކަތްތައް ވަކިން ޚާއްޞަކޮށް ޕެޓްރޯލް ކުރުމުގެ މަސައްކަތްތަކާއި، މިކަމުގައި ޢާންމުންގެ ފަރާތުން ފުރިހަމަ އެއްބާރުލުމާއި ބައިވެރިވުން ނުހަނު ބޮޑަށް ބޭނުންވާ ކަމަށްވެސް ޝިފާން އިތުރަށް ވިދާޅުވިއެވެ.
ފާހަގަކޮށްލެވޭ ގޮތުގައި، މާލޭ ސިޓީގެ އަމާންކަމާއި ރައްކާތެރިކަން ދެމެހެއްޓުމަށާއި ކުށްކުރުން މަދުކުރުމަށްޓަކައި ޚާއްޞަ މަސައްކަތްތަކެއް މި ދުވަސްވަރު ފުލުހުން ގެންދަނީ ކުރަމުންނެވެ. އެގޮތުން މާލޭގެ މަގުތައް ޕެޓްރޯލް ކުރުން އިތުރުކޮށް، ކުށްކުރާ ފަރާތްތަކާއި، ކުށްކުރާ ކަމަށް ތުޙުމަތުކުރެވޭ ފަރާތްތައް ދެނެގަނެ، އެފަދަ ފަރާތްތަކާމެދު ފިޔަވަޅުތައް ފުލުހުން އަންނަނީ އަޅަމުންނެވެ.
