ކޮންމެ މީހެއްގެ ވެސް އަޞްލު ޙަޤީޤީ ކުލަވަރު ފެންނަން ފަށަނީ ތިމާގެ އަތުގައިވާ އާރާއި ބާރާއި ނުފޫޒު ގެއްލިގެންދާ ވަގުތުގައި ކަމަށް ވިދާޅުވެ، އިމިގްރޭޝަނުގެ ކުރީގެ ކޮންޓްރޯލަރ ޖެނެރަލް މުޙައްމަދު ޝަމްޢާން ވަހީދު ވަރަށް މާނަފުން މެސެޖެއް މީސް މީޑިއާގައި ޙިއްޞާކުރައްވައިފިއެވެ.
ޝަމްޢާން މި މޭރުމުން ވިދާޅުވީ ފޭސްބުކްގައި ޙިއްޞާކުރެއްވި ސްޓޭޓަސްއެއްގައެވެ. އެގޮތުން ކޮންމެ މީހެއްގެވެސް އަޞްލު ހަޤީޤީ ކުލަވަރު ފެންނަން ފަށަނީ ތިމާގެ ކިބައިގައި އެހެން މީހުންނަށް ފޯރުކޮށްދެވޭނެ ބާރެއް ނުވަތަ މަންފާއެއް ނެތް ދުވަހަކުން ކަމަށް އޭނާ ޙިއްޞާކުރެއްވި ސްޓޭޓަސްގައި ލިޔުއްވާފައިވެއެވެ.
ޝަމްއާން ފާހަގަކުރެއްވި ގޮތުގައި، މީހަކު ބާރުވެރި މަޤާމެއްގައި ނުފޫޒުގަދަ މީހެއްގެ ގޮތުގައި ހުންނައިރު، އެތައް ބަޔަކު އެ މީހެއްގެ ގާތް ރަޙްމަތްތެރިންގެ ގޮތުގައި ތިބޭތަން ބޭރުފުށުން ދައްކާނެ ކަމަށެވެ. ނަމަވެސް އެއީ އިޚްލާޞްތެރިކަމަށްވުރެ ބޮޑަށް، އެ މީހެއްގެ ފުށުން ލިބިދާނެ ފައިދާއަކަށްޓަކައި ކައިރީގައި ތިބޭ ބައެއް ކަމަށް ޝަމްޢާން ލިޔުއްވާފައިވެއެވެ.
މީގެ އިތުރުން ދިިރިއުޅުމުގެ އެންމެ ބޮޑު ފިލާވަޅުތައް ދަސްވަނީ ބާރުތައް ގެއްލި، އެކަނިވެރިވާ ވަގުތުގައި ކަމަށާއި، އެފަދަ ޙާލަތެއްގައި ތިމާއާއެކު ސާބިތުކަމާއެކު ދެގޮތެއްނުވެ ތިބެނީ މަދު ބައެއް ކަމަށާއި އެއީ ކޮންބައެއްކަން ހާމަވެގެންދާނެ ކަމަށްވެސް ޝަމްޢާން ޙިއްޞާކުރެއްވި ސްޓޭޓަސްގައި ލިޔުއްވާފައިވެއެވެ.
ޝަމްޢާންގެ މި މެސެޖާ ގުޅިގެން ގިނަ ބަޔަކު އަންނަނީ އެކިގޮތްގޮތަށް ވާހަކަދައްކަމުންނެވެ. އެގޮތުން ޝަމްޢާންގެ މި މެސެޖުގައި ބަޔާންކޮށްފައިވަނީ މިއަދުގެ މުޖުތަމަޢުގައި ހިނގަމުންދާ ކަންކަން، ވަކިން ޚާއްޞަކޮށް ރާއްޖޭގެ ސިޔާސީ މައިދާނުގައި ކަންކަން ހިނގަމުން އަންނަ ގޮތް ކަމަށް ވަރަށް ގިނަ ބަޔަކު ދެކެއެވެ.
ފާހަގަކޮށްލެވޭ ގޮތުގައި، އިމިގްރޭޝަންގެ ބެލުމުގެ ދަށަށް ގެންދިޔަ ބިދޭސީއަކު ދޫކޮށްލުމަށްފަހު އޭނާގެ އަތުން 500،000 ރުފިޔާ އަތުލިކަމުގެ ތުހުމަތުގައި، އޭނާ ހައްޔަރުކޮށް ޝަރީޢަތް ނިމެންދެން ބަންދުކުރީ މިދިޔަ އަހަރުގެ މާރިޗު މަހުގެ ތެރޭގައެވެ. އޭގެފަހުން އޭނާ ހުރީ ޝަރީޢަތް ނިމެންދެން ބަންދުކޮށްފައެވެ. އެފަހުން މިދިޔަ ޑިސެމްބަރުގައި ޝަމްއާން ޝަރުތު ކުރުމަށްފަހު ވަނީ ބަންދުން ދޫކޮށްލާފައެވެ. އޭނާއާއި އެއްކޮޅަށް ގިނަ ބަޔަކު ހެކިބަސް ދީފައިވާއިރު އޭނާއާއި ދެކޮޅަށްވެސް މަދު މީހަކު ހެކިބަސް ދީފައިވެއެވެ.
ޝަމްޢާން މި މޭރުމުން މީސް މީޑިއާގައި ސްޓޭޓަސްއެއް ޙިއްޞާކުރައްވާފައިވަނީ އެ ސަބަބަށްޓަކައި ކަމަށް ބެލެވެއެވެ.
