ޤާނޫނު އަސާސީ އިސްލާހުކުރި ދުވަސްވަރުވެސް ރިޔާސީ އިންތިހާބާއި މަޖިލިސް އިންތިޚާބު އެކުއެކީ ބޭއްވުމަށް ބަހުސްކުރިކަމަށް ރައްޔިތުންގެ މަޖިލީހުގެ ނާއިބު ރައީސް އަހުމަދު ނާޒިމް މިއަދު ހާމަކުރައްވައިފިއެވެ.
ދެ އިންތިޚާބު އެއްދުވަހެއްގައި ބޭއްވުމަށް ރައްޔިތުންގެ މަޖިލީހުން ބިލު ފާސްކުރި ފަހުން އެ ބިލު ތަސްދީގު ވެސް ކޮށްފައިވާ އިރު ދެން އޮތީ އެކަމާ ގުޅޭ ގޮތުން ރައްޔިތުންގެ ފެންނަ ނުފެންނަ ވޯޓެއް ނެގުމެވެ. އެ ވޯޓު ނަގާނީ އަންނަ އޭޕްރީލް މަހުގެ 4 ގައި ބައްވާ ލޯކަލް ކައުންސިލް އިންތިޚާބާއެކުގައެވެ.
ނަމަވެސް އެ ވޯޓާ ދެކޮޅަަށް އިދިކޮޅު އެމްޑީޕީން ދަނީ ކެމްޕޭނެއް ކުރަމުން ނެވެ. އަދި މިއީ ހަމަ ހުރެލާފައި ބަދަލުކޮށްލެވިގެންވާނެކަމެއް ނޫން ކަމަށް ވެސް އެމްޑީޕީން ދަނީ ބުނަމުން ނެވެ.
އެމްޑީޕީން މިކަމާ ދެކޮޅުވެގެން އުޅުނު ނަމަވެސް މަޖިލީހުގެ ނާއިބު ރައީސް އަހުމަދު ނާޒިމް މިއަދު ވިދާޅުވީ ރިޔާސީ އިންތިޚާބާއި ރައްޔިތުންގެ މަޖިލީހުގެ އާންމު އިންތިހާބު ބާއްވާނެ ތާރީހުތަކާ ގުޅޭގޮތުން ރައްޔިތުންގެ ހާއްސަ މަޖިލީހުގައި ކުރިން ވެސް ބަހުސްކޮށްފައިވާ ކަމަށެވެ. އެއީ ޤާނޫނު އަސާސީ އިސްލާހުކުރި ދުވަސް ވަރުގެ ވާހަކައެވެ.
”އެކަމާ ގުޅޭގޮތުން ހާއްސަމަޖިލީހަށް ހުށަހެޅުނު އިސްލާހުތަކަކީ، މާލޭ މެންބަރު އިބްރާހީމް އިސްމާއީލް ހުށަހެޅުއްވި އިސްލާހަކާއި، މާޅޮސްމަޑުލު އުތުރުބުރީ މެންބަރު އަލީ ވަހީދު ހުށަހެޅުއްވި އިސްލާހަކާއި، މާޅޮސްމަޑުލު އުތުރުބުރީ މެންބަރު ޝާހީން ހަމީދު ހުށަހެޅުއްވި އިސްލާހެކެވެ“ ނާޒިމް ވިދާޅުވި އެވެ.
ދެ އިންތިޚާބު އެއްކޮށްލަން ބަހުސްކުރިކަން ރައްޔިތުންގެ މަޖިލީހަށް އެ ދުވަަސްވަރު ހުށަހެޅި ތިން ހުށަހެޅުމަކުން ވެސް އެކަން އެނގޭ ކަމަށާއި އަދި މަޖިލީހުން އެކަމަށް ގޮތްތަކެއް ނިންމާފައިވާ ކަމަށް ވެސް ނާޒިމް ވިދާޅުވި އެވެ. އެކަމާގުޅޭ ކަރުދާސްތައް ނާޒިމް ވަނީ ހިއްސާ ކުރައްވާފައެވެ.
ިޔާސީ އިންތިޚާބާއި ރައްޔިތުންގެ މަޖިލީހުގެ އާންމު އިންތިޚާބު ބާއްވާނެ ތާރީޚުތަކާ ގުޅޭގޮތުން ރައްޔިތުންގެ ޚާއްޞަ މަޖިލީހުގައި ބަހުސްކުރެވިފައިވެއެވެ. އެކަން އެނގެނީ އެކަމާ ގުޅޭގޮތުން ރައްޔިތުންގެ ޚާއްޞަ މަޖިލީހަށް 3 ހުށަހެޅުމެއް ހުށަހެޅި، ތާއީދުލިބި، އެ މަޖިލީހުން އެކަމަށް… pic.twitter.com/2GZ0sgvdhw
— Ahmed Nazim (@MP4Dhiggaru) March 10, 2026
އިދިކޮޅު ފަރާތްތަކުން ދަނީ މި ފެންނަ ނުފެންނަ ވޯޓުގެ ކަންކަން އޮޅުވާލާ، 2 އިންތިޚާބު އެއްކުރަނީ ކަމަށްބުނެ ކެމްޕޭނުކުރަމުންނެވެ. އެހެންނަމަވެސް ޙަޤީޤަތަކީ 2 އިންތިޚާބު އެއްދުވަހެއްގައި ބާއްވަނީއެވެ. މިކަމުގައި ރައްޔިތުންނަށް އެންމެ ފައިދާހުރި ގޮތަކީ 2 އިންތިޚާބު އެއްދުވަހެއްގައި ބޭއްވުމަށް ނެގޭ ވޯޓުގައި އާނއެކޭ އަށް ވޯޓު ދިނުންކަމަށް ސިޔާސީ މަސްރަހު ދިރާސާ ކުރައްވާ ގިނަ ބަޔަކު ދެކެއެވެ.
